ଭୁବନେଶ୍ଵର: ଏଣିକି ନିୟମଗିରିର ଡଙ୍ଗରିଆ କନ୍ଧମାନେ ପଞ୍ଚାୟତକୁ ନ ଯାଇ ନିଜ ଘର ବାରଣ୍ଡାରେ ସେମାନଙ୍କ ଭତ୍ତା ରାଶି ପାଇପାରିବେ। ସେମାନଙ୍କ ଦୁଆର ମୁହଁରେ ସେବା ଓ ସହାୟତା ପହଞ୍ଚାଇବା ଲକ୍ଷ୍ୟରେ ‘ଦୁଆରେ ପ୍ରଶାସନ’ ନାମକ ଏକ ଅଭିନବ ପ୍ରୟାସ ଆରମ୍ଭ କରାଯାଇଛି। ରାୟଗଡ଼ା ଜିଲ୍ଲାପାଳ ଆଶୁତୋଷ କୁଲକର୍ଣ୍ଣୀ ଏହି କାର୍ଯ୍ୟକ୍ରମର ଶୁଭାରମ୍ଭ କରିବା ସହ ଘର ଘର ବୁଲି ଡଙ୍ଗରିଆ ହିତାଧିକାରୀମାନଙ୍କୁ ଭତ୍ତା ପ୍ରଦାନ କରିଛନ୍ତି। ପିଏମ୍ ଜନମନ ଯୋଜନାର ଲକ୍ଷ୍ୟ ସହ ସମନ୍ବିତ ଏକ ଅନନ୍ୟ ପ୍ରୟୋଗ ଭାବରେ ରାୟଗଡ଼ା ଜିଲ୍ଲା ପ୍ରଶାସନ ଦ୍ବାରା ପ୍ରଥମ ଥରପାଇଁ ଏଭଳି ପ୍ରୟାସ କରାଯାଇଛି।
ଜିଲ୍ଲାପାଳ ଶ୍ରୀ କୁଲକର୍ଣ୍ଣି ବିଷମକଟକ ବ୍ଲକର ନିୟମଗିରି ଅନ୍ତର୍ଗତ କୁର୍ଲି ପଞ୍ଚାୟତର ଖମ୍ବେସିଠାରେ ଏହାର ଶୁଭାରମ୍ଭ କରି ହିତାଧିକାରୀମାନଙ୍କୁ ଭତ୍ତା ଦେବା ସହ ସେମାନଙ୍କ ସହିତ ଭାବ ବିନିମୟ କରିଥିଲେ। ଜିଲ୍ଲାପାଳଙ୍କ ହାତରୁ ଭତ୍ତା ଗ୍ରହଣ କରି ହିତାଧିକାରୀମାନେ ଜିଲ୍ଲା ପ୍ରଶାସନକୁ ଧନ୍ୟବାଦ ଜଣାଇଛନ୍ତି। ରାଜ୍ୟ ତଥା କେନ୍ଦ୍ର ସରକାରଙ୍କ ଏଭଳି ପ୍ରୟାସକୁ ସେମାନେ ସାଧୁବାଦ ଜଣାଇଛନ୍ତି।