ଭୁବନେଶ୍ବର: ମଙ୍ଗଳବାର ବିଳମ୍ବିତ ରାତିରେ ବାତ୍ୟା ମୋନ୍ଥା ଆନ୍ଧ୍ର ପ୍ରଦେଶ ଉପକୂଳ ଅତିକ୍ରମ କରିଛି। ଏହାର ପ୍ରଭାବରେ ଆନ୍ଧ୍ରପ୍ରଦେଶର କ୍ଷତି ହୋଇଥିବା ବେଳେ ଓଡିଶା ବଞ୍ଚିଯାଇଛି। ଏହାର ପ୍ରଭାବରେ ଓଡ଼ିଶାର୧୫ଟି ଜିଲ୍ଲାରେ ସାଧାରଣ ଜୀବନ ପ୍ରଭାବିତ ହୋଇଥିଲା। ଘୂର୍ଣ୍ଣିଝଡ଼ ପ୍ରଭାବରେ କୋନାସୀମା ଜିଲ୍ଲାରେ ଘର ଉପରେ ଗଛ ପଡ଼ି ଜଣେ ବୃଦ୍ଧା ମହିଳାଙ୍କ ମୃତ୍ୟୁ ହୋଇଥିବାର ଜଣାପଡିଛି। ଅନ୍ୟ ଏକ ଘଟଣାରେ, ଜିଲ୍ଲାରେ ପ୍ରବଳ ପବନରେ ନଡ଼ିଆ ଗଛ ଉପୁଡ଼ିଯିବାରୁ ଜଣେ ବାଳକ ଏବଂ ଜଣେ ଅଟୋ ଚାଳକ ଆହତ ହୋଇଥିବାର ଜଣାପଡିଛି।
ଭାରତୀୟ ପାଣିପାଗ ବିଭାଗ (IMD) କହିଛି ଯେ ଗତକାଲି ସନ୍ଧ୍ୟା ୭ଟାରେ ମୋନ୍ଥା ଲ୍ୟାଣ୍ଡଫଲ୍ ପ୍ରକ୍ରିୟା ଆରମ୍ଭ ହୋଇଥିଲା। ଏହା କାକିନାଡା ପାଖାପାଖି ମଛଲିପଟ୍ଟନମ୍ ଏବଂ କଳିଙ୍ଗପଟନମ୍ ମଧ୍ୟରେ ଆନ୍ଧ୍ର ପ୍ରଦେଶ ଉପକୂଳ ଅତିକ୍ରମ କରିଥିଲା। ଲ୍ୟାଣ୍ଡଫଲ ବେଳେ ସର୍ବାଧିକ ପବନ ବେଗ ୯୦-୧୦୦ କିଲୋମିଟର ଘଣ୍ଟା ପ୍ରତି ଏବଂ ଝଟକା ପବନ ୧୧୦ କିଲୋମିଟର ପର୍ଯ୍ୟନ୍ତ ଥିଲା।
ଓଡିଶାରେ ଏହାର ପ୍ରଭାବ ଯେପରି ଆଶା କରାଯାଉଥିଲା ତାହା ହୋଇ ନାହିଁ। କେବଳ ଦକ୍ଷିଣ ଓଡିଶାର ବିଭିନ୍ନ ସ୍ଥାନରେ ପ୍ରବଳ ବର୍ଷା ଅନୁଭୂତ ହୋଇଛି। ବିଶେଷ କରି ଗଜପତି, ମାଲକାନାଗିରି ଏବଂ କୋରାପୁଟରେ ବର୍ଷା ହୋଇଛି। କେତେକ ସ୍ଥାନରେ ମାଟି ଅତଡା ଧସି ରାସ୍ତା ଜାମ କରିଥିବାର ଜଣାପଡିଛି। ତେବେ ରାଜ୍ୟରେ ବର୍ଷା ଆସନ୍ତାକାଲି ପର୍ଯ୍ୟନ୍ତ ଜାରୀ ରହିବ।