ସୀତାରାମ ଅଗ୍ରୱାଲ
ବାଣପୁର: ଗତକାଲି ଖୋର୍ଦ୍ଧା ଜିଲ୍ଲା ବାଣପୁର ବ୍ଲକ ସମ୍ମୁଖରେ ଘଟିଥିବା ହିଂସା ଘଟଣାରେ ଏକାଧିକ ଜନସାଧାରଣ, ବାଣପୁର ଆଇଆଇସି, ପୋଲିସ କର୍ମୀ ଓ ୨ ସାମ୍ବାଦିକ ଆହତ ହୋଇଥିଲେ। ଗୁରୁତର ଆହତମାନେ ବିଭିନ୍ନ ହସ୍ପିଟାଲରେ ଚିକିତ୍ସିତ ହେଉଥିବାବେଳେ ଆଉ କେତେକ ଆହତ ବ୍ୟକ୍ତିମାନଙ୍କ ଆଶୁ ଚିକିତ୍ସା କରାଯାଇ ନିଜ ନିଜ ଘରେ ଚିକିତ୍ସିତ ହେଉଛନ୍ତି।
ତେବେ ଉକ୍ତ ଘଟଣାରେ ମର୍ମାହତ ହୋଇ ଆଜି ସକାଳେ ଦିଲ୍ଲୀରୁ ବିଜେପି ରାଷ୍ଟ୍ରୀୟ ମୁଖପାତ୍ର ଡ଼ା ସମ୍ବିତ ପାତ୍ର ଭୁବନେଶ୍ୱର ଆସି ସିଧାସଳଖ ଏମ୍ସ ହସ୍ପିଟାଲ ଯାଇଥିଲେ। ସେଠାରେ ଗୁରୁତର ଆହତ ହୋଇ ଚିକିତ୍ସିତ ହେଉଥିବା ଦୁଇ ଜଣ ମହିଳାଙ୍କୁ ଭେଟିବା ସହ ସେମାନଙ୍କ ସ୍ୱାସ୍ଥ୍ୟବସ୍ଥା ପଚାରି ବୁଝିଥିଲେ। ଏହାପରେ ଡ଼ା ପାତ୍ର ବାଣପୁର ଗସ୍ତ କରି ଭେଟେଶ୍ୱର ଏବଂ ନୀଳାଦ୍ରି ପ୍ରସାଦ ପଞ୍ଚାୟତକୁ ଯାଇ ସେଠାରେ ଏକାଧିକ ଆହତଙ୍କୁ ଭେଟିବାସହ ସେମାନଙ୍କ ଶୀଘ୍ର ଆରୋଗ୍ୟ କାମନା କରିଥିଲେ। ଅନୁରୂପ ଭାବେ ଡା. ପାତ୍ର ଆହତ ହୋଇଥିବା ସାମ୍ବାଦିକଙ୍କ ସହ ଟେଲିଫୋନ ଯୋଗେ ଯୋଗାଯୋଗ କରି ସେମାନଙ୍କର ସ୍ୱାସ୍ଥବ୍ୟସ୍ଥା ପଚାରି ବୁଝିଥିଲେ।
ଉକ୍ତ ଘଟଣାରେ ରାଜ୍ୟ ସରକାରଙ୍କୁ ଡା. ପାତ୍ର ସମାଲୋଚନା କରିବା ସହ ଏଭଳି ବର୍ବର କାଣ୍ଡ ଭିଆଇଥିବା ମୁଖ୍ୟ ଅଭିଯୁକ୍ତ ଚିଲିକା ବିଧାୟକ ପ୍ରଶାନ୍ତ ଜଗଦ୍ଦେବଙ୍କ ଉପରେ ଦୃଢ଼ କାର୍ଯ୍ୟାନୁଷ୍ଠାନ କେବେ ନିଆଯିବ ବୋଲି ପ୍ରଶ୍ନ କରିଥିଲେ। ସେହିପରି ଭାବେ ଶ୍ରୀ ଜଗଦ୍ଦେବଙ୍କୁ ନିଲମ୍ବନ କରିବା ବିଜେଡିର ଏକ ନାଟକ ବୋଲି ଡା. ପାତ୍ର କହିଛନ୍ତି। ତତସହିତ ପ୍ରଶାନ୍ତ ଜଗଦ୍ଦେବଙ୍କୁ ଦଳ କେବେ ବହିଷ୍କାର କରିବ ବୋଲି ସେ ରାଜ୍ୟ ସରକାରଙ୍କୁ ପ୍ରଶ୍ନ କରିଛନ୍ତି।
ଉକ୍ତ ଗସ୍ତରେ ଶ୍ରୀ ପାତ୍ରଙ୍କ ସମେତ ବିଜେପି ରାଜ୍ୟ ସାଧାରଣ ସମ୍ପାଦକ ପୃଥ୍ଵୀରାଜ ହରିଚନ୍ଦନ, ବାଣପୁର ବ୍ଲକ ଅଧ୍ୟକ୍ଷ ଅମରେନ୍ଦ୍ର ରଣସିଂହ, ବିଜେପି ବିରଜାଇ ମଣ୍ଡଳ ସଭାପତି ଜିତେନ୍ଦ୍ର ଭୋଳ, ଜିତେନ୍ଦ୍ର ସାମନ୍ତରାୟ ଆଦି ଉପସ୍ଥିତ ଥିଲେ।