ଭୁବନେଶ୍ବର: ସୁଭଦ୍ରା ଯୋଜନା ନେଇ ଆଜି ଧନୁ ସଂକ୍ରାନ୍ତିରେ ଆସିଛି ବଡ ଖବର। ତାହା ହେଲା ଚତୁର୍ଥ ପର୍ଯ୍ୟାୟ ଟଙ୍କା ସ୍ଥଗିତ ରଖାଗଲା। ଏ ନେଇ ଆଜି ସୂଚନା ଦେଇଛନ୍ତି ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡା। ଏହି ଟଙ୍କା ଆସନ୍ତା 25 ତାରିଖ ବଡଦିନରେ ମହିଳାମାନଙ୍କୁ ଦିଆଯାଇଥାଆନ୍ତି। ହେଲେ ଏ ପର୍ଯ୍ୟନ୍ତ ଯୋଗ୍ୟ ହିତାଧିକାରୀଙ୍କ ଚିହ୍ନଟ ପକ୍ରିୟା ଶେଷ ହୋଇ ନ ଥିବାରୁ ଏହି ପର୍ଯ୍ୟାୟ ଟଙ୍କା ପଠାଇବାକୁ ସ୍ଥଗିତ ରଖାଯାଇଛି।
ଉପମୁଖ୍ୟମନ୍ତ୍ରୀଙ୍କ କହିବା ଅନୁସାରେ ଚତୁର୍ଥ ପର୍ଯ୍ୟାୟରେ ସରକାର ମୋଟ ଏକ କୋଟି ମହିଳାଙ୍କୁ ସୁଭଦ୍ରା ଟଙ୍କା ପ୍ରଦାନ କରିବେ। କାଳେ କେହି ଭାବିବ ଯେ, ମୁଁ ଏକ କୋଟି ଭିତରେ ରହିଲି ନାହିଁ ସେଥିପାଇଁ ଏହାକୁ ସ୍ଥଗିତ ରଖାଯାଇ ଯାଞ୍ଚ ଶେଷ ହେବା କାର୍ଯ୍ୟ ଚାଲିଛି। ଏହି ପକ୍ରିୟା ଆସନ୍ତା 30 ତାରିଖ ସୁଦ୍ଧା ଶେଷ ହେବ। ଏହାପରେ ଚତୁର୍ଥ ପର୍ଯ୍ୟାୟ ଟଙ୍କା କେବେ ଦିଆଯିବ ତାହାର ତାରିଖ ଘୋଷଣା କରାଯିବ।
ସେହିପରି ଯେଉଁମାନଙ୍କ ପାଞ୍ଚ ଏକରରୁ କମ ଜମି ରହିଛି ସେମାନଙ୍କୁ ଏଥିରେ ସାମିଲ କରାଯିବ। ଏହାକୁ ନେଇ ବିଭିନ୍ନ ମହଲରେ ଦ୍ବନ୍ଦ ସୃଷ୍ଟି ହୋଇଛି। ଅନେକ ଅଭିଯୋଗ କରିଛନ୍ତି ଯେ, ସେମାନଙ୍କ ପାଞ୍ଚ ଏକର ଜମି ନ ଥିବା ସ୍ବତେ ତାଙ୍କ ନାମ ବାଦ ପଡିଛି। ସେମାନଙ୍କୁ ପୁଣି ଥରେ ଚିହ୍ନଟ କରାଯାଉଛି। ଯେଉଁମାନେ ଯୋଗ୍ୟ ହେବେ ସେମାନଙ୍କୁ ସାମିଲ କରିବା ପାଇଁ ଚେଷ୍ଠା କରାଯାଉଛି।
ଅନ୍ୟପକ୍ଷରେ ବହୁ ହିତାଧିକାରୀ ଏହି ଯୋଜନାରୁ ସତ୍ବଃପ୍ରୁତ ଭାବେ ବାହାରି ଯାଇଛନ୍ତି। ହେଲେ ପରେ ସେମାନେ ଅନୁଭବ କରିଛନ୍ତି ଯେ ସେମାନେ ପ୍ରକୃତରେ ଯୋଗ୍ୟ ହିତାଧିକାରୀ। ଏପରି କ୍ଷେତ୍ରରେ ସେମାନେ ସୁଭଦ୍ରା ପୋର୍ଟାଲରେ ଏକ ଅଭିଯୋଗ କଲେ ତାଙ୍କ କଥା ପୁନଃବିଚାର କରାଯିବ। କିମ୍ବା ସେମାନେ ଅଙ୍ଗନବାଡି କର୍ମି ଅଥବା ବ୍ଲକରେ ଯାଇ ଅଭିଯୋଗ କଲେ ସେମାନଙ୍କ କଥା ବିଚାର କରାଯିବ।
ତେବେ ଏହି ଯୋଜନାରେ ଯେଉଁମାନେ ଆବେଦନ କରିବା ପରେ ଓଟିପି ଯାଇଛି ତାହା ଠିକ ହେଲା ବୋଲି ଧରାଯିବ ନାହିଁ। ସେମାନେ ପରବର୍ତ୍ତି ସମୟରେ ଇ କେୱାଇସି ଦାଖଲ କରିବାକୁ ପଡିବ ବୋଲି ଶ୍ରୀମତୀ ପରିଡା କହିଛନ୍ତି। ଗାଁ ଗାଁରେ ଅଙ୍ଗନବାଡି କର୍ମି ଏବଂ ସୁଭଦ୍ରା ସହାୟତା କର୍ମି ଅଛନ୍ତି। ସେମାନଙ୍କ ପାଖରେ ଇ କେୱାସିକୁ ଦାଖଲ କରନ୍ତୁ ବୋଲି ସେ ଅନୁରୋଧ କରିଛନ୍ତି।
