The Samikhsya Desk: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ କହିଛନ୍ତି ଯେ, ଇରାନର ଫୋର୍ଡଓ ସମେତ ତିନୋଟି ପରମାଣୁ ସ୍ଥାନ ଉପରେ ଆମେରିକା ଆକ୍ରମଣ କରିଛି। ଏକ ସୋସିଆଲ ମିଡିଆ ପୋଷ୍ଟରେ ସେ କହିଛନ୍ତି ଯେ ଇରାନର ଫୋର୍ଡଓ, ନାଟାଞ୍ଜ ଏବଂ ଇସଫାହାନରେ ଥିବା ପରମାଣୁ ସ୍ଥାନ ଉପରେ ଆମେରିକା ସଫଳତାର ସହ ଆକ୍ରମଣ କରିଛି। ଏହି ାକ୍ରମଣରେ ନିୟୋଜିତ ସମସ୍ତ ବିମାନ ଇରାନ ଆକାଶ ସୀମାରୁ ପାର ହୋଇ ଘର ବାହୁଡା ହୋଇଛନ୍ତି।
ପ୍ରତିରକ୍ଷା ବିଭାଗର ବରିଷ୍ଠ ଅଧିକାରୀମାନେ ମଧ୍ୟ ନିଶ୍ଚିତ କରିଛନ୍ତି ଯେ ଆକ୍ରମଣରେ GBU-57A ମାସିଭ୍ ଅର୍ଡନାନ୍ସ ପେନେଟ୍ରେଟର୍, ଏକ ‘ବଙ୍କର୍ ବଷ୍ଟର୍’ ବୋମା ବ୍ୟବହାର କରାଯାଇଥିଲା, ପ୍ରତ୍ୟେକ ପରମାଣୁ ଲକ୍ଷ୍ୟସ୍ଥଳ ପାଇଁ ଦୁଇଟି ନିୟୋଜିତ କରାଯାଇଥିଲା। ରାଷ୍ଟ୍ରପତି ଟ୍ରମ୍ପ କହିଛନ୍ତି, ଇରାନକୁ ଏବେ ଏହି ଯୁଦ୍ଧ ସମାପ୍ତ କରିବାକୁ ରାଜି ହେବାକୁ ପଡିବ। ସେ ଆହୁରି କହିଛନ୍ତି ଯେ ବର୍ତ୍ତମାନ ଶାନ୍ତିର ସମୟ ଆସିଛି। ଆଜି ସକାଳେ ରାଷ୍ଟ୍ରକୁ ସମ୍ବୋଧିତ କରି ଶ୍ରୀ ଟ୍ରମ୍ପ ଆକ୍ରମଣକୁ ଏକ ଚମତ୍କାର ସଫଳତା ବୋଲି ବର୍ଣ୍ଣନା କରିଛନ୍ତି।
ସେ କହିଛନ୍ତି ଯେ ଆକ୍ରମଣର ଉଦ୍ଦେଶ୍ୟ ହେଉଛି ଇରାନର ପରମାଣୁ ସମୃଦ୍ଧି କ୍ଷମତାକୁ ବନ୍ଦ କରିବା ଏବଂ ବିଶ୍ୱର ଏକ ନମ୍ବର ରାଷ୍ଟ୍ର ପ୍ରାୟୋଜକ ଆତଙ୍କବାଦ ଦ୍ୱାରା ଉପୁଜିଥିବା ପରମାଣୁ ବିପଦକୁ ବନ୍ଦ କରିବା। ଇରାନର ରାଷ୍ଟ୍ରାୟତ୍ତ ଗଣମାଧ୍ୟମ ନିଶ୍ଚିତ କରିଛି ଯେ ଇସଲାମିକ୍ ଗଣରାଜ୍ୟର ଇସ୍ଫାହାନ, ନାଟାଞ୍ଜ ଏବଂ ଫୋର୍ଡୋ ପରମାଣୁ ସ୍ଥାନଗୁଡ଼ିକୁ ଆକ୍ରମଣ କରାଯାଇଥିଲା। IRIB ରାଷ୍ଟ୍ରାୟତ୍ତ ପ୍ରସାରକ ଦାବି କରିଛନ୍ତି ଯେ ଇରାନ ଉପରେ ଆକ୍ରମଣ ସମୟରେ ଇସ୍ରାଏଲ “ଆମେରିକା ସହିତ ସମ୍ପୂର୍ଣ୍ଣ ସମନ୍ୱୟରେ” ଥିଲା।