ସୀତାରାମ ଅଗ୍ରୱାଲ
ଚିଲିକା: ଚିଲିକା ନିର୍ବାଚନ ମଣ୍ଡଳୀରେ କିଛି ଅଞ୍ଚଳରେ ବିଦ୍ୟୁତ ସରବରାହ ନିର୍ଦ୍ଦିଷ୍ଟ ସମୟ ପାଇଁ ବନ୍ଦ ରହିବା ନେଇ ସୂଚନା ମିଳିଛି। ବାଣପୁର ଗ୍ରାମାଞ୍ଚଳ, ସହରାଞ୍ଚଳ ଏବଂ ଚିଲିକା ବ୍ଲକର କିଛି ଗ୍ରାମଗୁଡିକରେ ଆଜିଠାରୁ ଅକ୍ଟୋବର ୨୫ ଯାଏଁ ପର୍ଯ୍ୟାୟକ୍ରମେ ବିଦ୍ୟୁତ ସରବରାହ ବନ୍ଦ ରହିବ। ଏ ନେଇ ସୂଚନା ଦେଇଛନ୍ତି ଟି.ପି.ସି.ଓ.ଡ଼ି.ଏଲ ବାଲୁଗାଁ ଇଲେକ୍ଟ୍ରିକ ଡିଭିଜନ ନିର୍ବାହୀ ଅଧିକାରୀ ଜିତେନ୍ଦ୍ର ପାତ୍ର।
ବାଣପୁର ୧ ଏବଂ ବାଣପୁର ୨ ଫିଡ଼ର ଅଧୀନରେ ଥିବା ସବୁ ଗ୍ରାମ ଏବଂ ସହରରେ ଆଜିଠାରୁ ଦିନେ ଛଡା ଦିନେ ଅକ୍ଟୋବର ୨୫ ଯାଏଁ ସକାଳ ୭ ଘଟିକାରୁ ୧୧ ଘଟିକା ଯାଏଁ ବିଦ୍ୟୁତ ସରବରାହ ବନ୍ଦ ରହିବ। ଫିଡ଼ରର ରକ୍ଷଣାବେକ୍ଷଣ ବିଶେଷକରି ଗଛ ଡାଳ କଟାଯିବା ପାଇଁ ବିଦ୍ୟୁତ ସରବରାହ ବନ୍ଦ ରହିବ ବୋଲି ସୂଚନା ଦେଇଛନ୍ତି ଶ୍ରୀ ପାତ୍ର। ଏବଂ ଅଗାମୀଦିନରେ ବାଣପୁରରେ ନିରବଚ୍ଚିନ୍ନ ବିଦ୍ୟୁତ ପ୍ରବାହ ଜାରି ରଖିବାକୁ ହେଲେ ଏହିପରି ଉନ୍ନତମାନର ମରାମତି କାର୍ଯ୍ୟ ଜରୁରୀ ବୋଲି ଶ୍ରୀ ପାତ୍ର କହିଛନ୍ତି। ସେଥିପାଇଁ ଜନସାଧାରଣଙ୍କ ସହଯୋଗ ଲୋଡିଛନ୍ତି।
ଅପରପକ୍ଷରେ ଏ ନେଇ ବାଣପୁର ଅଞ୍ଚଳରେ ଡ଼ାକବାଜି ଯନ୍ତ୍ର ଦ୍ୱାରା ପ୍ରଚାର କରାଯାଇଅଛି ବୋଲି ଟି.ପି.ସି.ଓ.ଡ଼ି.ଏଲ ବାଲୁଗାଁ ଇଲେକ୍ଟ୍ରିକ ଡିଭିଜନ ଏସ.ଡ଼ି.ଓ ଟୁକୁନା ଦଳେଇ ସୂଚନା ଦେଇଛନ୍ତି।
ପର୍ଯ୍ୟାୟକ୍ରମେ ବିଦ୍ୟୁତ ସରବରାହ ବନ୍ଦ ରହୁଥିବା ଗ୍ରାମ ଏବଂ ସହର
ବାଣପୁର-୧ ଫିଡ଼ର
ତେନ୍ତୁଳିଡିହ ଗ୍ରାମ, ସୁନାକେରା ଗ୍ରାମ, ବାଲିପଦର ଗ୍ରାମ, ନିମିଖେତା ଗ୍ରାମ, ବେଲପଡା ଗ୍ରାମ, ଦୋଳମୁଣ୍ଡାଇ ଗ୍ରାମ, ସରନଇ ଗ୍ରାମ, ଆଙ୍କୁଲା ଗ୍ରାମ, ବଡକୁଳ ଗ୍ରାମ, ନୂଆଗଡ ଗ୍ରାମ, ବିଷ୍ଣୁଡିହ ଗ୍ରାମ, ପାରିକଂସାରୀ ଗ୍ରାମ, କୋତରି ଗ୍ରାମ ଏବଂ ପାଇକକୋସଡିହ ଗ୍ରାମ।
ବାଣପୁର-୨ ଫିଡ଼ର
ଗୋପୀନାଥପୁର, ଅଲାଇଡିହ, ଅନ୍ତରକିଆରୀ, ନନ୍ଦପୁର, ପ୍ରତାପ, କୁମାରାଙ୍ଗ, ରାଣୀପଡ଼ା, ପୁଞ୍ଜିଆମା, କେଶପୁର, ଦଣ୍ଡିଗାଡ଼ିଆ, ମଙ୍ଗଳପୁର, ଵାଲେଡିହ ଏବଂ ବାଣପୁର ଏନ.ଏ.ସି ଅଞ୍ଚଳ।
ସୂଚନା ଯୋଗ୍ୟ କି, ଆଜି ବାଣପୁର-୧ ଫିଡ଼ର ଅଧୀନରେ ଆସୁଥିବା ଗ୍ରାମଗୁଡିକରେ ବିଦ୍ୟୁତ ସରବରାହ ବନ୍ଦ ରହିଥିବା ବେଳେ ଆସନ୍ତାକାଲି ବାଣପୁର-୨ ଫିଡ଼ର ଅଧୀନରେ ଆସୁଥିବା ଗ୍ରାମଗୁଡିକରେ ବିଦ୍ୟୁତ ସରବରାହ ବନ୍ଦ ରହିବ। ଏହିପରି ଭାବରେ ଦିନେ ଛଡା ଦିନେ ଏହିସବୁ ଅଞ୍ଚଳଗୁଡିକରେ ବିଦ୍ୟୁତ ସରବରାହ ନିର୍ଦ୍ଦିଷ୍ଟ ସମୟ ପାଇଁ ବନ୍ଦ ରହିବ।
