ରେଢ଼ାଖୋଲ (କନ୍ଦର୍ପ ବେହେରା): ରେଢାଖୋଲ ବନଖଣ୍ଡ ବଡବାହାଳ ରେଞ୍ଜ ଅଧିନସ୍ଥ ବଡକୁଡା ଜଙ୍ଗଲରୁ ଏକ ଦନ୍ତା ହାତୀ ମୃତ୍ୟୁ ବରଣ କରିଥିବା ସୂଚନା ମିଳିଛି। ଖବର ପାଇ ରେଢ଼ାଖୋଲ ବନବିଭାଗ ପଦାଧିକାରୀ ଘଟଣା ସ୍ଥଳରେ ପହଂଚିଥିଲେ।
ପ୍ରକାଶ ଯେ, ହାତୀର ମୃତଦେହ ଠାରୁ କିଛି ଦୂରରେ ବିଦ୍ୟୁତ ତାର ପଡିଥିବା ବନ ବିଭାଗ ଦେଖିବାକୁ ପାଇଥିଲା। ବନ ବିଭାଗ ତାର ଗୁଡିକୁ ଜବତ କରିଥିବା ବେଳେ ତଦନ୍ତ ଜାରି କରୁଛି। ହାତୀର ଆନୁମାନିକ ବୟସ ୧୫ବର୍ଷ ହେବ ବୋଲି ସୂଚନା ମିଳିଛି। ଗୋଟିଏ ବର୍ଷରେ ରେଢାଖୋଲ ବନଖଣ୍ଡରେ ୬ ହାତୀର ମ୍ରୁତ୍ୟବରଣ ହୋଇଥିବା ଜଣାଯାଏ।
ରେଢାଖୋଲ ବନଖଣ୍ଡ ନାକଟିଦେଉଳ ରେଞ୍ଜର ଘୋଷରାମାଳ ସେକ୍ସନର ବୁରୋମାଲ ଜଙ୍ଗଲରେ ଛୁଆ ହାତୀ ସମେତ ୩ଟି, ଚରଡପସି ଗ୍ରାମ ନିକଟରେ ୧ଟି,ଟିକିଲିପଡା ଗ୍ରାମ ଠାରେ ବିଦ୍ୟୁତ ଆଘାତରେ ଗୋଟିଏ ହାତୀର ମୃତ୍ୟୁକୁ ନେଇ ବନ ବିଭାଗର ମୁଣ୍ଡବ୍ୟଥାର କାରଣ ସାଜିଛି। ହାତୀ ମୃତ୍ୟୁ କୁ ନେଇ ବଡ଼ କୁଡା ଗ୍ରାମରେ ଗ୍ରାମବାସୀ ଙ୍କ ମଧ୍ୟରେ ଉତ୍ତେଜନା ପ୍ରକାଶ ପାଇଛି।
ଗ୍ରାମବାସୀ ଗଣମାଧ୍ୟମ ଆଗରେ ଅଭିଯୋଗ କରୁଛନ୍ତି ଯେ, ବନ ବିଭାଗର ଅବହେଳା ପାଇଁ ହାତୀର ଜୀବନ ଯାଇଛି, ରେଢାଖୋଲ ବନଖଣ୍ଡରେ ଡିଏଫଓ ଅନୁପସ୍ଥିତି ଥିବାରୁ ସମ୍ବଲପୁର ଡିଏଫଓ ପହଁଞ୍ଚି ତଦନ୍ତ କରିବା ସହ ଯିଏ ହାତୀର ମୃତ୍ୟୁର କାରଣ ତାଙ୍କ ପ୍ରତି କାର୍ଯ୍ୟାନୁଷ୍ଠାନ ନିଆ ଯିବ ବୋଲି ପ୍ରକାଶ କରିଛନ୍ତି। ଆସନ୍ତା କାଲି ହାତୀର ମୃତ ଦେହକୁ ବ୍ୟବଛେଦ କରାଯିବ ବୋଲି ବନବିଭାଗ ପ୍ରକାଶ କରିଛି।
