ରମେଶ ମହାନ୍ତି
ଜଗତସିଂହପୁର: ଜଗତସିଂହପୁର-ଅଡଶପୁର୍ ରାସ୍ତାର ଆଳିପିଙ୍ଗଳ ବଜାର ନିକଟରେ ଥିବା ହାଇସ୍କୁଲ ରାସ୍ତାର ଅବସ୍ଥା ଅତ୍ୟନ୍ତ ଶୋଚନୀୟ ହୋଇପଡିଛି। ଅଭିଯୋଗ ଅନୁଯାୟୀ ଏହି ହାଇସ୍କୁଲ ଜଗତସିଂହପୁର-ଅଡଶପୁର୍ ମୁଖ୍ୟ ରାସ୍ତା ଠାରୁ ମାତ୍ର ୪୦୦ ଫୁଟ ଦୂରତାରେ ଅବସ୍ଥିତ ଥିବା ବେଳେ ମୁଖ୍ୟ ରାସ୍ତା ଓ ଏହି ହାଇସ୍କୁଲ ରାସ୍ତାର ସଂଯୋଗ ସ୍ଥଳରେ ଖାଲଖମା ଯୋଗୁଁ ଅସରାଏ ବର୍ଷା ହେଲେ ଏଠି ଆଣ୍ଠୁଏ ପାଣି ଜମିରହୁଛି। ଫଳରେ ଏହି ରାସ୍ତାଦେଇ ସ୍କୁଲକୁ ଅଧ୍ୟୟନ ପାଇଁ ଯାତାୟତ କରୁଥିବା ଛାତ୍ରଛାତ୍ରୀମାନେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି।
ଏଥିସହିତ ଏହି ରାସ୍ତା ଉପରେ ସ୍ଥାନୀୟ ଅଞ୍ଚଳର ୧୦ଟି ଗ୍ରାମର ଲୋକେ ଯାତାୟତ ପାଇଁ ନିର୍ଭର କରୁଥିବା ବେଳେ ରାସ୍ତାରେ ଆଣ୍ଠୁଏ ପାଣି ହେବା ଯୋଗୁଁ ଲୋକମାନେ ଯାତାୟତରେ ବହୁ ସମସ୍ୟାର ସମ୍ମୁଖୀନ ହେଉଛନ୍ତି। ଏହି ରାସ୍ତା ଜିଲ୍ଲାପାଳଙ୍କ କାର୍ଯ୍ୟାଳୟ ଠାରୁ ମାତ୍ର ୪କି.ମି ଦୂର ହୋଇଥିବା ବେଳେ ଉକ୍ତ ରାସ୍ତାକୁ ମରାମତି ପାଇଁ ବାରମ୍ବାର ଦାବି ହେଉଥିଲେ ମଧ୍ୟ ଆଜି ପର୍ଯ୍ୟନ୍ତ ମରାମତି କାର୍ଯ୍ୟ ହୋଇପାରି ନଥିବାରୁ ସ୍ଥାନୀୟ ଅଞ୍ଚଳବାସୀଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି।
ଉକ୍ତ ରାସ୍ତାକୁ ଯଥାଶୀଘ୍ର ମରାମତି କରିବା ପାଇଁ ସ୍ଥାନୀୟ ବାସିନ୍ଦାଙ୍କ ପକ୍ଷରୁ ଜିଲ୍ଲାପାଳଙ୍କୁ ଏକ ଦାବିପତ୍ର ପ୍ରଦାନ କରାଯାଇଛି। ଉପକୂଳ ଓଡ଼ିଶା ବିକାଶ ପରିଷଦ ପକ୍ଷରୁ ଆୟୋଜିତ ଏହି କାର୍ଯ୍ୟକ୍ରମରେ ଆବାହକ ସରୋଜ ନାୟକ, ଅରୁଣ ଆଚାର୍ଯ୍ୟ, ଅଜୟ ଜେନା, ଜ୍ୟୋତି ରଞ୍ଜନ ପରିଡ଼ା, ବେଣୁଧର ନାୟକ, ମହେଶ୍ୱର ତ୍ରିପାଠୀ, ରମେଶ ମହାନ୍ତି, ଆଶୁତୋଷ ବେହେରା, କୈଳାସ ସାହୁ, ଦୃତିଧର ଦାସ ପ୍ରମୁଖ ଯୋଗଦେଇଥିଲେ। ସ୍ଥାନୀୟ ବାସିନ୍ଦା ବଂଶୀଧର ଭୋଳ, କାଳନ୍ଦୀ ବେହେରା, କୃତିବାସ ଦାସ, ଲିଟୁ ପ୍ରଧାନ, ବୁଢ଼ା ପ୍ରଧାନ, ନାରାୟଣ ବେହେରା, ବାବାଜୀ ଜେନା, ଉଲ୍ଲାସ ବେହେରା, ପରୀକ୍ଷିତ ପଲାଉର, ଶିବଦତ୍ତ ପ୍ରଧାନ ,ବନୋଜ ଦାସ, ବିଷ୍ଣୁ ମହାନ୍ତି, ବାବାଜୀ ଜେନା,ସାରଦା ପ୍ରସନ୍ନ ଦାସ, ଆର୍ତ୍ତବନ୍ଧୁ ବେହେରା, ରଘୁନାଥ ବେହେରାଙ୍କ ସମେତ ଶତାଧିକ ଲୋକ ଅଂଶ ଗ୍ରହଣ କରିଥିଲେ।ଏପରିକି ଏହି ରାସ୍ତାର ଅବସ୍ଥା ଦେଖି ଜନୈକ କେନ୍ଦରା ବାଦକ କେନ୍ଦରା ବଜାଇ ଦୁଃଖ ପ୍ରକାଶ କରୁଥିବା ସେଠାରେ ଦେଖିବାକୁ ମିଳିଥିଲା।