ହରିୟାଣାର ମୁଖ୍ୟମନ୍ତ୍ରୀ ମନୋହର ଲାଲ ଖଟ୍ଟର ଏବଂ ରାଜ୍ୟସଭା ସାଂସଦ ବିଜୟ ଗୋୟଲ କାଶ୍ମିରୀ ମହିଳାଙ୍କ ବିଷୟରେ ଅଶାଳୀନ ମନ୍ତବ୍ୟ ପ୍ରଦାନ କରି ଅଡୁଆରେ ପଡିଛନ୍ତି । ଉଭୟଙ୍କ ବିରୋଧରେ ମାମଲା ରୁଜୁ କରାଯିବା ଉଚିତ୍ ବୋଲି ଦିଲ୍ଳୀ ମହିଳା କମିଶନ ମତ ଦେଇଛନ୍ତି । ଜମ୍ମୁ କାଶ୍ମୀରରୁ ଧାରା 370 ଉଚ୍ଛେଦ ହେବା ପରେ ଜମ୍ମୁ କାଶ୍ମୀର ଏବଂ ଲଦାଖ ଅଲଗା ଅଲଗା କେନ୍ଦ୍ରଶାସିତ ଅଞ୍ଚଳ ଭାବରେ ଘୋଷିତ ହୋଇଥିଲେ । ଜମ୍ମୁ କାଶ୍ମୀରରୁ ସ୍ବତନ୍ତ୍ର ପାହ୍ୟା ହଟିବା ପରେ ଏଠିକାର ମହିଳା ମାନେ ଦେଶର ଅଲଗା ପ୍ରାନ୍ତରେ ବିବାହର ସୁଯୋଗ ପାଇ ପାରିବେ ବୋଲି ଉଭୟ ନେତା ମତ ଦେଇଥିଲେ । ଏହା କେବଳ କାଶ୍ମିରୀ ମା ଓ ଭଉଣୀ ନୁହନ୍ତି ବରଂ ସମଗ୍ର ଦେଶର ମହିଳା ମାନଙ୍କ ପାଇଁ ଅପମାନଜନକ ମନ୍ତବ୍ୟ ବୋଲି ମହିଳା କମିଶନଙ୍କ ପକ୍ଷରୁ କୁହାଯାଇଛି ।
