ବାଲୁଗାଁ: ବାଲୁଗାଁ ଥାନା ଅନ୍ତର୍ଗତ ୧୬ ନଂ ଜାତୀୟ ରାଜପଥ ଗଞ୍ଜାମ ଓ ଖୋର୍ଦ୍ଧା ଜିଲ୍ଲା ସୀମାନ୍ତ ଛତ୍ରଗଡ଼ ଜଳି ଶଙ୍ଖ ନିକଟରେ ଏକ ମର୍ମନ୍ତୁଦ ସଡକ ଦୁର୍ଘଟଣା ଘଟିଛି। ବୋଲେରୋକୁ ଏକ ଅଜଣା ଟ୍ରକ ଧକ୍କା ଦେଇଛି। ଯେଉଁଥିରେ ବୋଲେରୋରେ ଥିବା ୧୨ ଜଣଙ୍କ ମଧ୍ୟରୁ ୩ ଜଣ ଗୁରୁତର ଓ ୯ ଜଣ ଯାତ୍ରୀ ଆହତ ହୋଇଛନ୍ତି।
ସୂଚନା ଅନୁଯାୟୀ ବ୍ରହ୍ମପୁର କନିଶି ଅଞ୍ଚଳର ୧୨ ଜଣ ଯାତ୍ରୀ ଏକ ବୋଲେରୋରେ ଗାଡ଼ି ନମ୍ବର (ଓଡ଼ି ୦୭ ଡି୮୬୬୫) ଘଟଗାଁ ମା ତାରିଣୀ ଦର୍ଶନ ସାରି ଫେରୁଥିଲେ। ସୋମବାର ଭୋର ପ୍ରାୟ ୪ ଟା ସମୟରେ ଏହି ବୋଲେର ୧୬ ନଂ ଜାତୀୟ ରାଜପଥ ଛତ୍ରଗଡ଼ ଜଳି ଶଙ୍ଖ ନିକଟରେ ଯାନ୍ତ୍ରିକ ତ୍ରୁଟି ଦେଖାଯାଇଥିଲା। ଯାହାଯୋଗୁଁ ରାସ୍ତା କଡ଼ରେ ଥିବା ଏକ ଟ୍ରକକୁ ଓଭର ଟେକ୍ କରିଥିବା ସମୟରେ ହଠାତ ପଛ ପର୍ଶ୍ୱରୁ ଅନ୍ୟ ଏକ ଟ୍ରକ ଦୃତ ଗତିରେ ଆସି ବୋଲେରୋକୁ ଧକ୍କା ଦେଇ ଘଟଣା ସ୍ଥଳରୁ ଫେରାର ହୋଇଯାଇଥିଲା।
ଉକ୍ତ ବୋଲେରୋରେ ୩ ଜଣ ଶିଶୁ, ୨ଜଣ ମହିଳାଙ୍କ ସମେତ ୧୨ ଜଣ ଯାତ୍ରୀ ଥିଲେ। ତେବେ ବୋଲେରୋ ଗାଡ଼ିଟି ସମ୍ପୂର୍ଣ୍ଣ କ୍ଷତି ଗ୍ରସ୍ତ ହୋଇଛି। ଏବଂ ଗାଡ଼ି ଭିତରେ ଥିବା ଚାଳକଙ୍କ ଏକ ହାତ କଟି ରାସ୍ତାରେ ପଡିଥିବା ବେଳେ ୧୨ ଜଣ ଯାତ୍ରୀଙ୍କ ମଧ୍ୟରୁ ୩ ଜଣ ଗୁରୁତର ଓ ୯ ଜଣ ଆହତ ହୋଇଥିଲେ।
ଖବର ପାଇ ଦୁର୍ଘଟଣା ସ୍ଥଳରେ ନାଭାଲ ଫାଣ୍ଡି ପୋଲିସ ପହଞ୍ଚି ଗୁରୁତର ଆହତଙ୍କୁ ବାଲୁଗାଁ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ପଠାଇ ଥିବାବେଳେ ଅବସ୍ଥା ଗୁରୁତର ହେବାରୁ ସେମାନଙ୍କୁ ବ୍ରହ୍ମପୁର ଏମକେସିଜି ହସ୍ପିଟାଲକୁ ସ୍ଥାନତାରିତ କରାଯାଇଛି।ସାମାନ୍ୟ ଆହତ ୯ ଜଣଙ୍କୁ ଅନ୍ୟ ଏକ ଗାଡ଼ିରେ ସେମାନଙ୍କ ଗନ୍ତ୍ୟବ ସ୍ଥଳକୁ ପଠାଇ ଦିଆଯାଇଛି।ଦୁର୍ଘଟଣା ଯୋଗୁଁ ଅନେକ ସମୟ ଧରି ରାସ୍ତା ଜାମ ହୋଇଥିବା ବେଳେ ଦୁର୍ଘଟଣା ଗ୍ରସ୍ତ ବୋଲେରୋକୁ ରାସ୍ତାରୁ ହଟାଇବା ପରେ ଯାତାୟାତ ସ୍ୱାଭାବିକ ହୋଇଥିଲା।ଦୁର୍ଘଟଣା ସ୍ଥଳରୁ ନାଭାଲ ଫାଣ୍ଡି ପୋଲିସ ଉକ୍ତ ବୋଲେରୋକୁ ଜବତ କରି ତଦନ୍ତ ଜାରି ରଖିଛି।