ନୂଆଦିଲ୍ଲୀ: ଭାରତ ଏବଂ ଆମେରିକା ମଧ୍ୟରେ ଚାଲିଥିବା ବାଣିଜ୍ୟ ଉତ୍ତେଜନା ମଧ୍ୟରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଘନିଷ୍ଠ ପରାମର୍ଶଦାତା ଏବଂ ବାଣିଜ୍ୟ ବିଶେଷଜ୍ଞ ପିଟର ନଭାରୋ ପୁଣି ଥରେ ଏକ ବୟାନ ଦେଇଛନ୍ତି। ମଙ୍ଗଳବାର ନୂଆଦିଲ୍ଲୀ ଏବଂ ୱାଶିଂଟନ ମଧ୍ୟରେ ବାଣିଜ୍ୟ ଆଲୋଚନା ଆରମ୍ଭ ହେବା ପୂର୍ବରୁ ନଭାରୋ କହିଛନ୍ତି ଯେ, ‘ଭାରତ’ ଆଲୋଚନା ଟେବୁଲକୁ ଆସୁଛି। ପୂର୍ବରୁ ସେ କହିଥିଲେ ଯେ, ଭାରତକୁ ଆଲୋଚନା ଟେବୁଲକୁ ଆସିବାକୁ ପଡିବ, ନଚେତ୍ ପରିସ୍ଥିତି ଭାରତ ପାଇଁ ଭଲ ହେବ ନାହିଁ।
ସୂଚନା ଅନୁଯାୟୀ, ଏହି ଆଲୋଚନା ଏପରି ସମୟରେ ହେଉଛି ଯେତେବେଳେ ଆମେରିକା ଭାରତୀୟ ଉତ୍ପାଦ ଉପରେ ଅତିରିକ୍ତ ୨୫ ପ୍ରତିଶତ ଶୁଳ୍କ ଲଗାଇବାକୁ ଯୋଜନା କରିଥିଲା। ଅଗଷ୍ଟରେ ଭାରତର ରପ୍ତାନି ଗତ ନଅ ମାସ ମଧ୍ୟରେ ସର୍ବନିମ୍ନ ସ୍ତରରେ ପହଞ୍ଚିଥିଲା। ଆମେରିକା ଭାରତରୁ ଆମଦାନି ହେଉଥିବା ଉତ୍ପାଦ ଉପରେ ଶୁଳ୍କ ୫୦ ପ୍ରତିଶତକୁ ବୃଦ୍ଧି କରିଥିଲା। ଏହି କାରଣରୁ ଅଗଷ୍ଟ ମାସରେ ସ୍ଥଗିତ ରହିଥିବା ଦୁଇ ଦେଶ ମଧ୍ୟରେ ଷଷ୍ଠ ପର୍ଯ୍ୟାୟ ଆଲୋଚନା ଏବେ ମଙ୍ଗଳବାର ଅନୁଷ୍ଠିତ ହେବ। ଏଥିପାଇଁ ଆମେରିକୀୟ ଆଲୋଚନାକାରୀମାନେ ସୋମବାର ନୂଆଦିଲ୍ଲୀରେ ପହଞ୍ଚିବାକୁ ଯାଉଛନ୍ତି।
ନଭାରୋଙ୍କ କଡ଼ା ଅଭିଯୋଗ:
ପିଟର ନଭାରୋ ପୂର୍ବରୁ କହିଥିଲେ ଯେ, ଭାରତକୁ ଆମେରିକା ସହିତ ବାଣିଜ୍ୟ ଆଲୋଚନା କରିବାକୁ ପଡିବ। ସେ ଆମେରିକା ବଜାରରେ ଅତ୍ୟଧିକ ଶୁଳ୍କ ଲଗାଇ ଭାରତ ଅନୁଚିତ ଲାଭ କରୁଥିବା ଅଭିଯୋଗ କରିଥିଲେ। ଏହା ବ୍ୟତୀତ ସେ ଏହା ମଧ୍ୟ ଦାବି କରିଥିଲେ ଯେ, ଭାରତ ରୁଷରୁ ତେଲ କିଣି ଯୁଦ୍ଧକୁ ପ୍ରୋତ୍ସାହିତ କରୁଛି। ସେ ଭାରତକୁ ଶୁଳ୍କର ‘ମହାରାଜ’ ବୋଲି କହି ଟାର୍ଗେଟ କରିଥିଲେ ଏବଂ ରୁଷ-ୟୁକ୍ରେନ ଯୁଦ୍ଧକୁ ‘ମୋଦୀଙ୍କ ଯୁଦ୍ଧ’ ବୋଲି କହି ଏକ ବିବାଦୀୟ ବୟାନ ଦେଇଥିଲେ।
ଟ୍ରମ୍ପ ଶୁଳ୍କ ଲଗାଇବା ପରେ ଦୁଇ ଦେଶ ମଧ୍ୟରେ ଉତ୍ତେଜନା ବୃଦ୍ଧି ପାଇଥିଲା!
ଆମେରିକା ଭାରତ ଉପରେ ଶୁଳ୍କ ବୃଦ୍ଧି କରିବା ପରେ ଦୁଇ ଦେଶ ମଧ୍ୟରେ ସମ୍ପର୍କରେ ଉତ୍ତେଜନା ଦେଖାଯାଇଛି। ତଥାପି ଟ୍ରମ୍ପ ପ୍ରଧାନମନ୍ତ୍ରୀ ମୋଦିଙ୍କୁ ‘ମହାନ ପ୍ରଧାନମନ୍ତ୍ରୀ’ ବୋଲି କହି ବନ୍ଧୁତ୍ୱରେ ବିଶ୍ୱାସ ପ୍ରକାଶ କରିବା ପରେ କିଛି ନରମ ହେବାର ସଙ୍କେତ ମଧ୍ୟ ମିଳିଥିଲା। ଏହା ଉପରେ ପ୍ରଧାନମନ୍ତ୍ରୀ ମୋଦି ଟ୍ରମ୍ପଙ୍କ ଭାବନାକୁ ପ୍ରଶଂସା କରିଥିଲେ ଏବଂ ଆମେରିକା ସହିତ ବନ୍ଧୁତ୍ୱପୂର୍ଣ୍ଣ ସମ୍ପର୍କ ବଜାୟ ରଖିବାକୁ ଚାହୁଁଥିବା ବାର୍ତ୍ତା ଦେଇଥିଲେ।