ବାରିପଦା: ବାଙ୍ଗିରିପୋଷି-ରୁପ୍ସା ରେଳପଥର ବୈଦ୍ୟୁତିକରଣ କାର୍ଯ୍ୟ ପ୍ରାୟ ଶେଷ ହେବା ଉପରେ ପହଁଚି ଯାଇଥିଲା। ଏହି ସମୟରେ ମାର୍ଚ୍ଚ ୬ ଶନିବାର ପ୍ରାତଃ ସମୟରେ ବାରିପଦା ଭଞ୍ଜପୁର ରେଳ ଷ୍ଟେସନ ମଧ୍ୟ ସ୍ଥଳ ବାଘଡ଼ାରୋଡ଼ ଶନି ମନ୍ଦିର ନିକଟରେ ଥିବା ରେଳପଥର ବିଦ୍ୟୁତ୍ ଖୁଂଟରୁ ମୂଲ୍ୟବାନ ତାର ଚୋରୀ କରିବା ନିମନ୍ତେ କେତେକ ଦୁର୍ବୃତ୍ତ ଆସିଥିଲେ।
ଏମାନଙ୍କ ମଧ୍ୟରୁ ଜଣେ ଦୁର୍ବୃତ୍ତ ଖୁଂଟ ଉପରକୁ ଚଢ଼ି ତାରକୁ କାଟି ଦେଇଥିବା ବେଳେ ସେ ଖୁଂଟ ଉପରେ ନିଜର ଭାରସାମ୍ୟ ହରାଇ ତଳକୁ ଖସି ପଡ଼ିଥିଲା ଓ ଖୁଂଟ ମୁଳ କଂକ୍ରିଟ ଢ଼ଳେଇରେ ମୁଣ୍ଡ ବାଡ଼େଇ ହେବାରୁ ଘଟଣାସ୍ଥଳରେ ତାର ମୃତ୍ୟୁ ହୋଇଥିଲା। ଏହା ଦେଖି ଅନ୍ୟ ଦୁର୍ବୁତମାନେ ଭୟଭିତ ହୋଇ ଦୌଡ଼ି ପାଳାଇ ଯାଇଥିଲେ। ଏହି ସମୟରେ ବାଙ୍ଗିରିପୋଷି-ଭୂବନେଶ୍ୱର ସୁପରଫାଷ୍ଟ ଟ୍ରେନ ଆସି ସେଠାରେ ଅଟକି ରହିଥିଲା।
ଖବର ପାଇ ରେଳ ସୁରକ୍ଷା ବଳ ଘଟଣାସ୍ଥଳରେ ପହଁଚି ଶବକୁ ଚିହ୍ନଟ କରିବା ସହିତ ପଂଚନାମା ନିମନ୍ତେ ପଠାଇବା ପରେ ଟ୍ରେନ ତାର ଗନ୍ତବ୍ୟ ପଥରେ ଆଗେଇ ଯାଇଥିଲା। ମୃତ ଯୁବକ ଜଣକ ବାରିପଦା ପୌରପରିଷଦର ମଙ୍ଗଳା ମନ୍ଦିରସାହି ଅଂଚଳର ଚନ୍ଦନ ସରକାର ବୋଲି ଜଣାପଡ଼ିଛି।