ଚୌଦ୍ଵାର: ସମ୍ପ୍ରତି ବାଲିଅନ୍ତାର ଭିଡ ହିଂସା ମନରୁ ଯାଇନଥିବାବେଳେ ଗତକାଲି ବରହମପୁରଠାରେ ଦୁଇ ଯୁବକ ଯୁବତୀଙ୍କୁ ରାସ୍ତାଉପରେ କିଛି ଯୁବକ ଠେଙ୍ଗାରେ ପିଟି ପିଟି ମାରୁଥିବାର ଦେଖିବାକୁ ମିଳିଥିଲା। ଠିକ ସେମିତି ବାଲିଅନ୍ତା ଭିଡ଼ ହିଂସା ଘଟଣା ପରି ଚୌଦ୍ଵାର ଥାନା ଅଂଚଳରେ ଚୋର ସନ୍ଦେହରେ ପୁଣି ଏକ ସଂଘବଦ୍ଧ ଆକ୍ରମଣ ସାମ୍ନାକୁ । ଚୋର ସନ୍ଦେହରେ ଜଣେ ଯୁବକକୁ ଭାବେ ମରଣାନ୍ତକ ଆକ୍ରମଣର ଅଭିଯୋଗ ହୋଇଛି । ତେବେ ଏହି ସଂଘବଦ୍ଧ ଆକ୍ରମଣକାରୀଙ୍କ ମଧ୍ୟରୁ ତିନି ଜଣଙ୍କୁ କୋର୍ଟ ଚାଲାଣ କରାଯାଇଛି। ଆଉ କିଛି ଅଭିଯୁକ୍ତଙ୍କୁ ଚୌଦ୍ଵାର ଥାନା ପୁଲିସ ଖୋଜୁଛି ।
ମିଳିଥିବା ସୂଚନା ଅନୁସାରେ ଜଣେ ଗ୍ୟାରେଜ ଦୋକାନ ନିକଟରେ ବୁଲୁଥିବା ବେଳେ ତାକୁ ଚୋର ସନ୍ଦେହ କରି ଅଭିଯୁକ୍ତମାନେ ନିର୍ଦ୍ଧୁମ ଭାବେ ସଂଘବଦ୍ଧ ଆକ୍ରମଣ କରିଥିଲେ । ପୋଲିସ ଘଟଣାସ୍ଥଳରେ ପହଞ୍ଚି ସମ୍ପୃକ୍ତ ବ୍ୟକ୍ତିକୁ ଉଦ୍ଧାର କରି ସିସିଟିଭି ଯାଞ୍ଚ କରି ଥିଲା। ପରେ ଲୋକଟି ଚୋରୀ କରିବାକୁ ଆସି ନଥିବାର ଜଣାପଡିଥିଲା। ସିସିଟିଭି ଆଧାରରେ ପୋଲିସ ତଦନ୍ତ ଆରମ୍ଭ କରି ତିନି ଜଣ ଅଭିଯୁକ୍ତଙ୍କ ବିରୋଧରେ ସଙ୍ଗୀନ ଦଫା ଲଗାଇଛି।
ସୂଚନାଯୋଗ୍ୟ, ରାଜ୍ୟର ଆଇନ ଶୃଙ୍ଖଳା ପରିସ୍ଥିତି ସରକାରଙ୍କ ଆୟତ୍ତରେ ନଥିବା ପରି ଲାଗୁଛି । ରାଜ୍ୟସାରା ଚୋରୀ, ଅପରାଧୀ, ହତ୍ୟା, ଅପହରଣ ଘଟଣା ଘଟିବା ସହିତ ଭିଡ ହିଂସା ପରି ଘଟଣା ରାଜ୍ୟର ଆଇନ ଶୃଙ୍ଖଳାକୁ ଅଧିକ ବିପର୍ଯ୍ୟସ୍ତ କରିଦେଉଛି । ପୋଲିସ ପ୍ରତି କାହାର ଭୟ ନଥିବା ପରି ଲାଗୁଛି । ରାଜ୍ୟରେ ଆଇନ ଶୃଙ୍ଖଳା ପରିସ୍ଥିତିକୁ ସଜାଡିବା ଦିଗରେ ସରକାର ଯେ ଫେଲ ମାରୁଛନ୍ତି, ଏଥିରେ ସନ୍ଦେହ ନାହିଁ । ଅପରାଧ ଓ ଅପରାଧୀ ଦମନ କରିବା ଦିଗରେ ସରକାରଙ୍କ ପାରିବା ପଣିଆ ଏବେ ପଦାରେ ପଡିଲାଣି । ତେବେ ଏଇ ଦିଗରେ ସରକାର ଦୃଢ ତଥା ଦୃଷ୍ଟାନ୍ତମୂଳକ ପଦକ୍ଷେପ ନେବା ଅତ୍ୟନ୍ତ ଜରୁରୀ ।
