ଭୁବନେଶ୍ୱର : ଉଚ୍ଚ ମାଧ୍ୟମିକ ଶିକ୍ଷା ନିର୍ଦ୍ଦେଶାଳୟ ଓ ଓସେପା ଦ୍ୱାରା ପ୍ରଥମ କରି ଆୟୋଜିତ ଦୁଇଦିନିଆ ରାଜ୍ୟସ୍ତରୀୟ ଉଚ୍ଚ ମାଧ୍ୟମିକ ଅଧ୍ୟକ୍ଷ ଓ ଏଡିଇଓ ସମ୍ମିଳନୀ ଉଦ୍ଯାପିତ ହୋଇଯାଇଛି । ଉଦ୍ଯାପନୀ ଉତ୍ସବରେ ଯୋଗଦେଇ ମୁଖ୍ୟମନ୍ତ୍ରୀଙ୍କ ଶିକ୍ଷା ପରାମର୍ଶଦାତା ଶ୍ରୀ ଉପେନ୍ଦ୍ର ତ୍ରିପାଠୀ ‘ଏଡୁ ଇନ୍ଭେଷ୍ଟ ୨୦୨୩’ ଉପରେ ଆଲୋକପାତ କରିବା ସଙ୍ଗେ ସଙ୍ଗେ ବିଦ୍ୟାଳୟର ଫଳାଫଳ ସମୀକ୍ଷା ଆଗକୁ ବଢ଼ିବା ପାଇଁ ବାଟ ଦେଖାଏ ବୋଲି କହିଥିଲେ । ଅଧ୍ୟକ୍ଷମାନେ ନିଜ ନିଜ ବିଦ୍ୟାଳୟର ଅଭିନବ ପଦକ୍ଷେପଗୁଡ଼ିକ ପ୍ରଦର୍ଶନ ପାଇଁ ସଜେଇ ରଖିବାକୁ ସେ ପରାମର୍ଶ ଦେଇଥିଲେ ।
ଉତ୍ସବର ଅନ୍ୟତମ ଅତିଥି ଉନ୍ନୟନ କମିଶନର ତଥା ଅତିରିକ୍ତ ମୁଖ୍ୟ ଶାସନ ସଚିବ ଶ୍ରୀ ପ୍ରଦୀପ କୁମାର ଜେନା ଗୁରୁଶିଷ୍ୟ ପରମ୍ପରା ଉପରେ ଆଲୋକପାତ କରି ନିଜ ଛାତ୍ରଜୀବନରେ କେତେକ ବିରଳ ଅନୁଭୂତି ବାଣ୍ଟିଥିଲେ ଓ ଜଣେ ଗୁରୁ କିପରି ଛାତ୍ରଜୀବନରେ କେତେକ ବିରଳ ଅନୁଭୂତି ବାଣ୍ଟିଥିଲେ ଓ ଜଣେ ଗୁରୁ କିପରି ଛାତ୍ରଜୀବନକୁ ପ୍ରଭାବିତ କରିପାରେ ସେ ବିଷୟରେ ଅବତାରଣା କରିଥିଲେ । ଶିକ୍ଷକମାନେ ଛାତ୍ର ପାଇଁ ରୋଲ ମଡେଲ ହେବା ସଂଗେ ସଂଗେ ନିଜର ଆତ୍ମସମୀକ୍ଷା କରି ନିଜେ ଆଗକୁ ବଢିବା ପାଇଁ ପ୍ରେରଣା ଦେଇଥିଲେ ।
ସମ୍ପ୍ରତି ଓଡ଼ିଶାର ପିଲାମାନେ କିପରି ବିଭିନ୍ନ ଶିକ୍ଷାକ୍ଷେତ୍ରରେ ସର୍ବଭାରତୀୟ ସ୍ତରରେ ଆଗୁଆ ହେବେ ସେଦିଗରେ ପ୍ରୟାସ କରିବା ପାଇଁ ସେ ଅଧ୍ୟକ୍ଷମାନଙ୍କୁ ଆହ୍ୱାନ ଦେଇଥିଲେ । ଅତିଥିମାନଙ୍କୁ ସ୍ୱାଗତ ଜଣାଇବା ସଂଗେ ସଂଗେ DIET -CRCC ସଂଯୋଗ ପରି ଏହି ସମ୍ମିଳନୀ ଅଧ୍ୟକ୍ଷ ଓ ଏଡିଇଓ ସଂଯୋଗ ପାଇଁ ମୂଳଦୁଆ ସ୍ଥାପନ କରିବା ସଂଗେ ସଂଗେ ଶିକ୍ଷା କ୍ଷେତ୍ରରେ ଆଗକୁ ମିଳିତ ପ୍ରୟାସରେ ବହୁକାର୍ଯ୍ୟକ୍ରମ ହାତକୁ ନିଆଯିବ ବୋଲି ଓସେପାର ରାଜ୍ୟ ପ୍ରକଳ୍ପ ନିର୍ଦ୍ଦେଶକ ଶ୍ରୀ ଅନୁପମ ସାହା କହିଥିଲେ ।
ସମ୍ମିଳନୀର ଦ୍ୱିତୀୟ ଦିବସ ପ୍ରାରମ୍ଭରେ ଧନ୍ଦାମୂଳକ ଶିକ୍ଷାର ପୁନର୍ବିନ୍ୟାସ ଉପରେ ବିସ୍ତୃତ ଆଲୋଚନା ହୋଇଥିଲା । ପରେ ପରେ XIMB ର ପ୍ରଫେସର ଅମର ନାୟକ ବିଦ୍ୟାଳୟର ଶୈକ୍ଷିକ ବାତାବରଣ ନକ୍ସା ପ୍ରସ୍ତୁତି ପାଇଁ ମାନସ ମନ୍ଥନ କରାଇବା ସଂଗେ ଅଂଶଗ୍ରହଣକାରୀ ଅଧ୍ୟକ୍ଷ ଓ ଏଡିଇଓ ମାନଙ୍କର ନେତୃତ୍ୱ ବିକାଶ ଉପରେ ଆଲୋକପାତ କରିଥିଲେ ଓ ପରେ ଅଧ୍ୟକ୍ଷମାନେ ନିଜ ନିଜ ବିଦ୍ୟାଳୟ ପାଇଁ ଆଗାମୀ ଲକ୍ଷ୍ୟ ଧାର୍ଯ୍ୟ କରି ଏହାର ପରିପୂରଣ ଦିଗରେ ପ୍ରୟାସ କରିବାକୁ ସଂକଳ୍ପ ନେଇଥିଲେ ।
ଏହି କର୍ମଶାଳାରେ ଦୁଇଦିନ ଧରି ଉପସ୍ଥିତ ରହି ଶାସନ ସଚିବ ଶ୍ରୀମତୀ ଅଶ୍ୱଥି ଏସ ଅଂଶଗ୍ରହଣକାରୀମାନଙ୍କୁ ଉତ୍ସାହିତ କରିବା ସଂଗେ ସଂଗେ ନିଜ କର୍ମକ୍ଷେତ୍ରକୁ ଅଧିକ କ୍ରିୟାଶୀଳ କରିବା ପାଇଁ ପ୍ରେରଣା ଦେଇଥିଲେ ଓ ଆଗାମୀ ୩ ମାସ ପରେ ଧାର୍ଯ୍ୟ ଲକ୍ଷ୍ୟ ଦିଗରେ ପୁନଃସମୀକ୍ଷା ପାଇଁ ଆହ୍ୱାନ ଦେଇଥିଲେ । ପରିଶେଷରେ ସମ୍ମିିଳନୀର ସଫଳତା ପାଇଁ ସମସ୍ତ ଅତିଥିବୃନ୍ଦ ଓ ଅଂଶଗ୍ରହଣକାରୀମାନଙ୍କୁ ନିର୍ଦ୍ଦେଶକ ଶ୍ରୀ ରଘୁରାମ ଆୟାର ଧନ୍ୟବାଦ ଦେବା ସଙ୍ଗେ ସଂଗେ ଏହିପରି ଶିକ୍ଷା ସମ୍ମିଳନୀ ଆଗାମୀ ଦିନରେ ବାରମ୍ବାର ଆୟୋଜନ ହେବ ବୋଲି ସୂଚନା ଦେଇଥିଲେ ।
ଅନ୍ୟମାନଙ୍କ ମଧ୍ୟରେ ଉଚ୍ଚମାଧ୍ୟମିକ ଶିକ୍ଷା ପରିଷଦର ଅଧ୍ୟକ୍ଷ ଶ୍ରୀ ଅଶ୍ୱିନୀ ମିଶ୍ର , ସ୍ୱତନ୍ତ୍ର ଶାସନ ସଚିବ ଶ୍ରୀମତୀ ଶୁଭଶ୍ରୀ ନନ୍ଦ, କଳାହାଣ୍ଡି ବିଶ୍ୱବିଦ୍ୟାଳୟର କୁଳପତି ଶ୍ରୀ ସଞ୍ଜୟ ଶତପଥୀ ଆଦି ଅତିଥିବୃନ୍ଦ ଉପସ୍ଥିତ ରହି ଦିଗଦର୍ଶନ ଦେଇଥିଲେ ।
