ବାଣପୁର: ସମ୍ପ୍ରତି ପାର୍ବଣ ଋତୁ ଆରମ୍ଭ ହୋଇଯାଇଥିବା ବେଳେ ସକ୍ରିୟ ହୋଇପଡିଛନ୍ତି ଅସାମାଜିକ ବ୍ୟକ୍ତି। ଲୁଟେରା, ଜୁଆଡ଼ି, ନିଶାଡି, ମଦ୍ୟପଙ୍କ ଦୌରାତ୍ମ୍ୟ ବଢୁଥିବା ବେଳେ ପୋଲିସ ମଧ୍ୟ ଏମାନଙ୍କ ଉପରେ ତୀକ୍ଷ୍ଣ ନଜର ରଖୁଛି। ତେବେ ଗତକାଲି ବିଳମ୍ବିତ ରାତ୍ରିରେ ଗଣେଶ ପୂଜାର ସୁଯୋଗ ନେଇ ଖୋର୍ଦ୍ଧା ଜିଲ୍ଲା ବାଣପୁର ଥାନା ଅଞ୍ଚଳରେ ଏକାଧିକ ମୋବାଇଲ ଏବଂ ସାଇକେଲ ଚୋରି ହୋଇଥିବା ବେଳେ ଆଜି ପୋଲିସ ଉକ୍ତ ଚୋରି ଘଟଣାରେ ସମସ୍ତ ଅଭିଯୁକ୍ତଙ୍କୁ ଗିରଫ କରିବା ସହ ଚୋରି ସାମଗ୍ରୀ ଜବତ କରିଛି।
ପୋଲିସ ସୂଚନା ମୁତାବକ ଗତକାଲି ବିଳମ୍ବିତ ରାତ୍ରିରେ ତୋରସିଂହ ଏବଂ ଆଙ୍କୁଲାପଦର ଗ୍ରାମର ବିଭିନ୍ନ ଗଣେଶ ପୂଜା ମଣ୍ଡପରୁ ଛଅ ଗୋଟି ମୋବଇଲ ଫୋନ ଚୋରି ହୋଇଥିଲା। ଅନୁରୂପ ଭାବେ ମା’ ଭଗବତୀ ମନ୍ଦିର ନିକଟରୁ ଦୁଇ ଗୋଟି ସାଇକେଲ ମଧ୍ୟ ଚୋରି ହୋଇଥିବା ଅଭିଯୋଗ ହୋଇଛି। ଅଭିଯୋଗ ପାଇ ବାଣପୁର ପୋଲିସ ଉଭୟ ଚୋରି ଘଟଣାରେ ତିନି ଗୋଟି ପୃଥକ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା।
ତେବେ ଆଜି ଉକ୍ତ ସମସ୍ତ ଚୋରି ଘଟଣାରେ ୫ ଜଣ ଅଭିଯୁକ୍ତ ଗିରଫ ହୋଇଥିବାବେଳେ ସମସ୍ତ ଚୋରି ସାମଗ୍ରୀ ଜବତ କରିଛି ପୋଲିସ। ସମସ୍ତ ଅଭିଯୁକ୍ତ ନିଶାଡି ଏବଂ ନିଶା ସେବନ ଉଦ୍ଦେଶ୍ୟରେ ଉକ୍ତ ଚୋରି କରିଥିବା ପୋଲିସ କହିଛି।