ଆସନ୍ତାକାଲି ମୋଦି ଦ୍ବିତୀୟ ଥର ପାଇଁ ଦେଶର ପ୍ରଧାନମନ୍ତ୍ରୀ ଭାବେ ଶପଥ ଗ୍ରହଣ ନେବେ। ମନ୍ତ୍ରୀ ପଦ ନେଇ ଚାଲିଛି ଅଟକଳ। କିଏ ପାଇବ ମନ୍ତ୍ରୀ ପଦ, କିଏ ବାଦ ପଡ଼ିବ! ତେବେ ଏହା ମଧ୍ୟରେ ଚର୍ଚ୍ଚାକୁ ଆସିଛି ଜେଟ୍ଲୀଙ୍କ ଚିଠି। ଅରୁଣ ଜେଟ୍ଲୀ ଚଳିତ ଥର ମୋଦିଙ୍କ କ୍ୟାବିନେଟ୍ରୁ ବାଦ ପଡ଼ିବା ନେଇ ପ୍ରସ୍ତାବ ରଖିଛନ୍ତି। ଅରୁଣ ଜେଟ୍ଲୀ ଗତଥର ନରେନ୍ଦ୍ର ମୋଦି ସରକାରରେ ଅର୍ଥ ମନ୍ତ୍ରୀ ଥିଲେ। ହେଲେ ସେ ଏଥର କ୍ୟାବିନେଟରେ ନ ରହିବାକୁ ନିଷ୍ପତ୍ତି ନେଇଛନ୍ତି। ଏ ନେଇ ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଏକ ଚିଠି ଲେଖି ଦେହ ଅସୁସ୍ଥତା କାରଣରୁ ସେ କ୍ୟାବିନେଟ ଦାୟିତ୍ୱ ତୁଲାଇ ପାରିବେ ନାହିଁ। ପ୍ରଧାନମନ୍ତ୍ରୀଙ୍କୁ ଲେଖିଥିବା ଏହି ଚିଠିକୁ ସେ ଟ୍ୱିଟରେ ସେୟାର ମଧ୍ୟ କରିଛନ୍ତି। ଅର୍ଥମନ୍ତ୍ରୀଙ୍କ ଅଫିସିଆଲ ପ୍ୟାଡ୍ରେ ଜେଟ୍ଲି ଲେଖିଛନ୍ତି ଯେ, କିନ୍ତୁ ଦୀର୍ଘ ୧୮ ମାସ ହେବ ସ୍ୱାସ୍ଥ୍ୟ ସମସ୍ୟା ଲାଗି ରହିଛି। ଏହା ମଧ୍ୟରେ ସେ ଆଉ କୌଣସି ଦାୟିତ୍ୱ ତୁଲାଇ ପାରିବେ ନାହିଁ ବୋଲି ଚିଠି ଦ୍ୱାରା କହିଛନ୍ତି। ଜେଟ୍ଲୀ ଟ୍ୱିଟ୍ରରେ ମଧ୍ୟ ଚିଠିକୁ ପୋଷ୍ଟ କରିଛନ୍ତି। ଚିଠିରେ ପ୍ରଧାନମନ୍ତ୍ରୀଙ୍କ ନିକଟରେ ନିଜର କୃତଜ୍ଞତା ପ୍ରକାଶ କରି କହିଛନ୍ତି, ତାଙ୍କ ନେତୃତ୍ୱରେ ଦେଶ ବିକାଶ ଆଡକୁ ଅଗ୍ରସର ହୋଇଛି। ଦଳରେ ତାଙ୍କୁ ବହୁ ଗୁରୁତ୍ୱପୂର୍ଣ୍ଣ ଦାୟିତ୍ୱ ଦିଆଯାଇଥିଲା। କ୍ଷମତାରେ ଥିବାବେଳେ ମନ୍ତ୍ରୀପଦ ମିଳିଥିଲା। ବିରୋଧୀ ଦଳରେ ଥିବାବେଳେ ବେଳେ ମଧ୍ୟ ତାଙ୍କୁ ଗୁରୁ ଦାୟିତ୍ୱ ଦିଆଯାଇଥିଲା। ପେଶାରେ ଓକିଲ ଥିବା ଜେଟ୍ଲୀ ବିଜେପିର ଖରାପ ସମୟରେ ସଂକଟମୋଚକ ମଧ୍ୟ ସାଜିଛନ୍ତି।
