ନୂଆଦିଲ୍ଲୀ: ନୂଆଦିଲ୍ଲୀରେ ଅନୁଷ୍ଠିତ ଏକ ପ୍ରମୁଖ ବିଶ୍ୱ ସମ୍ମିଳନୀରେ ଯୋଗଦେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ବିଶ୍ୱ ସ୍ତରରେ ଶକ୍ତିଶାଳୀ ଅନ୍ତର୍ଜାତୀୟ ପ୍ରତିଷ୍ଠାନ ଗଠନ, ବିକାଶଶୀଳ ଦେଶ ବା ଗ୍ଲୋବାଲ୍ ସାଉଥ୍ର ସ୍ୱରକୁ ଅଧିକ ଦୃଢ଼ କରିବା ଏବଂ ବିପର୍ଯ୍ୟୟ ସମୟରେ ପ୍ରଭାବଶାଳୀ ଆନ୍ତର୍ଜାତୀୟ ସହଯୋଗ ଉପରେ ଗୁରୁତ୍ୱାରୋପ କରିଛନ୍ତି। ଏହି ଅବସରରେ ସେ ମଧ୍ୟ କଂଗ୍ରେସ ଦଳ ଏବଂ ଏହାର ନେତୃତ୍ୱକୁ କଡ଼ା ସମାଲୋଚନା କରି କଂଗ୍ରେସ ନିଜ ନେତାଙ୍କୁ ରାଜନୈତିକ ଉଦ୍ଦେଶ୍ୟ ହାସଲରେ ବାରମ୍ବାର ବିଫଳ ହେଉଛି ବୋଲି ବର୍ଷିଛନ୍ତି।
ସମ୍ମିଳନୀରେ ଉଦବୋଧନ ଦେଇ ପ୍ରଧାନମନ୍ତ୍ରୀ ମୋଦି କହିଛନ୍ତି ଯେ ବର୍ତ୍ତମାନର ବଦଳୁଥିବା ବିଶ୍ୱ ପରିସ୍ଥିତି ଏବଂ ନୂତନ ଆହ୍ୱାନଗୁଡ଼ିକ ସହ ତାଳ ଦେଇ ଚାଲିବାରେ ଜାତିସଂଘ ଭଳି ବିଶ୍ୱସ୍ତରୀୟ ପ୍ରତିଷ୍ଠାନଗୁଡ଼ିକ ଏକପ୍ରକାର ସଂଘର୍ଷ କରୁଛନ୍ତି। ଆଜିର ଦୁନିଆରେ ବାଣିଜ୍ୟ, ପ୍ରଯୁକ୍ତିବିଦ୍ୟା ଏବଂ ସମୁଦ୍ର ପଥଗୁଡ଼ିକୁ କିପରି ଅସ୍ତ୍ରଶସ୍ତ୍ର ଭାବରେ ବ୍ୟବହାର କରାଯାଉଛି, ସେନେଇ ସେ ଗଭୀର ଚିନ୍ତା ପ୍ରକାଶ କରିଛନ୍ତି। ଏକ ସୁଦୃ଼ଢ଼ ବିଶ୍ୱ ବ୍ୟବସ୍ଥାର ଆବଶ୍ୟକତା ରହିଛି, ଯାହାକି ଶକ୍ତିଶାଳୀ ଦେଶମାନଙ୍କ ଦ୍ୱାରା ଦୁର୍ବଳ ବା ଅସହାୟ ରାଷ୍ଟ୍ରଗୁଡ଼ିକର ଶୋଷଣକୁ ରୋକିପାରିବ। ପ୍ରାଚୀନ ଭାରତୀୟ ମନୀଷୀ ଆଚାର୍ଯ୍ୟ ଚାଣକ୍ୟଙ୍କ ଏକ ପ୍ରସିଦ୍ଧ ଶ୍ଳୋକକୁ ଉଦ୍ଧାର କରି ସେ ବୁଝାଇଥିଲେ ଯେ ଯେଉଁଠାରେ ଆଇନ ଏବଂ ଶୃଙ୍ଖଳାର ଅଭାବ ରହିଥାଏ, ସେଠାରେ ବଳଶାଳୀ ବ୍ୟକ୍ତି କିମ୍ବା ରାଷ୍ଟ୍ର ଦୁର୍ବଳ ଉପରେ ଅତ୍ୟାଚାର କରିଥାଏ। ପୃଥିବୀରେ ଏଭଳି ପରିସ୍ଥିତିର କୌଣସି ଆବଶ୍ୟକତା ନାହିଁ, ବରଂ ଏଭଳି ଅନ୍ୟାୟକୁ ରୋକିବା ପାଇଁ ଏକ ସୁସ୍ଥ ବ୍ୟବସ୍ଥା ଆବଶ୍ୟକ ବୋଲି ସେ ମତବ୍ୟକ୍ତ କରିଛନ୍ତି।
ବିଶ୍ୱ ସହଯୋଗ କ୍ଷେତ୍ରରେ ଭାରତର ଭୂମିକାକୁ ସ୍ମରଣ କରି ପ୍ରଧାନମନ୍ତ୍ରୀ କହିଛନ୍ତି ଯେ କୋଭିଡ୍ ମହାମାରୀ ସମୟରେ ବିଶ୍ୱ ଏହାର ଏକ ଜ୍ୱଳନ୍ତ ଉଦାହରଣ ଦେଖିଛି। ଭାରତ କେବଳ ନିଜ ଦେଶର ଆବଶ୍ୟକତା ପୂରଣ କରି ନଥିଲା, ବରଂ ବିଶ୍ୱର ପ୍ରତ୍ୟେକ ଆବଶ୍ୟକ କରୁଥିବା ଦେଶକୁ କରୋନା ଟିକା ଏବଂ ଶହେରୁ ଅଧିକ ଦେଶକୁ ଜୀବନରକ୍ଷାକାରୀ ଔଷଧ ଯୋଗାଇ ଦେଇଥିଲା। ବଦଳୁଥିବା ବିଶ୍ୱ ବ୍ୟବସ୍ଥା ଆଜି ଶକ୍ତିଶାଳୀ ବିଶ୍ୱ ପ୍ରତିଷ୍ଠାନ, ଗ୍ଲୋବାଲ୍ ସାଉଥ୍ର ଦୃଢ଼ ପ୍ରତିନିଧିତ୍ୱ ଏବଂ ବିପଦ ସମୟରେ ଦୃଢ଼ ଭାବରେ ଠିଆ ହୋଇଥିବା ଆନ୍ତର୍ଜାତୀୟ ସହଯୋଗକୁ ଅଧିକ କାମନା କରୁଛି। ଆଗାମୀ ଦିନରେ ଏକ ବିକଶିତ ରାଷ୍ଟ୍ର ହେବାର ଭାରତର ଯେଉଁ ଲକ୍ଷ୍ୟ ରହିଛି, ତାହା କେବଳ ଆଭ୍ୟନ୍ତରୀଣା ମହତ୍ତ୍ୱ ଆକାଂକ୍ଷା ମଧ୍ୟରେ ସୀମିତ ନୁହେଁ, ବରଂ ଏହା ସମଗ୍ର ବିଶ୍ୱ ପାଇଁ ଏକ ଉନ୍ନତ ଭବିଷ୍ୟତର ପ୍ରତିଶ୍ରୁତି ଅଟେ।
ଏହି ସମୟରେ କଂଗ୍ରେସ ଦଳକୁ କଡ଼ା ସମାଲୋଚନା କରି ପ୍ରଧାନମନ୍ତ୍ରୀ କହିଛନ୍ତି ଯେ କଂଗ୍ରେସର ନେତୃତ୍ୱ ଆଜି ନିଜ ଦଳ ପାଇଁ ଏକ ବୋଝ ପାଲଟିଯାଇଛି। ସେମାନେ ବାରମ୍ବାର ନିଜର ଦଳୀୟ ନେତାଙ୍କୁ ରାଜନୈତିକ ସ୍ତରରେ ପ୍ରତିଷ୍ଠିତ କରିବା ପାଇଁ ବିଫଳ ପ୍ରୟାସ ଜାରି ରଖିଛନ୍ତି। ଦେଶର ମହାକାଶ କାର୍ଯ୍ୟକ୍ରମ ସହ ତୁଳନା କରି ସେ ବ୍ୟଙ୍ଗ କରି କହିଛନ୍ତି ଯେ, ଗୋଟିଏ ବର୍ଷ ଭାତରେ ଆମେ ଶ୍ରୀହରିକୋଟାରୁ ଯେତିକି ରକେଟ୍ ଲଞ୍ଚ କରିନଥାଉ, କଂଗ୍ରେସ ଦଳ ନିଜର ନେତାଙ୍କୁ ଲଞ୍ଚ କରିବା ପାଇଁ ତାହାଠାରୁ ଅଧିକ ବିଫଳ ପ୍ରୟାସ କରିଥାଏ। ଦେଶର ଭାଗ୍ୟକୁ ଏଭଳି ଏକ ‘ଫେଲ୍ଡ ପ୍ରଡକ୍ଟ’ ପଛରେ କେତେଦିନ ପର୍ଯ୍ୟନ୍ତ ବନ୍ଧା ପକାଯିବ ବୋଲି ସେ ପ୍ରଶ୍ନ କରିଛନ୍ତି। ଏହା ସହିତ କିଛି ଲୋକ ଦେଶ ବାହାରକୁ ଯାଇ ଭାରତର ସୁନାମକୁ କ୍ଷୁଣ୍ଣ କରୁଛନ୍ତି ଏବଂ ବିଦେଶୀ ଶକ୍ତିମାନଙ୍କୁ ଦେଶର ଆଭ୍ୟନ୍ତରୀଣ ବ୍ୟାପରରେ ହସ୍ତକ୍ଷେପ କରିବା ପାଇଁ ଅନୁରୋଧ କରୁଛନ୍ତି ବୋଲି ସେ ଗମ୍ଭୀର ଅଭିଯୋଗ ଆଣିଛନ୍ତି।