ନୂଆଦିଲ୍ଲୀ: ସୀମା ସୁରକ୍ଷା ବଳ (BSF) ଏକ ଅପରେସନରେ ଜମ୍ମୁ ସୀମାରେ ପାଞ୍ଚଟି ପାକିସ୍ତାନୀ ପୋଷ୍ଟ ଏବଂ ଏକ ଆତଙ୍କବାଦୀ ଲଞ୍ଚପ୍ୟାଡ୍ ନଷ୍ଟ କରିଛି। ବିଏସଏଫ କମାଣ୍ଡେଣ୍ଟ ଚନ୍ଦ୍ରେଶ ସୋନା କହିଛନ୍ତି ଯେ, ”ଆମେ ସେମାନଙ୍କ ଗୁଳିମାଡ଼ର (ପାକିସ୍ତାନ ଦ୍ୱାରା) ଉପଯୁକ୍ତ ଜବାବ ଦେଇଛୁ। ଆମେ ସେମାନଙ୍କର ଅନେକ ସମ୍ପତ୍ତି ନଷ୍ଟ କରିଦେଇଛୁ। ମସ୍ତପୁରରେ ସେମାନଙ୍କର ଏକ ଲଞ୍ଚପ୍ୟାଡ୍ ଥିଲା, ଯାହାକୁ ଆମେ ନଷ୍ଟ କରିଦେଲୁ। ଆମର କାର୍ଯ୍ୟାନୁଷ୍ଠାନ ଯୋଗୁଁ ସେମାନଙ୍କର ପାଞ୍ଚଟି ପୋଷ୍ଟ ସମ୍ପୂର୍ଣ୍ଣ ଧ୍ୱଂସ ହୋଇଯାଇଛି ଏବଂ ଆମେ ସେମାନଙ୍କର ଅନେକ ବଙ୍କର ମଧ୍ୟ ଧ୍ୱଂସ କରିଛୁ।
ସେ କହିଛନ୍ତି ଯେ, ‘ଅପରେସନ୍ ସିନ୍ଦୂର’ ପରଠାରୁ, ପାକିସ୍ତାନ ନିରନ୍ତର ନାଗରିକ ଅଞ୍ଚଳ ଏବଂ ଭାରତୀୟ ପ୍ରତିଷ୍ଠାନକୁ ଟାର୍ଗେଟ କରିଆସୁଛି। ମେ ୧୦ ତାରିଖରେ ପାକିସ୍ତାନ ଆମର ପୋଷ୍ଟ, ନିୟୋଜନ ସ୍ଥଳ ଏବଂ ଗ୍ରାମଗୁଡ଼ିକୁ ଟାର୍ଗେଟ କରିଥିଲା। ସେମାନେ ୬୧ ଏମଏମ ଏବଂ ୮୨ ଏମଏମ ମୋର୍ଟାର ବ୍ୟବହାର କରି ପ୍ରବଳ ଗୁଳିଚାଳନା କରିଥିଲେ।”
ସେ କହିଥିଲେ ଯେ, “ଆମେ ପାକିସ୍ତାନୀ ସେନା ଏବଂ ରେଞ୍ଜର୍ସ ଉଭୟକୁ ବହୁତ କ୍ଷତି ପହଞ୍ଚାଇଥିଲୁ।”
ଗୁଳି ବିନିମୟ ବନ୍ଦ ହେବା ପରେ କିଛି ଘଣ୍ଟା ପର୍ଯ୍ୟନ୍ତ ଆମ୍ବୁଲାନ୍ସଗୁଡ଼ିକ ଚେକପୋଷ୍ଟରୁ ଆହତମାନଙ୍କୁ ହସ୍ପିଟାଲକୁ ନେଇ ଯାଉଥିବାର ଦେଖାଯାଇଥିଲା ବୋଲି ସୋନା କହିଛନ୍ତି। ‘ଅପରେସନ୍ ସିନ୍ଦୂର’ ସମୟରେ ମହିଳା ଜବାନଙ୍କ ଭୂମିକାକୁ ପ୍ରଶଂସା କରି ଅଧିକାରୀ କହିଥିଲେ ଯେ, “ପ୍ରତ୍ୟେକ ବିଏସଏଫ ବାଟାଲିୟନରେ ମହିଳା କନଷ୍ଟେବଳ ଅଛନ୍ତି। ସେମାନେ ଘରକୁ ଯିବାକୁ କିମ୍ବା ବାଟାଲିୟନ ମୁଖ୍ୟାଳୟକୁ ଫେରିବାକୁ ମନା କରିଥିଲେ। ସେମାନେ କହିଥିଲେ ଯେ, ସେମାନେ ତାଙ୍କ ସହକର୍ମୀଙ୍କ ସହିତ କାନ୍ଧକୁ କାନ୍ଧ ମିଶାଇ ଛିଡ଼ା ହେବେ ଏବଂ ପାକିସ୍ତାନକୁ ଉଚିତ ଜବାବ ଦେବେ।”
ସେ କହିଥିଲେ ଯେ, “ଜଣେ ମହିଳା କନଷ୍ଟେବଳ ତାଙ୍କ ପିଲାକୁ ତାଙ୍କ ପରିବାରକୁ ହସ୍ତାନ୍ତର କରିଥିଲେ ଏବଂ ମୋର୍ଚ୍ଚାର ଦାୟିତ୍ୱ ଗ୍ରହଣ କରିଥିଲେ।”