ଚଳିତ ସରକାରର ପୂର୍ଣ୍ଣାଙ୍ଗ ବଜେଟ ଶୁକ୍ରବାର ଲୋକସଭାରେ ଉପସ୍ଥାପିତ ହୋଇଛି । କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ ବଜେଟ ଉପସ୍ଥାପନ କରିଛନ୍ତି। ପ୍ରଥମ ମହିଳା ଅର୍ଥମନ୍ତ୍ରୀ ଭାବରେ ବଜେଟ୍ ଉପସ୍ଥାପନ କରିଛନ୍ତି ନିର୍ମଳା ସୀତାରମଣ। ଏହା ସହିତ ପ୍ରଥମ ଥର ଲାଗି ଏଥର ବ୍ରିଫକେସ ବଦଳରେ ବହି-ଖାତାରେ ବଜେଟ ଉପସ୍ଥାପନ କରାଯାଇଛି। ଅର୍ଥମନ୍ତ୍ରୀ ସୀତାରମଣ ବିନା ବ୍ରିଫକେସ୍ରେ ସଂସଦକୁ ପ୍ରବେଶ କରିଥିଲେ । ବଜେଟ ଉପସ୍ଥାପନ ସମୟରେ ଅର୍ଥମନ୍ତ୍ରୀ କହିଥିଲେ, ଚଳିତ ନିର୍ବାଚନ ନୂଆ ଭାରତ ଗଠନ ପାଇଁ ଦିଶା ଦେଖାଇଛି। ଦେଶର ପ୍ରତ୍ୟେକ ନାଗରିକ ପରିବର୍ତ୍ତନ ଅନୁଭବ କରୁଛନ୍ତି। ବିଶ୍ବର ବିଶ୍ବର ଷଷ୍ଠ ବୃହତ୍ତମ ଅର୍ଥନୀତି ଭାରତ ଖୁବ୍ଶୀଘ୍ର ଏକ ପାଞ୍ଚ ଟ୍ରିଲିୟନ୍ ଅର୍ଥନୀତିର ରାଷ୍ଟ୍ର ଭାବରେ ପରିଗଣିତ ହେବ ବୋଲି ନିର୍ମଳା କହିଛନ୍ତି। ଦେଶବାସୀ ଦେଶକୁ ପ୍ରାଥମିକତା ଦେଇଛନ୍ତି । ସୁରକ୍ଷିତ ରାଷ୍ଟ୍ର ନିମନ୍ତେ ସୁରକ୍ଷିତ ନାଗରିକକୁ ସରକାର ସର୍ବଦା ପ୍ରାଥମିକତା ଦେଇଛନ୍ତି । ଅର୍ଥମନ୍ତ୍ରୀ କହିଥିଲେ, ପୂର୍ବ ବିଜେପି ସରକାର ସମୟରେ ଦେଶର ଅର୍ଥନୀତି 1.85 ଟ୍ରିଲିୟନ ଡଲାର ରହିଥିଲା। ବିଗତ 5ବର୍ଷ ମଧ୍ୟରେ ଏହା ବୃଦ୍ଧି ପାଇଁ 2.7 ଟ୍ରିଲିୟନ ଡଲାରରେ ପହଞ୍ଚିପାରିଛି। ଆଗାମୀ 5 ବର୍ଷ ମଧ୍ୟରେ ଦେଶକୁ 5 ଟ୍ରିଲିୟନ ଡଲାର ଅର୍ଥନୀତିରେ ପରିଣତ କରାଯିବାକୁ ଲକ୍ଷ୍ୟ ରହିଛି। ନିଯୁକ୍ତି ସୃଷ୍ଟି କରିବା ସରକାରଙ୍କ ମୂଳ ଲକ୍ଷ୍ୟ ହୋଇଛି।ମେକ୍ ଇନ୍ ଇଣ୍ଡିଆରୁ ଦେଶରେ ବ୍ୟବସାୟ ବଢ଼ିଛି ଭାରତ ଏବେ ନିଯୁକ୍ତି ପ୍ରଦାନକାରୀ ଦେଶ ପାଲଟିଛି, ଡିଜିଟାଲ୍ ଇଣ୍ଡିଆକୁ ସବୁ କ୍ଷେତ୍ରରେ ପହଞ୍ଚାଯିବ ଯାହା ଦ୍ବାରା ବୃହତ୍ତର ନିଯୁକ୍ତି ସୁଯୋଗ ସୃଷ୍ଟି ହେବ। ସେହିପରି ପ୍ରତ୍ୟକ୍ଷ ବିଦେଶୀ ପୁଞ୍ଜିନିବେଶକୁ ସରକାର ସର୍ବଦା ପ୍ରଧାନ୍ୟ ଦେଉଛନ୍ତି ଯାହାଦ୍ବାର ଦେଶର ଅର୍ଥନୀତି ଆଗକୁ ବଢୁଥିବା ବେଳେ ନିଯୁକ୍ତି ସୁଯୋଗ ମଧ୍ୟ ସୃଷ୍ଟି ହୋଇଛି। ଦେଶରେ ଏବେ ୬୫୭ କିଲୋମିଟର ମେଟ୍ରୋ ରେଳପଥ କାର୍ଯ୍ୟକ୍ଷମ କରାଯାଇଛି। ଇଲେକ୍ଟ୍ରି, ବ୍ୟାଟେରି ଗାଡ଼ିକୁ ପ୍ରୋତ୍ସାହନ ପାଇଁ ବିଶେଷ ବ୍ୟବସ୍ଥା ହେବ।
