୪୪ ବର୍ଷ ବୟସରେ ପାଦ ଥାପିଛନ୍ତି ବଲିଉଡ୍ ଅଭିନେତ୍ରୀ କରିସ୍ମା କପୁର୍ । ୯୦ଦଶକର ଲୋକପ୍ରିୟ ଅଭିନେତ୍ରୀ କରିସ୍ମା କପୁର୍ ଜୁନ୍ ୨୫, ୧୯୭୪ରେ ଜନ୍ମଗ୍ରହଣ କରିଥିଲେ । କପୁର୍ ପରିବାରର ପ୍ରଥମ ଝିଅ ଭାବେ କରିସ୍ମା ବଲିଉଡ୍ରେ ପ୍ରବେଶ କରିଥିଲେ । ୧୯୯୧ରେ ମାତ୍ର ୧୫ ବର୍ଷ ବୟସରେ ‘ପ୍ରେମ କଏଦୀ’ ଜରିଆରେ ବଲିଉଡ୍ ପାଦ ଥାପି ଥିବା କରିସ୍ମା ଅନେକଗୁଡ଼ିଏ ସୁପରହିଟ୍ ଫିଲ୍ମ ଦେଇଛନ୍ତି । ତାଙ୍କ ହିଟ୍ ଚଳଚ୍ଚିତ୍ର ମଧ୍ୟରେ ରହିଛି ‘ଜିଗର୍’, ‘ଅନାରି’, ‘ସାଜନ୍ ଚାଲେ ସସୁରାଲ୍’, ’ରାଜା ହିନ୍ଦୁସ୍ତାନୀ’, ‘ଦିଲ୍ ତୋ ପାଗଲ୍ ହୈ,’, ‘ହିରୋ ନଂ ଓ୍ବାନ୍’, ’ ବିଓ୍ବି ନଂ ଓ୍ବାନ୍’, ’ଜୁଡ୍ଓ୍ବା’, ‘ଦୁଲ୍ହନ୍ ହମ୍ ଲେ ଜାଏେଙ୍ଗ’, ‘ହମ୍ ସାଥ୍ ସାଥ୍ ହୈ’, ‘ଫିଜା’, ‘ଜୁବୈଦା’ ପ୍ରମୁଖ । ଅଭିନେତା ରଣଧୀର୍ କପୁର୍ ଓ ମାତା ବିବତାଙ୍କ ବଡ଼ ଝିଅ ହେଉଛନ୍ତି କରିସ୍ମା । ଫିଲ୍ମ ପରିବାରର ହୋଇଥିଲେ ମଧ୍ୟ ଫିଲ୍ମ ଦୁନିଆକୁ ଆସିବା ପାଇଁ ତାଙ୍କ ପିତା ଚାହୁଁନଥିଲେ । କିନ୍ତୁ ଫିଲ୍ମ ଦୁନିଆରେ ପାଦ ଥାପି ନିଜର ଏକ ସ୍ବତନ୍ତ୍ର ପରିଚୟ କରିଛନ୍ତି କରିସ୍ମା କପୁର୍ । ଅଭିନୟରେ ଯେତିକି ଚର୍ଚ୍ଚିତଥିଲେ, ନିଜ ରିଲ୍ ଲାଇଫ୍କୁ ନେଇ ମଧ୍ୟ ସେତିକି ଚର୍ଚ୍ଚିତ କରିସ୍ମା । ଜୁନିଅର୍ ବି ଅର୍ଥାତ୍ ଅଭିଷେକ ବଚ୍ଚନଙ୍କ ସହ ସମ୍ପର୍କକୁ ନେଇ ବେଶ୍ ଚର୍ଚ୍ଚାରେ ରହିଥିଲେ କରିସ୍ମା । ଶୁଣିବାକୁ ମିଳିଥିଲା ଯେ ଉଭୟ କାଳେ ନିର୍ବନ୍ଧ କରିଛନ୍ତି । କିନ୍ତୁ ଅଭିଷେକଙ୍କ ସହ ସମ୍ପର୍କକୁ କାଟି ସଞ୍ଜୟ କପୁର୍ଙ୍କୁ ବିବାହ କରିଥିଲେ । କିନ୍ତୁ ଏହି ବିବାହ ବେଶି ଦିନ ତିଷ୍ଠି ପାରିନାହିଁ । ଏବେ ସଞ୍ଜୟଙ୍କଠୁ ଡିଭୋର୍ସ ନେଇ ଅଲଗା ରହୁଛନ୍ତି କରିସ୍ମା । ତାଙ୍କର ଗୋଟିଏ ପୁଅ ଓ ଗୋଟିଏ ଝିଅ ଅଛନ୍ତି । ଏବେ ଏକତା କପୁର୍ଙ୍କ ‘ମେଣ୍ଟାଲ୍ ହୁଡ୍’ ଜରିଆରେ ଡିଜିଟାଲ୍ ଡେବ୍ୟୁ କରିବାକୁ ପ୍ରସ୍ତୁତ ହେଉଛନ୍ତି କରିସ୍ମା ।
