ରେଢ଼ାଖୋଲ: ସମ୍ବଲପୁର ଜିଲ୍ଲାର ନାକଟିଦେଉଳ ଥାନା ଅନ୍ତର୍ଗତ କୁଞ୍ଜାମୁରା ଗ୍ରାମରେ ଯୁବତୀ ଅପହରଣ ଅଭିଯୋଗକୁ କେନ୍ଦ୍ର କରି କଙ୍ଗାରୁ କୋର୍ଟ ଭଳି ଘଟଣା ଘଟିଥିବା ଅଭିଯୋଗ ଉଠିଛି। ଗ୍ରାମବାସୀ ୩ ଯୁବକଙ୍କୁ ଘଣ୍ଟା ଘଣ୍ଟା ଧରି ନିର୍ଦ୍ଧୁମ ମାଡ଼ ମାରିବା ସହ ସେମାନେ ଆସିଥିବା କାରକୁ ମଧ୍ୟ ଭାଙ୍ଗିଚୁରି କରିଥିବା ଅଭିଯୋଗ ହୋଇଛି। ତେବେ ଏହି ଘଟଣାରେ ଆଇନକୁ ହାତକୁ ନେଇଥିବା ଲୋକଙ୍କ ବିରୋଧରେ ପୋଲିସ କୌଣସି କାର୍ଯ୍ୟାନୁଷ୍ଠାନ ନ ନେଇଥିବାରୁ ପୋଲିସର ଭୂମିକାକୁ ନେଇ ପ୍ରଶ୍ନ ଉଠିଛି।
ସୂଚନା ଅନୁଯାୟୀ, ରେଢ଼ାଖୋଲ ଥାନା ଅନ୍ତର୍ଗତ ଡ଼ଇଁଚା ଅଞ୍ଚଳର ୩ରୁ ୪ ଜଣ ଯୁବକ କୁଞ୍ଜାମୁରା ଗ୍ରାମର ଜଣେ ପରିଚିତ ଯୁବତୀଙ୍କ ଜନ୍ମଦିନ ଅବସରରେ ଉପହାର ଦେବା ପାଇଁ ସେଠାକୁ ଯାଇଥିଲେ। ଯୁବତୀ ନିକଟସ୍ଥ ଏକ ନିଛାଟିଆ ସ୍ଥାନକୁ ସାଇକେଲରେ ଆସି ସେମାନଙ୍କୁ ଭେଟିଥିଲେ। ଏହି ସମୟରେ ଗ୍ରାମର କିଛି ଯୁବକ ସେମାନଙ୍କୁ ଦେଖିଥିବା କୁହାଯାଉଛି।
ଏହା ପରେ ସନ୍ଧ୍ୟା ସମୟରେ ଗ୍ରାମର ଶତାଧିକ ଲୋକ ଯୁବକମାନଙ୍କ କାରକୁ ଅଟକାଇ ସେମାନଙ୍କ ଉପରେ ଆକ୍ରମଣ କରିଥିଲେ। ଅଭିଯୋଗ ଅନୁଯାୟୀ, ସେମାନଙ୍କୁ ଗ୍ରାମକୁ ନେଇ ସନ୍ଧ୍ୟାରୁ ରାତି ପ୍ରାୟ ୧୦ଟା ପର୍ଯ୍ୟନ୍ତ ନିର୍ଦ୍ଧୁମ ମାଡ଼ ମରାଯାଇଥିଲା। ଏହା ସହ ସେମାନଙ୍କ କାରକୁ ମଧ୍ୟ ଭାଙ୍ଗିଚୁରି କରାଯାଇଥିବା ଅଭିଯୋଗ ହୋଇଛି।
ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ଯୁବକମାନଙ୍କୁ ଉଦ୍ଧାର କରିଥିଲେ। ତେବେ ପୋଲିସ ଉପସ୍ଥିତିରେ ମଧ୍ୟ କିଛି ଲୋକ ସେମାନଙ୍କ ଉପରେ ଆକ୍ରମଣ ଜାରି ରଖିଥିବା ଅଭିଯୋଗ ହୋଇଛି। ଏହା ସତ୍ତ୍ୱେ ଆକ୍ରମଣକାରୀଙ୍କ ବିରୋଧରେ କୌଣସି ଗିରଫଦାରୀ ହୋଇନଥିବା ଜଣାପଡ଼ିଛି।
ଅନ୍ୟପଟେ, ଯୁବତୀଙ୍କ ବାପାଙ୍କ ଲିଖିତ ଅଭିଯୋଗ ଆଧାରରେ ନାକଟିଦେଉଳ ଥାନାରେ ଏକ ମାମଲା ରୁଜୁ ହୋଇଛି। ପୋଲିସ ଏହି ମାମଲାରେ ୩ ଜଣଙ୍କୁ ଗିରଫ କରି କୋର୍ଟ ଚାଲାଣ କରିଥିବା ପ୍ରେସ ବିଜ୍ଞପ୍ତିରେ ସୂଚନା ଦେଇଛି। ଗିରଫ ହୋଇଥିବା ଅଭିଯୁକ୍ତମାନେ ହେଲେ ଡ଼ଇଁଚା ଗ୍ରାମର ମିଲନ ସାହୁ (୨୧), ତଣ୍ଡାବିରା ଗ୍ରାମର ଝସକେତନ ସାହୁ ଏବଂ କୁଞ୍ଜାମୁରା ଗ୍ରାମର ସାଗର (୩୮)।
ପୋଲିସ ସୂଚନା ଅନୁଯାୟୀ, ନାକଟିଦେଉଳ ଥାନା କେସ୍ ନଂ ୧୧୪/୩୧.୦୭.୨୦୨୬ରେ ଭାରତୀୟ ନ୍ୟାୟ ସଂହିତା (BNS)ର ଧାରା ୧୩୭(୨) ଓ ୩(୫) ଅନୁଯାୟୀ ମାମଲା ରୁଜୁ କରାଯାଇଛି।
ତେବେ ଘଟଣା ପରେ ସବୁଠାରୁ ବଡ଼ ପ୍ରଶ୍ନ ହେଉଛି, ଯଦି ଯୁବକମାନଙ୍କ ବିରୋଧରେ ଅପହରଣ ଅଭିଯୋଗ ଥିଲା, ତେବେ ସେମାନଙ୍କୁ ଆଇନ ଅନୁଯାୟୀ ପୋଲିସ ହାତକୁ ନ ଦେଇ ଗ୍ରାମବାସୀ କାହିଁକି ଆଇନକୁ ହାତକୁ ନେଲେ ? ତେବେ ଆଇନକୁ ହାତକୁ ନେଇଥିବା ଲୋକଙ୍କ ବିରୋଧରେ ପୋଲିସ କେବେ କାର୍ଯ୍ୟାନୁଷ୍ଠାନ ନେବ, ତାହା ଉପରେ ଏବେ ସମସ୍ତଙ୍କ ନଜର ରହିଛି।