ଆମେରିକା ଏବଂ ଚୀନ୍ ମଧ୍ୟରେ ଚାଲିଥିବା ବାଣିଜ୍ୟିକ ଯୁଦ୍ଧର ଫାଇଦା ନେଇଛି ମେକ୍ସିକୋ । ପୂର୍ବରୁ ରପ୍ତାନୀ ଏବଂ ଆମଦାନୀରେ ଚୀନ୍ ଆମେରିକାର ଏକ ନମ୍ବର ସହଯୋଗୀ ରହିଥିବା ବେଳେ ବର୍ତ୍ତମାନ ଏହା ତୃତୀୟ ସ୍ଥାନକୁ ଖସି ଆସିଛି । ଅନ୍ୟ ପକ୍ଷରେ ଦୁଇ ଛୋଟ ରାଷ୍ଟ୍ର ତଥା ଆମେରିକାର ପଡୋଶୀ ରାଷ୍ଟ୍ର କାନାଡା ଏବଂ ମେକ୍ସିକୋ ଏହି ତାଲିକାରେ ଉପରକୁ ଉଠିଛନ୍ତି । ଓ୍ବାଲ୍ ଷ୍ଟ୍ରିଟ୍ ଜର୍ଣ୍ଣାଲ ପକ୍ଷରୁ ପ୍ରକାଶିତ ତଥ୍ୟ ଅନୁଯାୟୀ ଚୀନ୍ ସହିତ ମତଭେଦ ପରେ ଆମେରିକା ବର୍ତ୍ତମାନ ମେକ୍ସିକୋ ଏବଂ କାନାଡା ସହିତ ବ୍ୟବସାୟ ଅଭିବୃଦ୍ଧିର ଲକ୍ଷ୍ୟ ରଖିଛି । ଫଳସ୍ବରୂପ ମେକ୍ସିକୋ ସହିତ ଏହାର ବ୍ୟବସାୟ ସର୍ବୋଚ୍ଚ ସ୍ତରରେ ପହଞ୍ଚିଛି । ଆମେରିକାରୁ ଚୀନ୍କୁ ରପ୍ତାନୀ 19 ପ୍ରତିଶତ ହ୍ରାସ ପାଇଥିବା ବେଳେ ଚୀନ୍ର ରପ୍ତାନୀ 12 ପ୍ରତିଶତ ହ୍ରାସ ପାଇଛି । ଟ୍ରମ୍ପ ସରକାର ଆସିବା ପରଠାରୁ ବିଭିନ୍ନ ସାମଗ୍ରୀ ଉପରେ 25 ପ୍ରତିଶତ ଅତିରିକ୍ତ ଶୁଳ୍କ ଲଗାଯାଇଛି । ଏହା ଫଳରେ ଚୀନ୍ ସହିତ ବ୍ୟବସାୟରେ ଭଟ୍ଟା ପଡିଛି । 2015ରୁ 2018 ମଧ୍ୟରେ ଆମେରିକାର ଏକ ନମ୍ବର ବାଣିଜ୍ୟିକ ସହଯୋଗୀ ରହିଥିବା ଚୀନ୍ ବର୍ତ୍ତମାନ ମେକ୍ସିକୋ ଏବଂ କାନାଡା ଠାରୁ ପଛରେ ରହି 3 ନମ୍ବର ସ୍ଥାନରେ ରହିଛି । 2005 ପରଠାରୁ ଚୀନ୍ ପ୍ରଥମ ଥର ପାଇଁ ତିନି ନମ୍ବର ସ୍ଥାନକୁ ଆସିଛି ।
