ବାଲୁଗାଁ (ସୀତାରାମ ଅଗ୍ରୱାଲ): ଚିଲିକା- ବାଲୁଗାଁ ରୋଟାରୀ କ୍ଲବର ନବମ ଅଧିଷ୍ଠାନ ଦିବସ ତଥା ରାଷ୍ଟ୍ର ନିର୍ମାତା ପୁରସ୍କାର ପ୍ରଦାନ ସମାରୋହ ଅବସରରରେ ଶିକ୍ଷକମାନେ ହିଁ ଶ୍ରେଷ୍ଠ ରାଷ୍ଟ୍ର ନିର୍ମାତା ବୋଲି ଅତିଥି ମାନେ ମତ ବ୍ୟକ୍ତ କରିଛନ୍ତି। ବାଲୁଗାଁ ଦିଗନ୍ତିକା ହୋଟେଲ ପରିସରରେ ଆଜି ଅନୁଷ୍ଠିତ ନବମ ଅଧିଷ୍ଠାନ ଉତ୍ସବରେ ମୁଖ୍ୟ ଅତିଥିଭାବେ ପୂର୍ବତନ ରୋଟାରୀ ଜିଲ୍ଲା ଗଭର୍ଣ୍ଣର ଶିବବ୍ରତ ଦାଶ, ମୁଖ୍ୟବକ୍ତା ଭାବେ ରୋଟାରୀ ଜିଲ୍ଲାର ଆଗାମୀ ଗଭର୍ଣ୍ଣର ମନୋଜ କୁମାର ତ୍ରିପାଠୀ ଯୋଗଦେଇ ଥିଲେ।
ପ୍ରାରମ୍ଭରେ ପୂର୍ବତନ ସଭାପତି ରୋଟାରୀଆନ ଡକ୍ଟର କୈଳାସ ଚନ୍ଦ୍ର ମହାରଣା ସମସ୍ତ ଅତିଥିମାନଙ୍କୁ ସ୍ୱାଗତ କରିବା ପରେ ମା ଭଗବତୀ କଳା ନିକେତନର ଶିଶୁ କଳାକାରମାନେ ଓଡିଶୀ ନୃତ୍ୟ ପରିବେଷଣ କରି ଥିଲେ। ଏହାପରେ ଅତିଥିମାନେ ଜଗତର ନାଥ ଶ୍ରୀଜଗନ୍ନାଥ ଓ ରୋଟାରୀ ଇଣ୍ଟରନ୍ୟାସନାଲ ପ୍ରତିଷ୍ଠାତା ପଲ ହରିଶଙ୍କୁ ପୁଷ୍ପ ଅର୍ପଣ କରିବା ସହ ପ୍ରଦୀପ ପ୍ରଜ୍ଵଳନ କରି ସମାରୋହ ଉଦଘାଟନ କରିଥିଲେ।
ଏହି ଅବସରରେ ପୂର୍ବତନ କ୍ଲବ ସଭାପତି ଅକ୍ଷୟ କୁମାର ମହାପାତ୍ର ଓ ସମ୍ପାଦକ ତ୍ରିଲୋଚନ ବାରିକ ଗତ ରୋଟାରୀ ବର୍ଷର ଉଲ୍ଲେଖନୀୟ କାର୍ଯ୍ୟକ୍ରମ ସମ୍ପର୍କରେ ଉପସ୍ଥlପିତ କରିଥିଲେ। ଚଳିତ ବର୍ଷର ନୂତନ ରୋଟାରୀ ସଭାପତି ଡକ୍ଟର ମାନସ ମୋହନ ବଳିୟାରସିଂହ ଓ ସମ୍ପାଦକ ଗଜେନ୍ଦ୍ର ସେଠି ପ୍ରସ୍ତାବିତ କାର୍ଯ୍ୟସୂଚୀ ସମ୍ପର୍କରେ ବିସ୍ତୃତ ସୂଚନା ପ୍ରଦାନ କରିଥିଲେ। ଏହାପରେ ପୂର୍ବତନ ସଭାପତି ଓ ସମ୍ପାଦକ ନୂତନ ସଭାପତି ଡକ୍ଟର ମାନସ ମୋହନ ବଳିୟାରସିଂହ ଓ ସମ୍ପାଦକ ଗଜେନ୍ଦ୍ର ସେଠିଙ୍କୁ ଦାୟିତ୍ୱ ହସ୍ତାନ୍ତର କରି ନୂତନ ପଦବୀରେ ଆନୁଷ୍ଠାନିକ ଭାବେ ଅଧିଷ୍ଠିତ କରାଇବା ସହ ସମ୍ବର୍ଦ୍ଧିତ କରିଥିଲେ। ଏହାପରେ ନୂତନ ରୋଟାରାକ୍ଟ ସଭାପତି ଭାବେ ନିବେଦିତା ଜେନା ଓ ସମ୍ପାଦକ ଭାବେ ରିତାଞ୍ଜଳୀ ଜାଲିଙ୍କୁ ମୁଖ୍ୟ ଅତିଥି ଦାୟିତ୍ୱ ପ୍ରଦାନ କରିଥିଲେ।
ମୁଖ୍ୟ ଅତିଥି ଶିବବ୍ରତ ଦାଶ ଓ ମୁଖ୍ୟବକ୍ତା ମନୋଜ କୁମାର ତ୍ରିପାଠୀ ରୋଟାରୀ କ୍ଲବର ଆଭିମୁଖ୍ୟ, ଉଦ୍ଦେଶ୍ୟ, ଅଞ୍ଚଳ ଓ ବିଶ୍ୱ ପାଇଁ ଥିବା ପ୍ରତିବଦ୍ଧତା ଉଲ୍ଲେଖ କରିବା ସହ ଚଳିତ ବର୍ଷ ରାଷ୍ଟ୍ର ନିର୍ମାତା ପୁରସ୍କାର ପାଇଁ ଯୋଗ୍ୟତା ହାସଲ କରିଥିବାଙ୍କୁ ସମ୍ବୋଧିତ କରି କହିଲେ ଯେ ଶିକ୍ଷକ ମାନେ ହେଉଛନ୍ତି ରାଷ୍ଟ୍ରର ଯଥାର୍ଥ ନିର୍ମାତା। ସେଥିପାଇଁ ପ୍ରତ୍ୟେକ ଶିକ୍ଷକ ପ୍ରତି ସମୟରେ ନୂତନ ଶିକ୍ଷା ଗ୍ରହଣ କରିବା ସହ ଶିକ୍ଷାର୍ଥୀଙ୍କ ହୃଦୟ ସହ ସଂଯୁକ୍ତ ହୋଇପାରିଲେ ସେମାନଙ୍କ ମଧ୍ୟରେ ଥିବା ଲୁକ୍କାୟିତ ପ୍ରତିଭାର ଉନ୍ମୋଚନ ହୋଇପାରିବ।
ଏହାପରେ ଅତିଥିମାନେ ଚିଲିକା ଓ ବାଣପୁର ବ୍ଲକର ଆଦର୍ଶ ଶିକ୍ଷକ ଭାବେ ଆଲୋକ କୁମାର ପାଟଶାଣୀ, ନିରୋଦ ପ୍ରସାଦ ସାମନ୍ତରାୟ, ସୁରେଶ ଚନ୍ଦ୍ର ସ୍ୱାଇଁ,ଜୟକୃଷ୍ଣ ଜେନା, ଜିତେନ୍ଦ୍ର ମାନସିଂହ ଓ ଅମର ପ୍ରସାଦ ତରାଇ ଙ୍କୁ ଚଳିତ ବର୍ଷର ରାଷ୍ଟ୍ର ନିର୍ମାତା ପୁରସ୍କାର ଓ ସମ୍ବର୍ଦ୍ଧନା ପ୍ରଦାନ କରିଥିଲେ। ଏଥିସହିତ ନୂତନ ରୋଟାରୀଆନ ଭାବେ ଯୋଗଦେଇଥିବା କୈଳାସ ଚନ୍ଦ୍ର ସାହୁ, ନିରୋଦ ପ୍ରସାଦ ସାମନ୍ତରାୟ ଓ ଆଲୋକ କୁମାର ପାଟଶାଣୀଙ୍କୁ ଅତିଥିମାନେ ସମ୍ବର୍ଦ୍ଧିତ କରିଥିଲେ।
ଏହି ଅଧିଷ୍ଠାନ ସମାରୋହକୁ ପୂର୍ବତନ କ୍ଲବ ସଭାପତି ଜାନକୀ ବଲ୍ଲଭ ପଟ୍ଟନାୟକ,ସତ୍ୟନ୍ଦ୍ର ସ୍ୱାଇଁ, ନମିତା ଝା, ନିରଜ ଝା, ଯଦୁମଣି ତରାଇ, ସବିତା ପାତ୍ର, ଭାଗିରଥି ସ୍ୱାଇଁ ପ୍ରମୁଖ ପରିଚାଳନା କରିଥିଲେ। ମଞ୍ଚ ସଂଯୋଜନା କରିଥିଲେ ଡକ୍ଟର କୈଳାସ ଚନ୍ଦ୍ର ମହାରଣା lଧନ୍ୟବାଦ ଅର୍ପଣ କରିଥିଲେ ରୋଟାରୀଆନ ଯଦୁମଣି ତରାଇ।