ବାଣପୁର: ଗୋଦାବରୀଶ ମହାବିଦ୍ୟାଳୟ, ବାଣପୁରର ଶକ୍ତିଶ୍ରୀ ସଶକ୍ତିକରଣ ପ୍ରକୋଷ୍ଠ ପକ୍ଷରୁ “ଜଗନ୍ନାଥ ସଂସ୍କୃତିରେ ନାରୀତତ୍ତ୍ୱ” ଶୀର୍ଷକ ଏକ ମନୋଜ୍ଞ ଓ ଜ୍ଞାନବର୍ଦ୍ଧକ ଆଲୋଚନାଚକ୍ର ମହାବିଦ୍ୟାଳୟର ଅଡିଟୋରିୟମ୍ ହଲ୍ରେ ଅନୁଷ୍ଠିତ ହୋଇଯାଇଛି।
ମହାବିଦ୍ୟାଳୟର ଅଧ୍ୟକ୍ଷ ଡଃ ଏସ୍.ପି.ଏନ୍.ଏସ୍. ବର୍ମା ସଭାପତିତ୍ୱ କରିଥିବା ଏହି କାର୍ଯ୍ୟକ୍ରମରେ ତିରୁପତି ସଂସ୍କୃତ ବିଶ୍ୱବିଦ୍ୟାଳୟ, ଆନ୍ଧ୍ରପ୍ରଦେଶର ପ୍ରଫେସର ଭାରତୀ ଭୂଷଣ ରଥ ମୁଖ୍ୟ ବକ୍ତା ଭାବେ ଯୋଗଦେଇଥିଲେ। ଜଗନ୍ନାଥ ଚେତନା, ଓଡ଼ିଆ ସଂସ୍କୃତି ଏବଂ ନାରୀତତ୍ତ୍ୱର ଗଭୀର ସମ୍ପର୍କ ଉପରେ ତାଙ୍କର ଅତ୍ୟନ୍ତ ସୁନ୍ଦର, ଗଭୀର ଓ ମନୋମୁଗ୍ଧକର ବକ୍ତବ୍ୟ ଉପସ୍ଥିତ ସମସ୍ତଙ୍କୁ ମନ୍ତ୍ରମୁଗ୍ଧ କରିଥିଲା। ତାଙ୍କର ଅଦ୍ଭୁତ ବାକ୍ଚାତୁରୀ ଓ ତାତ୍ତ୍ୱିକ ବିଶ୍ଳେଷଣ ଦୁଇ ଘଣ୍ଟା ଧରି ଶ୍ରୋତାମାନଙ୍କୁ ଏକାଗ୍ର ଭାବେ ବାନ୍ଧି ରଖିଥିଲା।
ଶକ୍ତିଶ୍ରୀ ପ୍ରକୋଷ୍ଠର ସଂଯୋଜିକା ଶ୍ରୀମତୀ ମନସ୍ପିତା ପାଲ ପ୍ରାରମ୍ଭିକ ଅଭିଭାଷଣ ପ୍ରଦାନ କରି ଅତିଥି ଓ ଶ୍ରୋତାମାନଙ୍କୁ ସ୍ୱାଗତ କରିଥିଲେ। ମହାବିଦ୍ୟାଳୟର ପ୍ରଶାସନିକ ବର୍ସାର ଶ୍ରୀ ଆଦିତ୍ୟ ସାରଥୀ ବେଦମାତା ମଧ୍ୟ ମଞ୍ଚାସୀନ ଥିଲେ।
ଏହି ଆଲୋଚନାଚକ୍ରରେ ୩୫୦ରୁ ଅଧିକ ଛାତ୍ରଛାତ୍ରୀ, ୩୦ରୁ ଅଧିକ ଅଧ୍ୟାପକ-ଅଧ୍ୟାପିକା ଏବଂ ୨୦ରୁ ଅଧିକ ବାହ୍ୟ ବୁଦ୍ଧିଜୀବୀ ଯୋଗଦେଇଥିଲେ। ବକ୍ତାଙ୍କର ମୂଲ୍ୟବାନ ଓ ଚମତ୍କାର ବକ୍ତବ୍ୟ ଶୁଣିବା ପାଇଁ ସମଗ୍ର ଅଡିଟୋରିୟମ୍ ହଲ୍ ଶ୍ରୋତାଙ୍କ ଉପସ୍ଥିତିରେ ପରିପୂର୍ଣ୍ଣ ହୋଇଯାଇଥିଲା।
ପ୍ରାୟ ଦୁଇ ଘଣ୍ଟା ଧରି ସମଗ୍ର ପରିବେଶ “ଜୟ ଜଗନ୍ନାଥ” ଧ୍ୱନିରେ ମୁଖରିତ ହୋଇ ଏକ ଅତ୍ୟନ୍ତ ପବିତ୍ର ଓ ଆଧ୍ୟାତ୍ମିକ ପରିବେଶ ସୃଷ୍ଟି କରିଥିଲା। ଜଗନ୍ନାଥ ଚେତନା, ନାରୀର ମର୍ଯ୍ୟାଦା, ସମାନତା ଓ ସଶକ୍ତିକରଣର ବାର୍ତ୍ତା ଉପସ୍ଥିତ ଶ୍ରୋତାଙ୍କ ମନରେ ଗଭୀର ପ୍ରଭାବ ପକାଇଥିଲା।
ଏହି ଆଲୋଚନାଚକ୍ର କେବଳ ଏକ ଶିକ୍ଷାମୂଳକ କାର୍ଯ୍ୟକ୍ରମ ନ ହୋଇ ଜଗନ୍ନାଥ ଚେତନା, ଆଧ୍ୟାତ୍ମିକତା ଓ ନାରୀ ସଶକ୍ତିକରଣର ଏକ ଅପୂର୍ବ ସମନ୍ୱୟର ଅନୁଭୂତି ପ୍ରଦାନ କରିଥିଲା । କାର୍ଯ୍ୟକ୍ରମଟି ଉପସ୍ଥିତ ସମସ୍ତଙ୍କ ମନରେ ଏକ ଅବିସ୍ମରଣୀୟ ଅନୁଭୁତି ଛାଡି ଯାଇଥିଲା ।