ସୀତାରାମ ଅଗ୍ରୱାଲ
ବାଣପୁର: କରୋନା ସଂକ୍ରମଣକୁ ଦୃଷ୍ଟିରେ ରଖି ବାଣପୁର ବ୍ଲକର ଦୁଇଟି ପଂଚାୟତର ତିନିଟି ଗାଁରେ ସଟଡାଉନ ଲାଗୁ କରାଯିବା ସହ ବାଣପୁର ଏନଏସିର କିଛି ଅଞ୍ଚଳକୁ କଣ୍ଟେନମେଣ୍ଟ ଜୋନ ଘୋଷଣା କରାଯାଇଛି।
ବାଣପୁର ବ୍ଲକ ତୋରସିଂହ ଗ୍ରାମ ପଞ୍ଚାୟତର ନଛିପୁର ଗାଁର ଜଣେ ତେଜରାତୀ ଦୋକାନୀ କରୋନା ଆକ୍ରାନ୍ତ ହେବା ପରେ ପଞ୍ଚାୟତ ସଂରପଞ୍ଚ ମିନାକ୍ଷୀ ପ୍ରଧାନ ଜିଲ୍ଲାପାଳଙ୍କ କ୍ଷମତା ପ୍ରୟୋଗ କରି ଗାଁକୁ ଆଜି ଅପରାହ୍ନ ୩ଟାରୁ ୩୧ ତାରିଖ ଅପରାହ୍ନ ୩ଟା ଯାଏଁ ସଂପୂର୍ଣ୍ଣ ସଟଡାଉନ ଘୋଷଣା କରିଛନ୍ତି। ଆକ୍ରାନ୍ତ ବ୍ୟକ୍ତି ଅନେକ ଲୋକଙ୍କ ସହ ସଂପର୍କରେ ଆସିଥିବାରୁ ଗାଁରେ ଗୋଷ୍ଠୀ ସଂକ୍ରମଣ ହୋଇଥିବା ଆଶଙ୍କା କରାଯାଉଛି। ଏହାକୁ ଲକ୍ଷ୍ୟ କରି ଗାଁକୁ ସାନିଟାଇଜ କରିବାକୁ ସରପଞ୍ଚ ନିର୍ଦ୍ଦେଶ ଦେଇଛନ୍ତି।
ସେହିପରି ଆୟତପୁର ଗ୍ରାମ ପଞ୍ଚାୟତ ଅନ୍ତର୍ଗତ ତୋଟା ଗ୍ରାମର ଜଣେ ବ୍ୟକ୍ତି କରୋନା ସଂକ୍ରମିତ ହୋଇଥିବା ସନ୍ଦେହରେ ଆଗାମୀ ଦିନରେ ସଂକ୍ରମଣ ରୋକିବା ପାଇଁ ଏହି ଗାଁରେ ଆସନ୍ତାକାଲି ସକାଳ ୬ଟାରୁ ୨୮ ତାରିଖ ସକାଳ୬ଟା ସୁଦ୍ଧା ତୋଟା ଏବଂ ଭରତପୁର ଗାଁକୁ ସଂପୂର୍ଣ୍ଣ ସଟଡାଉନ ଘୋଷଣା କରାଯାଇଛି। ପଞ୍ଚାୟତ ସରପଂଚ ହରଷ ସେଠୀ ସଟଡାଉନ ଘୋଷଣା କରିଛନ୍ତି।
ଏପଟେ ବାଣପୁର ଏନଏସି ଅଞ୍ଚଳରେ ୬ଟି କରୋନା ସଂକ୍ରମିତ ଚିହ୍ନଟ ହୋଇଥିବାରୁ ସଂକ୍ରମଣକୁ ରୋକିବା ପାଇଁ ବାଣପୁର ଏନଏସିର ୪,୭ ଓ ୧୦ ନମ୍ବର ୱାର୍ଡରେ ଆସୁଥିବା ଅଞ୍ଚଳ ବିଶେଷ କରି ଗୋବିନ୍ଦ ପାତ୍ର( ପିଏନବି ଏଟିଏମ) ଘରଠାରୁ ସରକାରୀ ବାଳକ ଉଚ୍ଚବିଦ୍ୟାଳୟ ଏବଂ ଥାନା ଛକଠାରୁ ତଳସାହି ଡାକ ଘର ପଛପଟ ଯାଏଁ କଣ୍ଟେନମେଣ୍ଟ ଜୋନ ଘୋଷଣା କରାଯାଇଛି। ଫଳରେ ଶନିବାର ସକାଳ ୭ଟାରୁ ୨୮ ତାରିଖ ସକାଳ ୭ଟା ଯାଏଁ କଣ୍ଟେନମେଣ୍ଟ ଜୋନ ବଳବତ୍ତର ରହିବ। ଏହି ସମୟରେ ଏହି ଅଞ୍ଚଳକୁ ଯାତାୟତ ଉପରେ କଟକଣା ଲଗାଯାଇଛି।
