ସୀତାରାମ ଅଗ୍ରଓ୍ବାଲ
ବାଣପୁର : କୋଭିଡ ଯୋଦ୍ଧା ସ୍ବାସ୍ଥ୍ୟ କର୍ମୀଙ୍କୁ ଉଚ୍ଛ୍ଵସିତ ସମ୍ବର୍ଦ୍ଧନା ଦେଇ ସାରା ରାଜ୍ୟରେ ପ୍ରଶଂସାର ପାତ୍ର ହୋଇଥିବା ଖୋର୍ଦ୍ଧା ଜିଲ୍ଲା ବାଣପୁର ଏନଏସିର କୋଟବିଦ୍ୟାଧରପୁର ଗ୍ରାମରେ ଆଜି ପୁଣି ଏକ ସଂସ୍କାରମୂଳକ କାର୍ଯ୍ୟ ନଜରକୁ ଆସିଛି । ଏହି ଗ୍ରାମର ଅଧିବାସୀମାନେ ନିଜ ଉଦ୍ୟମରେ ରାସ୍ତା ପ୍ରଶସ୍ତିକରଣ କରିଛନ୍ତି ।
କିଛି ଲୋକମାନେ ସରକାରୀ ରାସ୍ତାକୁ କବଜା କରିଵା ଫଳରେ ଜନସାଧାରଣ ବିଭିନ୍ନ ପ୍ରକାର ଯାତାୟତର ଅସୁବିଧାର ସମ୍ମୁଖୀନ ହେଉଥିବା ବେଳେ କୋଟପୁର ଗ୍ରାମବାସୀମାନେ ନିଜ ଉଦ୍ୟମରେ ରାସ୍ତା ପ୍ରଶସ୍ତୀକରଣ କାର୍ଯ୍ୟକ୍ରମକୁ ହାତକୁ ନେଇଛନ୍ତି । ଅନେକ ଦିନ ଧରି ଗ୍ରାମର ରାସ୍ତା ସଂକୀର୍ଣ୍ଣ ହେଇଥିବାରୁ ଗ୍ରାମବାସୀମାନେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି ।
କିଛି ଦିନ ତଳେ ଗ୍ରାମର ଜଣେ ସ୍ବାସ୍ଥ୍ୟ କର୍ମୀ କୋଭିଡ ଆକ୍ରାନ୍ତ ହେବା ଫଳରେ ସଂପୂର୍ଣ୍ଣ ଗ୍ରାମକୁ କଂଟେନମେଣ୍ଟ କରାଯାଇ ଗ୍ରାମକୁ ବିଶୋଧନ କରାଯାଇଥିଲା । ଏହି ସମୟରେ ରାସ୍ତା ସଂକୀର୍ଣ୍ଣ ଥିବାରୁ ଦମକଳ ଗାଡି ଗ୍ରାମ ଭିତରେ ପ୍ରବେଶ କରିବାକୁ ନେଇ ନାନା ସମସ୍ୟା ଦେଖାଦେଇଥିଲା। ତେଣୁ କଣ୍ଟେନମେଣ୍ଟ ସରିବା ପରେ ଗ୍ରାମବାସୀମାନେ ଏକତ୍ରିତ ହୋଇ ଗ୍ରାମର ମୁଖ୍ୟ ସଡକକୁ ପ୍ରଶସ୍ତ କରିବାର ନିଷ୍ପତ୍ତି ନେଇଥିଲେ । ଏହି କ୍ରମରେ ଆଜି ଗ୍ରାମର ଯୁବକମାନେ ସକାଳୁ ଶାବଳ କୋଡି ଧରି ଏକତ୍ରିତ ହୋଇ ରାସ୍ତାର ଦୁଇ ପାର୍ଶ୍ବକୁ ପ୍ରଶସ୍ତ କରି ରାସ୍ତାକୁ ଚଉଡା କରିଛନ୍ତି । ଗ୍ରାମର ଯୁବକମାନଙ୍କ ଏତାଦୃଶ କାର୍ଯ୍ୟକୁ ଆଖପାଖ ଗ୍ରାମବାସୀମାନେ ବହୁତ ପ୍ରଶଂସା କରିଛନ୍ତି ।
ଏହି କାର୍ଯ୍ୟକ୍ରମରେ ଗ୍ରାମର ହର ପ୍ରସାଦ ରଥ , ସ୍ୱୟଂପଦ ଶତପଥୀ , ପ୍ରଭାସ ହୋତା , ଜଗଦୀଶ ଷଡ଼ଙ୍ଗୀ , ରବି ନାରାୟଣ ଶତପଥୀ , ସନ୍ତୋଷ କୁମାର ଷଡ଼ଙ୍ଗୀ , ତପନ କୁମାର ଶତପଥୀ , ସରୋଜ କୁମାର ହୋତା ,ରଞ୍ଜନ ଷଡ଼ଙ୍ଗୀ, ମିଲୁ, ଅମନ , ବବଲୁ, ପ୍ରମୋଦ ଶତପଥୀ, ପରେଶ ଦାସ ଓ ଗ୍ରାମବାସୀମାନେ ପ୍ରମୁଖ ଭୂମିକା ନିର୍ବାହ କରିଥିଲେ ।