ନରେନ୍ଦ୍ର ମୋଦିଙ୍କ ନେତୃତ୍ବରେ ଏନ୍ଡିଏ ଅଦ୍ଭୂତପୂର୍ବ ବିଜୟ ହାସଲ କରିବା ପରେ ଆନ୍ତର୍ଜାତୀୟ ନେତୃବୃନ୍ଦଙ୍କ ପକ୍ଷରୁ ମୋଦିଙ୍କ ନିମନ୍ତେ ଶୁଭେଚ୍ଛାର ଶୁଅ ଛୁଟିଛି । ବିଜେପି ନେତୃତ୍ବାଧୀନ ଏନ୍ଡିଏ ପ୍ରାୟ 340 ରୁ ଅଧିକ ଆସନରେ ବିଜୟୀ ହୋଇଛି। ମୋଦିଙ୍କ ଏହି ଅଦ୍ଭୂତପୂର୍ବ ବିଜୟ ପରେ ଋଷିଆ ରାଷ୍ଟ୍ରପତି ଭ୍ଲାଦିମିର୍ ପୁତିନ୍, ଚୀନ୍ ରାଷ୍ଟ୍ରପତି ଜି ଜିନ୍ପିଙ୍ଗ, ଇସ୍ରାଏଲ୍ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତନ୍ୟାହୁ, ଭୁଟାନ୍ ପ୍ରଧାନମନ୍ତ୍ରୀ ଲୋଟେ ସେରିଂ , ଶ୍ରୀଲଙ୍କା ପ୍ରଧାନମନ୍ତ୍ରୀ ରେନିଲ୍ ଓ୍ବିକ୍ରମସିଂ ଏବଂ ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ୍ ଖାନ୍ ପ୍ରମୁଖ ଶୁଭେଚ୍ଛା ଜଣାଇଥିଲେ । ଋଷ ରାଷ୍ଟ୍ରପତି ପୁତିନ ଫୋନ୍ ଯୋଗେ ମୋଦିଙ୍କୁ ଶୁଭେଚ୍ଛା ଜଣାଇଥିବା ବେଳେ ଚୀନ୍ ରାଷ୍ଟ୍ରପତିଙ୍କ ତରଫରୁ ଚୀନ୍ ରାଷ୍ଟ୍ରଦୂତ ମୋଦିଙ୍କୁ ଶୁଭେଚ୍ଛା ଜଣାଇଥିଲେ । ମୋଦିଙ୍କୁ ସର୍ବପ୍ରଥମେ ଶୁଭେଚ୍ଛା ଜଣାଇଥିଲେ ନେତନ୍ୟାହୁ । ଆପଣଙ୍କର ଅବିଶ୍ବସନୀୟ ନିର୍ବାଚନୀ ବିଜୟ ପାଇଁ ମୁଁ ଆପଣଙ୍କୁ ଶୁଭେଚ୍ଛା ଜଣାଇବାକୁ ଚାହୁଁଛି ବୋଲି ନେତନ୍ୟାହୁ ଟ୍ବିଟ୍ଟର ଜରିଆରେ ସେୟାର କରିଥିଲେ । ଏକତ୍ର ହୋଇ ଆମ୍ଭେ ଭାରତ ଏବଂ ଇସ୍ରାଏଲର ବନ୍ଧୁତ୍ବକୁ ଅଲଗା ସ୍ତରକୁ ନେବା ବୋଲି ନେତନ୍ୟାହୁ କହିଥିଲେ । ଜାପାନ୍ର ପ୍ରଧାନମନ୍ତ୍ରୀ ଆବେ ସିଞ୍ଜୋ ମଧ୍ୟ ଫୋନ୍ କରି ମୋଦିଙ୍କୁ ଶୁଭେଚ୍ଛା ଜଣାଇଛନ୍ତି । ପାକିସ୍ତାନ ରାଷ୍ଟ୍ରପତି ଆରିଫ୍ ଆଲ୍ଭି ଏବଂ ଇମ୍ରାନ୍ ଖାନ୍ ମଧ୍ୟ ଶୁଭେଚ୍ଛା ଜଣାଇଛନ୍ତି ।
