ଭୁବନେଶ୍ୱର: ମହିଳା କୃଷକଙ୍କ ସଶକ୍ତିକରଣ ଏବଂ କୃଷି ବିକାଶରେ ମାନବାଧିକାର ଆଭିମୁଖ୍ୟକୁ ଆହୁରି ସୁଦୃଢ଼ କରିବା ଉଦ୍ଦେଶ୍ୟରେ ଜାତୀୟ ମାନବାଧିକାର କମିଶନ (ଏନଏଚଆରସି)ର ସ୍ୱତନ୍ତ୍ର ପର୍ଯ୍ୟବେକ୍ଷକ ପ୍ରଫେସର କନହୈୟା ତ୍ରିପାଠୀ ୨୧ ମାର୍ଚ୍ଚରେ ଭୁବନେଶ୍ୱର ସ୍ଥିତ ଆଇସିଏଆର-ସିଆଇଡବ୍ଲୁଏ ପରିଦର୍ଶନ କରିଥିଲେ।
ଆଇସିଏଆର-ସିଆଇଡବ୍ଲୁଏର ନିର୍ଦ୍ଦେଶକ ଡ଼ା. ମୃଦୁଲା ଦେବୀ ପ୍ରଫେସର ତ୍ରିପାଠୀ ଓ ସହଯୋଗୀ ଅଧିକାରୀମାନଙ୍କୁ ସ୍ୱାଗତ କରି ପ୍ରତିଷ୍ଠାନର ଲିଙ୍ଗ-ପ୍ରତିକ୍ରିୟାଶୀଳ ଗବେଷଣା ପ୍ରୟାସ ଏବଂ କୃଷି-ଖାଦ୍ୟ ବ୍ୟବସ୍ଥାରେ ମହିଳାମାନଙ୍କ ସଶକ୍ତିକରଣ ପାଇଁ ଗ୍ରହୀତ ବିଭିନ୍ନ ପଦକ୍ଷେପ ସମ୍ପର୍କରେ ଅବଗତ କରାଇଥିଲେ। ସେ ୨୦୨୬ ମସିହାକୁ ଅନ୍ତର୍ଜାତୀୟ ମହିଳା କୃଷକ ବର୍ଷ ଭାବେ ପାଳନ ପରିପ୍ରେକ୍ଷିରେ ଏହି ପରିଦର୍ଶନର ଗୁରୁତ୍ୱାରୋପ କରିଥିଲେ ଏବଂ ଏହାକୁ ପ୍ରତିଷ୍ଠାନ ପାଇଁ ଐତିହାସିକ ଅବସର ବୋଲି ବର୍ଣ୍ଣନା କରିଥିଲେ।
ଗସ୍ତ ସମୟରେ ପ୍ରଫେସର ତ୍ରିପାଠୀ ଆଇସିଏଆର-ସିଆଇଡବ୍ଲୁଏର ବୈଜ୍ଞାନିକ ଓ କର୍ମଚାରୀମାନଙ୍କ ସହିତ ଆଲୋଚନା କରି କୃଷି କ୍ଷେତ୍ରରେ ମହିଳାମାନଙ୍କ ଭୂମିକା ସୁଦୃଢ଼ କରିବାରେ ପ୍ରତିଷ୍ଠାନର ଅଗ୍ରଣୀ ପ୍ରୟାସକୁ ପ୍ରଶଂସା କରିଥିଲେ। ସେ ଜୀବିକା ସୁଯୋଗ ବୃଦ୍ଧି, ଲିଙ୍ଗକୁ ମୁଖ୍ୟଧାରାରେ ସାମିଲ କରିବା ଏବଂ ମିଳିତ ଗବେଷଣା ପଦକ୍ଷେପ ମାଧ୍ୟମରେ ଉଚ୍ଚ-ପ୍ରଭାବଶାଳୀ ପ୍ରକାଶନକୁ ଉତ୍ସାହିତ କରିବା ଉପରେ ଗୁରୁତ୍ୱାରୋପ କରିଥିଲେ। ସେ ଆଇସିଏଆର- ସିଆଇଡବ୍ଲୁଏର ସଫଳ ମଡେଲଗୁଡ଼ିକୁ ବିଶ୍ୱସ୍ତରୀୟ ପ୍ଲାଟଫର୍ମରେ ପ୍ରଦର୍ଶନ କରିବାକୁ ମଧ୍ୟ ପରାମର୍ଶ ଦେଇଥିଲେ।
ସେ ବିଶ୍ୱ ମାନବାଧିକାର ଢାଞ୍ଚା ସହିତ ସାଂଗଠନିକ ପଦକ୍ଷେପଗୁଡ଼ିକୁ ସମନ୍ୱୟ କରିବାର ଆବଶ୍ୟକତା ଉପରେ ମଧ୍ୟ ଜୋର ଦେଇଥିଲେ। ବିଶେଷକରି ମହିଳା ସଶକ୍ତିକରଣ ପାଇଁ କୃଷି ବିବିଧତା ସମ୍ପର୍କିତ ପ୍ରକଳ୍ପରେ ଜାତିସଂଘ ବିକାଶ କାର୍ଯ୍ୟକ୍ରମ (ୟୁଏନଡିପି) ସହିତ ରଣନୈତିକ ସହଯୋଗ ପାଇଁ ସେ ପରାମର୍ଶ ଦେଇଥିଲେ। ଏହିପରି ସହଭାଗୀତା ଆଇସିଏଆର-ସିଆଇଡବ୍ଲୁଏର କାର୍ଯ୍ୟର ପ୍ରସାର ଓ ବିଶ୍ୱସ୍ତରୀୟ ପ୍ରଭାବକୁ ବଢାଇବ ବୋଲି ସେ ମତ ପ୍ରକାଶ କରିଥିଲେ।
ନିଜ ଅଭିଭାଷଣରେ ପ୍ରଫେସର ତ୍ରିପାଠୀ ପ୍ରତିଷ୍ଠାନରେ ଗବେଷଣା, କ୍ଷମତା ନିର୍ମାଣ ଓ ନୀତି ସମର୍ଥନରେ ମାନବାଧିକାର ଆଭିମୁଖ୍ୟକୁ ବ୍ୟବସ୍ଥିତ ଭାବେ ସଂଲଗ୍ନ କରିବା ପାଇଁ ଏକ “ମାନବାଧିକାର ସେଲ୍” ସ୍ଥାପନା ପ୍ରସ୍ତାବ ରଖିଥିଲେ। ସେ କହିଥିଲେ ଯେ ଏପରି ସେଲ୍ କୃଷି ପ୍ରତିଷ୍ଠାନମାନଙ୍କ ମଧ୍ୟରେ ମାନବାଧିକାର ଶିକ୍ଷାକୁ ସମନ୍ୱିତ କରିବାରେ ଜାତୀୟ ମଡେଲ୍ ଭାବେ କାର୍ଯ୍ୟ କରିପାରିବ।
ପାରସ୍ପରିକ ଆଲୋଚନାରେ ସେ ଉଲ୍ଲେଖ କରିଥିଲେ ଯେ କୃଷି କ୍ଷେତ୍ରରେ ମହିଳାମାନେ କେବଳ ଶ୍ରମିକ ନୁହଁନ୍ତି, ବରଂ ମୌଳିକ ଅଧିକାର ସହିତ ପ୍ରାଥମିକ ଅଂଶୀଦାର। ଆଇସିଏଆର-ସିଆଇଡବ୍ଲୁଏର ନିର୍ଦ୍ଦେଶକ ଡ଼. ମୃଦୁଲା ଦେବୀ କହିଥିଲେ ଯେ ଏନଏଚଆରସିର ପ୍ରୟାସ ଲିଙ୍ଗ ସମାନତାକୁ ମୁଖ୍ୟଧାରାରେ ଆଣିବାରେ ସହାୟକ ହେବ ଏବଂ ମହିଳା କୃଷକଙ୍କ ସଶକ୍ତିକରଣକୁ ଆହୁରି ସୁଦୃଢ଼ କରିବ। ପରସ୍ପରିକ ସହଯୋଗ ଓ ମାନବାଧିକାର-ଭିତ୍ତିକ ଆଭିମୁଖ୍ୟକୁ ସୁଦୃଢ଼ କରିବାର ପ୍ରତିବଦ୍ଧତା ସହିତ ଏହି ପରିଦର୍ଶନର ସମାପ୍ତି ହୋଇଥିଲା।