ଖଲ୍ଲିକୋଟ: ଖୋର୍ଦ୍ଧା-ଗଞ୍ଜାମ ସୀମାନ୍ତ ଜଳିଶଙ୍ଖ ନିକଟରେ ଘଟିଛି ଏକ ମର୍ମନ୍ତୁଦ ସଡ଼କ ଦୁର୍ଘଟଣା। ଯାତ୍ରୀଙ୍କୁ ନେଇ ଯାଉଥିବା ଏକ ଅଟୋକୁ କଣ୍ଟେନର ଧକ୍କା ଦେବାରୁ ଗୋଟିଏ ପରିବାରର ୧୧ ଜଣ ଆହତ ହୋଇଛନ୍ତି। ଏହି ଦୁର୍ଘଟଣାରେ ଲିଫ୍ଟ ମାଗି ଅଟୋରେ ଯାଉଥିବା ରମ୍ଭା ଗାଁର ଜଣେ ୧୭ ବର୍ଷୀୟ ନାବାଳକଙ୍କ ମୃତ୍ୟୁ ଘଟିଛି।
ସୂଚନା ଅନୁଯାୟୀ, ପଥରା ଗାଁର ଏକ ପରିବାରର ସଦସ୍ୟମାନେ ଅଟୋରେ ଯାଉଥିଲେ। ଏହି ସମୟରେ ଜଳିଶଙ୍ଖ ନିକଟରେ ଅଟୋଟି ଯାଉଥିବାବେଳେ ଏକ କଣ୍ଟେନର ତାହାକୁ ଧକ୍କା ଦେଇଥିଲା। ଧକ୍କା ଏତେ ଜୋରଦାର ଥିଲା ଯେ ଅଟୋରେ ଥିବା ଯାତ୍ରୀମାନେ ଗୁରୁତର ଭାବେ ଆହତ ହୋଇଥିଲେ।
ଦୁର୍ଘଟଣା ସମୟରେ ରମ୍ଭା ଅଞ୍ଚଳର ଜଣେ ୧୭ ବର୍ଷୀୟ ନାବାଳକ ଲିଫ୍ଟ ମାଗି ଅଟୋରେ ଯାଉଥିଲେ। ଦୁର୍ଘଟଣାରେ ସେ ଗୁରୁତର ଆହତ ହେବା ପରେ ତାଙ୍କର ମୃତ୍ୟୁ ଘଟିଥିବା ଜଣାପଡ଼ିଛି।
ଅନ୍ୟପକ୍ଷରେ, ଦୁର୍ଘଟଣାରେ ଆହତ ହୋଇଥିବା ୧୧ ଜଣଙ୍କ ମଧ୍ୟରେ ୭ ଜଣ ଛୋଟ ପିଲା ରହିଛନ୍ତି। ଆହତ ସମସ୍ତେ ପଥରା ଗାଁର ବୋଲି ସୂଚନା ମିଳିଛି। ଦୁର୍ଘଟଣା ପରେ ଘଟଣାସ୍ଥଳରେ ଚାଞ୍ଚଲ୍ୟ ଖେଳିଯାଇଥିଲା। ସ୍ଥାନୀୟ ଲୋକେ ଆହତମାନଙ୍କୁ ଉଦ୍ଧାର କରି ଚିକିତ୍ସା ପାଇଁ ପଠାଇଥିଲେ।
ଘଟଣାକୁ ନେଇ ପୁଲିସ ତଦନ୍ତ ଆରମ୍ଭ କରିଛି। କଣ୍ଟେନର ଓ ଅଟୋ ମଧ୍ୟରେ ଧକ୍କାର ପ୍ରକୃତ କାରଣ ଏବଂ ଦୁର୍ଘଟଣାର ପରିସ୍ଥିତି ସମ୍ପର୍କରେ ତଦନ୍ତ ପରେ ସ୍ପଷ୍ଟ ହେବ।