ଭୁବନେଶ୍ଵର: ତୃଣମୂଳ ସ୍ତରରେ ଡିଜିଟାଲ୍ ଶାସନ ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ନେଇ, ଗ୍ରାମ ପଞ୍ଚାୟତଗୁଡ଼ିକୁ ଆଜି ଜାତୀୟ ଇ-ଗଭର୍ଣ୍ଣାନ୍ସ ପୁରସ୍କାର (ଏନଏଇଜି) ୨୦୨୫ ପ୍ରଦାନ କରାଯାଇଛି। ତୃଣମୂଳ ସ୍ତରରେ ଡିଜିଟାଲ୍ ସେବାରେ ଉଲ୍ଲେଖନୀୟ ପଦକ୍ଷେପ ପାଇଁ ଉତ୍ସର୍ଗୀକୃତ ଏକ ନୂତନ ବର୍ଗ ଅଧୀନରେ ଏସବୁ ପୁରସ୍କାର ଦିଆଯାଇଛି।
ମହାରାଷ୍ଟ୍ରର ଧୁଲେ ଜିଲ୍ଲା ରୋହିଣୀ ଗ୍ରାମ ପଞ୍ଚାୟତକୁ ସ୍ବର୍ଣ୍ଣ ପୁରସ୍କାର ମିଳିଥିବାବେଳେ ତ୍ରିପୁରାର ପଶ୍ଚିମ ମଜଲିଶପୁର ଗ୍ରାମ ପଞ୍ଚାୟତ ରୌପ୍ୟ ପୁରସ୍କାର ପାଇଛନ୍ତି। ଓଡ଼ିଶାର କେନ୍ଦୁଝର ଜିଲ୍ଲା ଶୁଆକାଟୀ ଗ୍ରାମ ପଞ୍ଚାୟତ ଓ ଗୁଜରାଟର ପଲସାନା ଗ୍ରାମ ପଞ୍ଚାୟତକୁ ଜୁରି ପୁରସ୍କାର ମିଳିଛି । ଶୁଆକାଟୀ ଗ୍ରାମ ପଞ୍ଚାୟତର ସରପଞ୍ଚ ଶ୍ରୀମତି କୌତୁକ ନାୟକ ଏହି ପୁରସ୍କାର ଗ୍ରହଣ କରିଥିଲେ। ଦେଶ ସାରାରୁ ୧.୪୫ ଲକ୍ଷରୁ ଅଧିକ ପ୍ରବେଶର ଏକ ଜଟିଳ ବହୁସ୍ତରୀୟ ମୂଲ୍ୟାଙ୍କନ ପରେ, ନୂତନ ଭାବରେ ପ୍ରଚଳିତ ବର୍ଗ, “ଗ୍ରାମ ପଞ୍ଚାୟତରେ ଗ୍ରାସରୁଟ୍ସ ଇନିସିଏଟିଭ୍ସ ଅଧିନରେ ଏହି ଗ୍ରାମ ପଞ୍ଚାୟତମାନଙ୍କୁ ଚୟନ କରାଯାଇଥିଲା। ଏହି ପୁରସ୍କାରପ୍ରାପ୍ତ ପଞ୍ଚାୟତଗୁଡ଼ିକ ଡିଜିଟାଲ୍ ଶାସନ, ସ୍ୱଚ୍ଛତା ଏବଂ ଅଂଶଗ୍ରହଣମୂଳକ ସେବା ପ୍ରଦାନରେ ନୂତନ ମାନଦଣ୍ଡ ସ୍ଥାପନ କରିଛନ୍ତି। ପ୍ରତ୍ୟେକ ପୁରସ୍କାରରେ ଏକ ଟ୍ରଫି, ପ୍ରମାଣପତ୍ର ପ୍ରଦାନ କରାଯାଇଛି। ସ୍ବର୍ଣ୍ଣ ପୁରସ୍କାର ପାଇଁ ୧୦ ଲକ୍ଷ ଟଙ୍କା ଏବଂ ରୌପ୍ୟ ପୁରସ୍କାର ପାଇଁ ୫ ଲକ୍ଷ ଟଙ୍କାର ଆର୍ଥିକ ପ୍ରୋତ୍ସାହନ ପ୍ରଦାନ କରାଯାଇଛି, ଯାହାକୁ ନାଗରିକ-କୈନ୍ଦ୍ରିକ ପଦକ୍ଷେପଗୁଡ଼ିକୁ ସୁଦୃଢ଼ କରିବା ପାଇଁ ପୁନଃବିନିଯୋଗ କରାଯିବ।
ଶୁଆକାଟି ଗ୍ରାମ ପଞ୍ଚାୟତ ଓଡ଼ିଶା ୱାନ୍ ଏବଂ ସେବା ଓଡ଼ିଶା ପ୍ଲାଟଫର୍ମ ମାଧ୍ୟମରେ ଅତ୍ୟାବଶ୍ୟକ ସେବାଗୁଡ଼ିକୁ ଡିଜିଟାଇଜ୍ କରିଛି, ଯାହା ନାଗରିକମାନଙ୍କୁ ତୁରନ୍ତ ଟ୍ରାକିଂ ସହିତ ୨୪ ଘଣ୍ଟିଆ ଉପଲବ୍ଧତା ପ୍ରଦାନ କରୁଛି। ମହିଳା ନେତୃତ୍ୱ ଏବଂ ଅନ୍ତର୍ଭୁକ୍ତିମୂଳକ ସେବା ପ୍ରଦାନକୁ ସୁନିଶ୍ଚିତ କରି, ଏହା ପ୍ରଯୁକ୍ତିବିଦ୍ୟା କିପରି ସରକାର ଏବଂ ନାଗରିକଙ୍କ ମଧ୍ୟରେ ସେତୁ ସ୍ଥାପନ କରେ ତାହାର ଉଦାହରଣ ହୋଇଛି।
ମହାରାଷ୍ଟ୍ରର ରୋହିଣୀ ଗ୍ରାମ ପଞ୍ଚାୟତ ସମ୍ପୂର୍ଣ୍ଣ କାଗଜବିହୀନ ଇ-ଅଫିସ୍ ବ୍ୟବସ୍ଥା ଗ୍ରହଣ କରିବାରେ ରାଜ୍ୟର ପ୍ରଥମ ଗ୍ରାମ ପଞ୍ଚାୟତ ହୋଇଛି। ଏହା ଅନଲାଇନରେ ୧୦୨୭ ସେବା ପ୍ରଦାନ କରେ ଏବଂ ୧୦୦% ପରିବାର ଡିଜିଟାଲ୍ ସାକ୍ଷରତା ସୁନିଶ୍ଚିତ କରିଛି। ତୁରନ୍ତ ଅଭିଯୋଗ ସମାଧାନ ଏବଂ ବଲ୍କ ଏସଏମଏସ ପ୍ରସାର ପ୍ରତ୍ୟେକ ନାଗରିକଙ୍କୁ ଶାସନ ନିଷ୍ପତ୍ତି ସହିତ ଯୋଡ଼ିବା ନିଶ୍ଚିତ କରେ।
ତ୍ରିପୁରାର ପଶ୍ଚିମ ମଜଲିଶପୁର ଗ୍ରାମ ପଞ୍ଚାୟତ ନାଗରିକ ଚାର୍ଟର-ଆଧାରିତ ପଞ୍ଚାୟତ ଶାସନର ଏକ ମଡେଲରେ ପରିଣତ ହୋଇଛି। ଜନ୍ମ, ମୃତ୍ୟୁ, ବିବାହ ପ୍ରମାଣପତ୍ର, ବ୍ୟବସାୟ ଲାଇସେନ୍ସ, ସମ୍ପତ୍ତି ରେକର୍ଡ ଏବଂ ଏମଏନଆରଇଜିଏ ଜବ୍ କାର୍ଡ ଭଳି ସେବା ଅନଲାଇନରେ ଉପଲବ୍ଧ, ଏବଂ ପ୍ରତ୍ୟେକ ଅନୁରୋଧକୁ ଡିଜିଟାଲ୍ ଭାବରେ ତଦାରଖ କରାଯାଏ, ଯାହା ଉତ୍ତରଦାୟିତ୍ୱ, ସମୟାନୁବର୍ତ୍ତୀତା ଏବଂ ସ୍ୱଚ୍ଛତା ସୁନିଶ୍ଚିତ କରେ।
ଗୁଜୁରାଟର ପଲସାନା ଗ୍ରାମ ପଞ୍ଚାୟତରେ କ୍ୟୁଆର-ୟୁପିଆଇ-ଆଧାରିତ ସମ୍ପତ୍ତି କର ଦେୟ, ଅନଲାଇନ୍ ଅଭିଯୋଗ ସମାଧାନ ଏବଂ ସ୍ୱଚ୍ଛ କଲ୍ୟାଣ ପ୍ରଦାନକୁ ସକ୍ଷମ କରିବା ପାଇଁ ଡିଜିଟାଲ୍ ଗୁଜରାଟ ଏବଂ ଗ୍ରାମ ସୁବିଧା ଭଳି ସମନ୍ୱିତ ପୋର୍ଟାଲ୍ ଅଛି। ପ୍ରତିବର୍ଷ ୧୦,୦୦୦ରୁ ଅଧିକ ନାଗରିକଙ୍କ ଦ୍ୱାରା ଅନଲାଇନ୍ ସେବାର ଉପଲବ୍ଧତା ପ୍ରଯୁକ୍ତିବିଦ୍ୟା କିପରି ସିଧାସଳଖ ଜୀବନକୁ ସହଜ କରିଥାଏ ତାହା ଦର୍ଶାଏ।
ଆନ୍ଧ୍ର ପ୍ରଦେଶର ବିଶାଖାପାଟନମରେ ଇ-ଗଭର୍ଣ୍ଣାନ୍ସ ଉପରେ ୨୮ତମ ଜାତୀୟ ସମ୍ମିଳନୀ (ଏନଏଇଜି) ସମୟରେ ପ୍ରଧାନମନ୍ତ୍ରୀ କାର୍ଯ୍ୟାଳୟର ରାଷ୍ଟ୍ରମନ୍ତ୍ରୀ ଏବଂ କାର୍ମିକ, ସାଧାରଣ ଅଭିଯୋଗ ଏବଂ ପେନସନ୍ ରାଷ୍ଟ୍ରମନ୍ତ୍ରୀ ଡକ୍ଟର ଜିତେନ୍ଦ୍ର ସିଂହ ଏହି ପୁରସ୍କାର ପ୍ରଦାନ କରିଥିଲେ। ଏହା ପୂର୍ବରୁ, ଆନ୍ଧ୍ର ପ୍ରଦେଶର ମୁଖ୍ୟମନ୍ତ୍ରୀ ଏନ. ଚନ୍ଦ୍ରବାବୁ ନାଇଡୁ ସମ୍ମିଳନୀର ଉଦଘାଟନ କରିଥିଲେ ଏବଂ ଉଦଘାଟନୀ ଭାଷଣ ଦେଇଥିଲେ।
ପ୍ରଶାସନିକ ସଂସ୍କାର ଏବଂ ସାଧାରଣ ଅଭିଯୋଗ ବିଭାଗ (ଡିଏଆରପିଜି) ଦ୍ୱାରା ପଞ୍ଚାୟତିରାଜ ମନ୍ତ୍ରଣାଳୟର ସହଯୋଗରେ ପ୍ରତିଷ୍ଠା କରାଯାଇଥିବା ଏହି ପୁରସ୍କାର, ସରକାରଙ୍କ ଦୃଷ୍ଟିକୋଣକୁ ଉଜ୍ଜ୍ୱଳ କରିଥାଏ ଯେ ଡିଜିଟାଲ ଶାସନ ମାଧ୍ୟମରେ ଉତ୍ତମ ଶାସନ ପ୍ରଦାନ କରାଯାଇପାରିବ। ଡିଏଆରପିଜି, ଇଲେକ୍ଟ୍ରୋନିକ୍ସ ଏବଂ ସୂଚନା ପ୍ରଯୁକ୍ତିବିଦ୍ୟା ମନ୍ତ୍ରଣାଳୟ ଏବଂ ଆନ୍ଧ୍ର ପ୍ରଦେଶ ସରକାରଙ୍କ ଦ୍ୱାରା ମିଳିତ ଭାବରେ ଆୟୋଜିତ ଏହି ଦୁଇ ଦିନିଆ ଜାତୀୟ ସମ୍ମିଳନୀର ବିଷୟବସ୍ତୁ ଥିଲା “ବିକଶିତ ଭାରତ: ନାଗରିକ ସେବା ଏବଂ ଡିଜିଟାଲ ପରିବର୍ତ୍ତନ”। ଆଇଆଇଏମ ବିଶାଖାପାଟଣା ଏହାର ଜ୍ଞାନ ସହଯୋଗୀ ଥିଲା।
୨୩ ସେପ୍ଟେମ୍ବର, ୨୦୨୫ରେ, “ଇ-ଗଭର୍ଣ୍ଣାନ୍ସରେ ଗ୍ରାମ ପଞ୍ଚାୟତ ଏବଂ ତୃଣମୂଳସ୍ତରରେ ନବସୃଜନ” ବିଷୟକ ଏକ ସମର୍ପିତ ପୂର୍ଣ୍ଣାଙ୍ଗ ଅଧିବେଶନ ପଞ୍ଚାୟତିରାଜ ମନ୍ତ୍ରଣାଳୟର ସଚିବ ବିବେକ ଭାରଦ୍ୱାଜଙ୍କ ଅଧ୍ୟକ୍ଷତାରେ ଅନୁଷ୍ଠିତ ହେବ, ଯେଉଁଥିରେ ଏହି ସଫଳତା କାହାଣୀଗୁଡ଼ିକୁ ଦେଶବ୍ୟାପୀ ପଞ୍ଚାୟତ ପାଇଁ ପ୍ରତିକୃତିଯୋଗ୍ୟ ମଡେଲ ଭାବରେ ପ୍ରଦର୍ଶିତ କରାଯିବ।