ନୂଆଦିଲ୍ଲୀ: ଆସନ୍ତା ବର୍ଷ ପ୍ରଥମ ତ୍ରୈମାସିକରେ ଭାରତ ଓ ଆମେରିକା ପୃଥିବୀ ପର୍ଯ୍ୟବେକ୍ଷଣ ପାଇଁ ମିଳିତ ମାଇକ୍ରୋୱେଭ ରିମୋଟ୍ ସେନ୍ସିଂ ଉପଗ୍ରହ ଉତ୍କ୍ଷେପଣ କରିବେ ବୋଲି କେନ୍ଦ୍ର ମନ୍ତ୍ରୀ ଡକ୍ଟର ଜିତେନ୍ଦ୍ର ସିଂହ ନାସାର ପ୍ରଶାସକ ବିଲ୍ ନେଲସନଙ୍କ ନେତୃତ୍ୱରେ ନାସାର ଏକ ଉଚ୍ଚସ୍ତରୀୟ ପ୍ରତିନିଧି ଦଳ ସହ ଏକ ବୈଠକ ଅବସରରେ କହିଛନ୍ତି।
ଭାରତର ଜିଏସ୍ଏଲ୍ଭିରେ ନିସାର ଉତ୍କ୍ଷେପଣ ପାଇଁ ଲକ୍ଷ୍ୟ ରଖାଯାଇଛି। ଆଞ୍ଚଳିକରୁ ବିଶ୍ୱସ୍ତରରେ ଭୂମି ପାରିବେଶିକ ବ୍ୟବସ୍ଥା, ପୃଥିବୀର କଠିନ ସ୍ଥାନ, ପର୍ବତ ଓ ପୋଲାର କ୍ରାୟୋସ୍ଫିୟର, ସମୁଦ୍ର ବରଫ ଏବଂ ଉପକୂଳ ମହାସାଗରର ସ୍ଥିତି ଅଧ୍ୟୟନ ପାଇଁ ନିସାରର ତଥ୍ୟ ଅତ୍ୟନ୍ତ ଉପଯୁକ୍ତ ହେବ।
ସୂଚନା ଅନୁଯାୟୀ, ଇସ୍ରୋର ଏସ - ବ୍ୟାଣ୍ଡ ଏସ୍ଏଆରକୁ ଜେପିଏଲ୍ / ନାସାରେ ନାସାର ଏଲ୍ – ବ୍ୟାଣ୍ଡ ଏସ୍ଏଆର୍ ସହ ସଂଯୁକ୍ତ କରାଯାଇଥିଲା ଏବଂ ଏକୀକୃତ ଏଲ୍ ଆଣ୍ଡ୍ ଏସ୍ ବ୍ୟାଣ୍ଡ୍ ଏସ୍ଏଆର ବର୍ତ୍ତମାନ ନାସା / ଜେପିଏଲ୍ ଅଧିକାରୀଙ୍କ ଭାଗିଦାରୀରେ ବାଙ୍ଗାଲୋରର ୟୁଆଏସ୍ସି ଠାରେ ଉପଗ୍ରହ ସହ ପରୀକ୍ଷଣ ଚାଲିଛି।
ଚନ୍ଦ୍ରର ଦକ୍ଷିଣ ମେରୁ ଅଞ୍ଚଳରେ ଐତିହାସିକ ଚନ୍ଦ୍ରାୟନ – ୩ ଅବତରଣ ପାଇଁ ଡକ୍ଟର ଜିତେନ୍ଦ୍ର ସିଂହଙ୍କୁ ଅଭିନନ୍ଦନ ଜଣାଇ ଶ୍ରୀ ନେଲସନ୍ ନାସା ରକେଟ୍ରେ ଭାରତର ପ୍ରଥମ ମହାକାଶଚାରୀଙ୍କ ସହ ଜଡ଼ିତ କାର୍ଯ୍ୟକ୍ରମକୁ ଅନ୍ତର୍ଜାତୀୟ ମହାକାଶ ଷ୍ଟେସନ (ଆଇଏସ୍ଏସ୍) କୁ ତ୍ୱରାନ୍ୱିତ କରିବା ପାଇଁ ଡକ୍ଟର ଜିତେନ୍ଦ୍ର ସିଂହଙ୍କୁ ଅନୁରୋଧ କରିଥିଲେ। ଚଳିତ ବର୍ଷ ପ୍ରାରମ୍ଭରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଆମେରିକା ଗସ୍ତ ସମୟରେ ଉଭୟ ପକ୍ଷ ଆସନ୍ତା ବର୍ଷ ଦୁଇ ସପ୍ତାହର ମିଳିତ ଭାରତ – ଆମେରିକା ମହାକାଶ ବିମାନ ଉଡ଼ାଣ ଆରମ୍ଭ କରିବାକୁ ରାଜି ହୋଇଥିଲେ। ନାସା ୨୦୨୪ରେ ଭାରତୀୟ ମହାକାଶଚାରୀ ମାନଙ୍କ ପାଇଁ ଘରୋଇ ମହାକାଶଚାରୀ ଅଭିଯାନରେ ଏକ ସୁଯୋଗକୁ ଚିହ୍ନଟ କରୁଛି।
ଇସ୍ରୋ ଏବଂ ନାସା ମାନବ ମହାକାଶ ଯାତ୍ରା ସହଯୋଗ ଉପରେ ଏକ ଯୁଗ୍ମ କାର୍ଯ୍ୟକାରୀ ଗୋଷ୍ଠୀ (ଜେଡବ୍ଲୁଜି) ଗଠନ କରିଛନ୍ତି ଏବଂ ବିକିରଣ ପ୍ରଭାବ ଅଧ୍ୟୟନ, ଅତି କ୍ଷୁଦ୍ର ଉଲ୍କାପିଣ୍ଡ ଏବଂ କକ୍ଷପଥ ଆବର୍ଜନା ସୁରକ୍ଷା ଢାଲ ସମ୍ପର୍କରେ ଅଧ୍ୟୟନ, ମହାକାଶ ସ୍ୱାସ୍ଥ୍ୟ ଏବଂ ଔଷଧ କ୍ଷେତ୍ରରେ ଅଧ୍ୟୟନ କ୍ଷେତ୍ରରେ ସହଯୋଗ ଉପରେ ଅନୁସନ୍ଧାନ କରୁଛନ୍ତି। ବେସାମରିକ ମହାକାଶ ସହଯୋଗ ଉପରେ ଭାରତ – ଆମେରିକା ଯୁଗ୍ମ କାର୍ଯ୍ୟକାରୀ ଗୋଷ୍ଠୀ (ସିଏସଜେଡବ୍ଲ୍ୟୁଜି) ର ଅଷ୍ଟମ ବୈଠକ ଜାନୁଆରି ୨୦୨୩ ରେ ୱାଶିଂଟନ୍ ଡିସିରେ ଅନୁଷ୍ଠିତ ହୋଇଥିଲା।
ଇସ୍ରୋ/ଡିଓଏସ୍ ଆମେରିକାର ପ୍ରମୁଖ ଉଦ୍ୟୋଗ (ଯେପରିକି ବୋଇଂ, ବ୍ଲୁ ଓରିଜିନ୍ ଏବଂ ଭୋଏଜର) ସହ ସହଯୋଗର ନିର୍ଦ୍ଦିଷ୍ଟ ସାମଗ୍ରୀ ଏବଂ ଭାରତୀୟ ବାଣିଜ୍ୟିକ ସଂସ୍ଥା ମାନଙ୍କ ସହ ମିଳିତ ସହଯୋଗର ଅନୁସନ୍ଧାନ ପାଇଁ ମଧ୍ୟ ଆଲୋଚନା କରୁଛି।
ଭାରତୀୟ ପକ୍ଷ ସୂଚନା ଦେଇଛନ୍ତି ଯେ ଇସ୍ରୋ ଏବଂ ନାସା ମଧ୍ୟରେ କାର୍ଯ୍ୟକାରୀ ବ୍ୟବସ୍ଥା (ଆଇଏ) ଉପରେ ଏକ ଅବଧାରଣା ପତ୍ର ଉପରେ ବିଚାର ଚାଲିଛି। କିଛି ପରିବର୍ତ୍ତନ କରାଯିବା ପରେ ଉଭୟ ପକ୍ଷ ପାରସ୍ପରିକ ସହମତି କ୍ରମେ ଏକ ଡ୍ରାଫ୍ଟରେ ପହଞ୍ଚିଥାନ୍ତି ଏବଂ ଏହାକୁ ଆନ୍ତଃ – ସରକାରୀ ଅନୁମୋଦନ ପାଇଁ ପ୍ରକ୍ରିୟା କରାଯାଇଥାଏ।
ଇସ୍ରୋ ଗଗନାୟନ ମଡ୍ୟୁଲ୍ ମାଇକ୍ରୋମେଟୋରଏଡ୍ ଆଣ୍ଡ ଅର୍ବିଟାଲ୍ ଡେବରିଜ୍ (ଏମ୍ଏମ୍ଓଡି) ସୁରକ୍ଷା ଢାଲ ପରୀକ୍ଷା ପାଇଁ ନାସାର ହାଇପରଭେଲୋସିଟି ଇମ୍ପ୍ୟାକ୍ଟ ଟେଷ୍ଟ (ଏଚ୍ଭିଆଇଟି) ସୁବିଧାର ଉପଯୋଗ କରିବାର ସମ୍ଭାବ୍ୟତା ଉପରେ ଅନୁସନ୍ଧାନ କରୁଛି।
ଡକ୍ଟର ଜିତେନ୍ଦ୍ର ସିଂହ କହିଛନ୍ତି ଯେ ପ୍ରଧାନମନ୍ତ୍ରୀ ମୋଦୀ ମହାକାଶ କ୍ଷେତ୍ରରେ ସଂସ୍କାର ଆରମ୍ଭ କରିବା ପର ଠାରୁ ଭାରତରେ ମହାକାଶ କ୍ଷେତ୍ରର ଷ୍ଟାର୍ଟଅପ୍ ସଂଖ୍ୟା ବୃଦ୍ଧି ପାଇବାରେ ଲାଗିଛି। ମାତ୍ର ୪ ବର୍ଷର ଅଳ୍ପ ସମୟ ମଧ୍ୟରେ ମହାକାଶ ସମ୍ପର୍କିତ ଷ୍ଟାର୍ଟଅପ୍ ସଂଖ୍ୟା ମାତ୍ର ଏକ ଅଙ୍କରୁ ୧୫୦କୁ ବୃଦ୍ଧି ପାଇଛି ଏବଂ ପୂର୍ବର କିଛି ଷ୍ଟାର୍ଟଅପ୍ ଲାଭଜନକ ଉଦ୍ୟୋଗରେ ପରିଣତ ହୋଇଛି।
୧୯୮୬ ମସିହାରେ ‘କଲମ୍ବିଆ’ ରେ ୨୪ତମ ସ୍ପେସ୍ ଶଟଲ୍ ଉଡ଼ାଣର କର୍ମଚାରୀ ମାନଙ୍କ ସହ ଉଡ଼ାଣ କରିଥିବା ମହାକାଶଚାରୀ ଶ୍ରୀ ନେଲସନ ପୋଲାର ସାଟେଲାଇଟ୍ ଲଞ୍ଚ ଭେଇକିଲ୍ (ପିଏସ୍ଏଲ୍ଭି) ରେ ଆମେରିକାରୁ ୨୩୧ଟି ଉପଗ୍ରହ ଉତକ୍ଷେପଣ କରିଥିବାରୁ ଇସ୍ରୋକୁ ପ୍ରଶଂସା କରିଥିଲେ।
ଆସନ୍ତାକାଲି ବେଙ୍ଗାଲୁରୁ ଠାରେ ଭାରତର ମହାକାଶଚାରୀ ରାକେଶ ଶର୍ମାଙ୍କୁ ଭେଟିବାକୁ ସେ ଆଗ୍ରହୀ ବୋଲି ଶ୍ରୀ ନେଲସନ କହିଛନ୍ତି।
ଏହି ବୈଠକରେ ଭାରତରେ ଅବସ୍ଥାପିତ ଆମେରିକା ରାଷ୍ଟ୍ରଦୂତ ଏରିକ୍ ଗାରସେଟି ମଧ୍ୟ ଉପସ୍ଥିତ ଥିଲେ।