ଭାରତୀୟ ଜନତା ପାର୍ଟି (ବିଜେପି) ଆଗାମୀ ବିଧାନସଭା ନିର୍ବାଚନ ପାଇଁ ପ୍ରସ୍ତୁତି ଆରମ୍ଭ କରିଦେଇଛି। ଦିଲ୍ଲୀ, ମହାରାଷ୍ଟ୍ର, ହରିୟାଣା ଓ ଝାରଖଣ୍ଡ ଆଦି ଚାରୋଟି ରାଜ୍ୟର ବିଧାନସଭା ନିର୍ବାଚନ ପାଇଁ ନିର୍ବାଚନୀ ରଣନୀତି ପ୍ରସ୍ତୁତିରେ ବିଜେପି ଲାଗିପଡ଼ିଲାଣି। ଦିଲ୍ଲୀ ଛାଡ଼ି ଅନ୍ୟ ତିନୋଟି ରାଜ୍ୟରେ ବିଜେପିର ସରକାର ରହିଥିବାବେଳେ ବିଜେପି ବିଧାନସଭାରେ ଉତ୍ତମ ପ୍ରଦର୍ଶନ ତଥା ଦିଲ୍ଲୀରେ କ୍ଷମତା ପାଇଁ ଜୋରସୋର୍ ଉଦ୍ୟମ କରୁଛି। ବିଜେପି ଅଧ୍ୟକ୍ଷ ତଥା କେନ୍ଦ୍ରୀୟ ଗୃହମନ୍ତ୍ରୀ ଅମିତ୍ ଶାହା କେନ୍ଦ୍ର ମନ୍ତ୍ରୀ ପ୍ରକାଶ ଜାଭେଡ୍କରଙ୍କୁ ଦିଲ୍ଲୀର ନିର୍ବାଚନୀ ପ୍ରଭାବୀ ନିଯୁକ୍ତ କରିଛନ୍ତି। ସେହିପରି କେନ୍ଦ୍ରମନ୍ତ୍ରୀ ହରଦୀପ ସିଂହ ପୁରୀ ଓ ନିତ୍ୟାନନ୍ଦ ରାୟଙ୍କୁ ସହ ନିର୍ବାଚନ ପ୍ରଭାରୀ ରୂପେ ଚୟନ କରିଥିବାବେଳେ ବିଜେପିର ରାଷ୍ଟ୍ରୀୟ ଉପାଧ୍ୟକ୍ଷ ଶ୍ୟାମ ଜାଜୁଙ୍କୁ ପ୍ରଦେଶ ସଙ୍ଗଠନର ପ୍ରଭାରୀ ଓ ରାଷ୍ଟ୍ରୀୟ ସଚିବ ତରୁଣ ଚୁଘଙ୍କୁ ସହ ପ୍ରଭାରୀ ରୂପେ ଦାୟିତ୍ବ ଦେଇଛନ୍ତି। ସେହିପରି ହରିୟାଣା ପାଇଁ ନରେନ୍ଦ୍ର ସିଂହ ତୋମାରାଙ୍କୁ ନିର୍ବାଚନୀ ପ୍ରଭାରୀ ଓ ଭୂପେନ୍ଦ୍ର ସିଂଙ୍କୁ ସହ ନିର୍ବାଚନୀ ପ୍ରଭାରୀ ରୂପେ ନିଯୁକ୍ତ କରାଯାଇଛି। ଝାରଖଣ୍ଡ ପାଇଁ ଓମ୍ପକାଶ ମାଥୁରଙ୍କୁ ନିର୍ବାଚନୀ ପ୍ରଭାରୀ ଦାୟିତ୍ବ ଦିଆଯାଇଥିବାବେଳେ କିଶୋର ଯାଦବଙ୍କୁ ସହ ପ୍ରଭାରୀ ଦାୟିତ୍ବ ଦିଆଯାଇଛି। ମହାରାଷ୍ଟ୍ରରେ ଭୂପେନ୍ଦ୍ର ଯାଦବଙ୍କୁ ନିର୍ବାଚନୀ ପ୍ରଭାରୀ ରୂପେ ନିଯୁକ୍ତ ଦିଆଯାଇଥିବାବେଳେ କେଶବ ଚନ୍ଦ୍ର ମୋର୍ଯ୍ୟ ଓ ଲକ୍ଷ୍ମଣ ସବ୍ଦୀଙ୍କୁ ସହ ପ୍ରଭାରୀ ରୂପେ ଦାୟିତ୍ବ ଦିଆଯାଇଛି।
