ନୂଆଦିଲ୍ଲୀ: ବିରୋଧୀ ଦଳମାନଙ୍କ ମହାମେଣ୍ଟ ‘ଇଣ୍ଡି’ର ଏକତାକୁ ନେଇ ପୁଣିଥରେ ପ୍ରଶ୍ନ ଉଠିଛି। ଜୁନ୍ ୮ରେ କଂଗ୍ରେସ ଡାକିଥିବା ଗୁରୁତ୍ୱପୂର୍ଣ୍ଣ ବୈଠକ ପୂର୍ବରୁ ମେଣ୍ଟ ଭିତରେ ମତଭେଦ ସ୍ପଷ୍ଟ ହୋଇପଡ଼ିଛି। ପ୍ରଥମେ ଡିଏମକେ ବୈଠକରେ ଯୋଗ ନ ଦେବାର ସଙ୍କେତ ଦେଇଥିବା ବେଳେ, ଏବେ ସିପିଆଇ(ଏମ୍) ଓ ଝାଡ଼ଖଣ୍ଡ ମୁକ୍ତି ମୋର୍ଚ୍ଚା (ଜେଏମ୍ଏମ୍) ମଧ୍ୟ କଂଗ୍ରେସର କାର୍ଯ୍ୟପ୍ରଣାଳୀ ପ୍ରତି ଅସନ୍ତୋଷ ଜଣାଇ ବୈଠକରୁ ଦୂରେ ରହିବାକୁ ନିଷ୍ପତ୍ତି ନେଇଛନ୍ତି।
ମେଣ୍ଟର ଦୁଇ ପ୍ରମୁଖ ସହଯୋଗୀଙ୍କ ଏହି ମନୋଭାବ କଂଗ୍ରେସ ପାଇଁ ଚିନ୍ତାର କାରଣ ହୋଇଛି। ଝାଡ଼ଖଣ୍ଡର ରାଜ୍ୟସଭା ନିର୍ବାଚନକୁ ନେଇ ଜେଏମ୍ଏମ୍ କ୍ଷୁବ୍ଧ ଥିବା ବେଳେ, କେରଳରେ ନିର୍ବାଚନୀ ପ୍ରଚାର ସମୟରେ କଂଗ୍ରେସ ନେତାଙ୍କ ଆକ୍ରମଣାତ୍ମକ ମନ୍ତବ୍ୟ ସିପିଆଇ(ଏମ୍)କୁ ଅସନ୍ତୁଷ୍ଟ କରିଛି।
ସିପିଆଇ(ଏମ୍) ସାଧାରଣ ସମ୍ପାଦକ ଏମ୍.ଏ. ବେବୀ କଂଗ୍ରେସ ଅଧ୍ୟକ୍ଷ ମଲ୍ଲିକାଜର୍ଜୁନ ଖଡ଼ଗେଙ୍କୁ ଲେଖିଥିବା ଏକ ପତ୍ରରେ କେରଳ ନିର୍ବାଚନ ସମୟରେ ଦଳ ବିରୋଧରେ ହୋଇଥିବା ପ୍ରଚାରକୁ ନେଇ ତୀବ୍ର ଆପତ୍ତି ଉଠାଇଛନ୍ତି। ପତ୍ରରେ ସେ ଉଲ୍ଲେଖ କରିଛନ୍ତି ଯେ କଂଗ୍ରେସ ନେତାମାନେ ବାରମ୍ବାର ସିପିଆଇ(ଏମ୍) ଓ ବିଜେପି ମଧ୍ୟରେ ଗୁପ୍ତ ବୁଝାପଡ଼ା ଥିବା ଅଭିଯୋଗ କରିଥିଲେ।
ବେବୀଙ୍କ ଅଭିଯୋଗ ଅନୁଯାୟୀ, ରାହୁଲ ଗାନ୍ଧୀ, ପ୍ରିୟଙ୍କା ଗାନ୍ଧୀ ଭଦ୍ରା ଓ ଖଡ଼ଗେ ନିଜେ ମଧ୍ୟ କେରଳର ବାମ ସରକାର ଏବଂ ପୂର୍ବତନ ମୁଖ୍ୟମନ୍ତ୍ରୀ ପିନାରାୟ ବିଜୟନ ଙ୍କୁ ଲକ୍ଷ୍ୟ କରି କଠୋର ଟିପ୍ପଣୀ ଦେଇଥିଲେ। ଏପରି ଅଭିଯୋଗ ମେଣ୍ଟର ପରସ୍ପର ବିଶ୍ୱାସକୁ କ୍ଷତିଗ୍ରସ୍ତ କରିଥିବା ସେ କହିଛନ୍ତି।
ଅନ୍ୟପଟେ ଝାଡ଼ଖଣ୍ଡରେ ଦୁଇଟି ରାଜ୍ୟସଭା ଆସନ ମଧ୍ୟରୁ ଗୋଟିଏ ପାଇଁ କଂଗ୍ରେସ ଏକତରଫା ଭାବେ ପ୍ରାର୍ଥୀ ଘୋଷଣା କରିଥିବାରୁ ଜେଏମ୍ଏମ୍ ନାରାଜ ହୋଇଛି। ଦଳର ମତ ଅନୁଯାୟୀ, ସହଯୋଗୀ ଦଳ ସହ ଆଲୋଚନା ନକରି ନିଷ୍ପତ୍ତି ନେବା ମେଣ୍ଟର ଆତ୍ମା ସହ ସମଞ୍ଜସ ନୁହେଁ।
ସୂତ୍ର ଅନୁସାରେ, ଝାଡ଼ଖଣ୍ଡ ମୁଖ୍ୟମନ୍ତ୍ରୀ ହେମନ୍ତ ସୋରେନ ଉଭୟ ଆସନରେ ନିଜ ଦଳର ପ୍ରାର୍ଥୀ ଦେବାକୁ ଇଚ୍ଛୁକ ଥିଲେ। କିନ୍ତୁ କଂଗ୍ରେସ ପକ୍ଷରୁ ଖଡ଼ଗେଙ୍କ କାର୍ଯ୍ୟାଳୟ ସହ ଜଡ଼ିତ ପ୍ରଣବ ଝାଙ୍କୁ ପ୍ରାର୍ଥୀ କରାଯିବା ପରେ ଜେଏମ୍ଏମ୍ ଅସନ୍ତୋଷ ପ୍ରକାଶ କରିଛି।
ଇଣ୍ଡି ମେଣ୍ଟର ଜଣେ ବରିଷ୍ଠ ନେତାଙ୍କ ମତରେ, ଏହି ବିବାଦଗୁଡ଼ିକ କେବଳ ଦଳୀୟ ମତଭେଦ ନୁହେଁ, ବରଂ ମେଣ୍ଟ ଭିତରେ ସମନ୍ୱୟ ଅଭାବର ସୂଚନା ଦେଉଛି। ସହଯୋଗୀ ଦଳମାନଙ୍କ ମତାମତକୁ ଗୁରୁତ୍ୱ ନ ଦେଲେ ଭବିଷ୍ୟତରେ ଏହି ଅସନ୍ତୋଷ ଆହୁରି ବଢ଼ିପାରେ।
ଜୁନ୍ ୮ର ବୈଠକ ପୂର୍ବରୁ ଡିଏମକେ, ସିପିଆଇ(ଏମ୍) ଓ ଜେଏମ୍ଏମ୍ର ଏହି ଦୂରତା ଇଣ୍ଡି ମେଣ୍ଟର ଆଭ୍ୟନ୍ତରୀଣ ଏକତା ଓ ନେତୃତ୍ୱ ଶୈଳୀକୁ ନେଇ ନୂଆ ଚର୍ଚ୍ଚା ଆରମ୍ଭ କରିଛି। ଏବେ ନଜର ରହିଛି କଂଗ୍ରେସ କିପରି ସହଯୋଗୀ ଦଳମାନଙ୍କ ଅସନ୍ତୋଷ ଦୂର କରି ମେଣ୍ଟକୁ ଏକଜୁଟ ରଖିବାରେ ସଫଳ ହୁଏ।