ଭାରତ ପର୍ଯ୍ୟଟନ ଆଇକନରେ ଓଡିଶାର ଦୁଇଟି ପର୍ଯ୍ୟଟନ ସ୍ଥଳର ନାମ ରଖିବା ପାଇଁ କେନ୍ଦ୍ର ସଂସ୍କୃତି ମନ୍ତ୍ରୀଙ୍କୁ ଚିଠି ଲେଖିଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ

ସମୀକ୍ଷା ବ୍ୟୁରୋ

ଓଡିଶାର କୌଣସି ପର୍ଯ୍ୟଟନ ସ୍ଥଳ ଭାରତର ଆଇକନ ସ୍ଥଳ ଭାବେ କେନ୍ଦ୍ର ସରକାର ବାଛି ନ ଥିବାରୁ ସେ ନେଇ ଆଜି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କେନ୍ଦ୍ରକୁ ଚିଠି ଲେଖିଛନ୍ତି। କେନ୍ଦ୍ର ସଂସ୍କୃତି ମନ୍ତ୍ରୀ ପ୍ରହଲ୍ଲାଦ ସିଂ ପଟେଲଙ୍କୁ ନବୀନ ଏହି ଚିଠି ଲେଖିଛନ୍ତି। ଚିଠିରେ ଉଲ୍ଲେଖ କରିଛନ୍ତି ଯେ, ନିକଟରେ ଅର୍ଥମନ୍ତ୍ରୀ ନିର୍ମଳା ସୀତାରମଣ ତାଙ୍କ ବଜେଟ ଭାଷଣରେ ଭାରତର 17ଟି ପର୍ଯ୍ୟଟନ ସ୍ଥଳକୁ ଆଇକନ ସ୍ଥଳ ଭାବେ ଘୋଷଣା କରିଛନ୍ତି। ହେଲେ ଆଶ୍ଚର୍ଯ୍ୟର କଥା ଏହି 17ଟି ତାଲିକାରେ ଓଡିଶାର କୌଣସି ନାମ ନାହିଁ। ପ୍ରାଚୀନ ଯୁଗରୁ ଓଡିଶା ସଂସ୍କୃତି ଓ ପର୍ଯ୍ୟଟନ କ୍ଷେତ୍ର ଭାବେ ସାରା ବିଶ୍ବରେ ପରିଚିତ। ହେଲେ ଅର୍ଥମନ୍ତ୍ରୀ ଓଡିଶାର କୌଣସି ପର୍ଯ୍ୟଟନ ସ୍ଥଳର ନାମ ସାମିଲ ନ କରିବା ଦୁଃଖଦାୟକ ଘଟଣା। ମୁଖ୍ୟମନ୍ତ୍ରୀ ତାଙ୍କ ଚିଠିରେ ଓଡିଶାର 5ଟି ପ୍ରମୁଖ ପର୍ଯ୍ୟଟନ ସ୍ଥଳର ନାମ ମଧ୍ୟ ପ୍ରସ୍ତାବ ଦେଇଛନ୍ତି। ସେଗୁଡିକ ହେଲା କୋଣାର୍କ ମନ୍ଦିର, ଚିଲିକା ହ୍ରଦ, ଭିତରକନିକା,ଶିମିଳିପାଳ ଅଭୟାରଣ୍ୟ ଏବଂ ଡାଇମଣ୍ଡ ତ୍ରିଭୂଜ ବୈଦ୍ଧ ସର୍କିଟ୍ । ଏହି ପର୍ଯ୍ୟଟନ ସ୍ଥଳର ଗୁରୁତ୍ବ ସଂପର୍କରେ ମଧ୍ୟ ମୁଖ୍ୟମନ୍ତ୍ରୀ କେନ୍ଦ୍ରକୁ ଅବଗତ କରାଇଛନ୍ତି। ଏହି ପାଞ୍ଚୋଟି ମଧ୍ୟରୁ ଅନ୍ତତଃ ଦୁଇଟି ପର୍ଯ୍ୟଟନ ସ୍ଥଳର ନାମ ଆଇକନ ତାଲିକାରେ ସାମିଲ କରନ୍ତୁ ବୋଲି ମୁଖ୍ୟମନ୍ତ୍ରୀ ଚିଠିରେ ଉଲ୍ଲେଖ କରିଛନ୍ତି।