ପୁରୀ: ଆଜି ପବିତ୍ର ଭାଦ୍ରବ ଶୁକ୍ଳ ଅଷ୍ଟମୀ ତିଥି। ଏହି ଗୁରୁତ୍ୱପୂର୍ଣ୍ଣ ଆଧ୍ୟାତ୍ମିକ ଅବସରରେ ଶ୍ରୀମନ୍ଦିରରେ ଅତ୍ୟନ୍ତ ନିଷ୍ଠା ଓ ପରମ୍ପରା ସହ ପାଳିତ ହେଉଛି ‘ରାଧାଷ୍ଟମୀ’। ଶ୍ରୀକୃଷ୍ଣଙ୍କ ଜନ୍ମାଷ୍ଟମୀର ଠିକ୍ ୧୫ ଦିନ ପରେ ପଡ଼ୁଥିବା ଏହି ତିଥିକୁ ଶ୍ରୀରାଧାଙ୍କ ଜନ୍ମୋତ୍ସବ ଭାବେ ପାଳନ କରାଯାଏ। ଏହି ଦିବ୍ୟ ଅବସରରେ ଶ୍ରୀଜଗନ୍ନାଥଙ୍କ ପ୍ରତିନିଧି ଏବଂ ଚଳନ୍ତି ପ୍ରତିମା ଭାବେ ଚକ୍ରରାଜ ସୁଦର୍ଶନ ନଗର ପରିକ୍ରମା କରିବାର ସ୍ୱତନ୍ତ୍ର ନୀତି ରହିଛି। ଶ୍ରୀମନ୍ଦିର ବିଧି ଅନୁସାରେ, ଆଜି ଅପରାହ୍ନରେ ମହାପ୍ରଭୁ ସୁଦର୍ଶନ ପ୍ରଥମେ ଶ୍ରୀମନ୍ଦିର ବେଢ଼ା ପରିକ୍ରମା କରିବେ। ଏହାପରେ ବିମାନରେ ବିଜେ ହୋଇ ସେ ଶ୍ରୀମନ୍ଦିରରୁ ବାହାରି ନଗର ପରିକ୍ରମା କରିବା ସହ ବିଭିନ୍ନ ସାହିରେ ଭକ୍ତମାନଙ୍କ ଦ୍ୱାରା ଅର୍ପିତ ‘ପନ୍ତି ଭୋଗ’ ଗ୍ରହଣ କରିବେ। ପରିକ୍ରମା ଶେଷରେ ସୁଦର୍ଶନ ମହାପ୍ରଭୁ ଗୌଡ଼ବାଡ଼ ସାହିସ୍ଥିତ ଶ୍ରୀଜମ୍ବେଶ୍ୱର ମହାଦେବଙ୍କ ମନ୍ଦିରକୁ ବିଜେ କରିବେ। ପରମ୍ପରା ଅନୁସାରେ, ଜମ୍ବେଶ୍ୱର ମହାଦେବଙ୍କୁ ଶ୍ରୀମନ୍ଦିରର ‘ଭଣ୍ଡାର ରକ୍ଷକ’ ଓ ‘ହିସାବ ରକ୍ଷକ’ ଭାବେ ଗ୍ରହଣ କରାଯାଏ। ସେଠାରେ ସୁଦର୍ଶନଙ୍କ ପାଇଁ ସ୍ୱତନ୍ତ୍ର ଶୀତଳ ଭୋଗ ଓ ପ୍ରସାଦ ଲାଗି ହେବ। ଜମ୍ବେଶ୍ୱରଙ୍କ ପକ୍ଷରୁ ଜଣେ ପୂଜାପଣ୍ଡା ସାମନ୍ତ ଶ୍ରୀମନ୍ଦିରର ବିଗତ ବର୍ଷର ସମ୍ପୂର୍ଣ୍ଣ ଆୟବ୍ୟୟ ଓ ଜମାଖର୍ଚ୍ଚ ହିସାବ ଚକ୍ରରାଜ ସୁଦର୍ଶନଙ୍କ ସମ୍ମୁଖରେ ପାଠ କରି ଶୁଣାଇବେ। ସମ୍ପୂର୍ଣ୍ଣ ବାର୍ଷିକ ହିସାବ ଗ୍ରହଣ କରିବା ପରେ ମହାପ୍ରଭୁ ସୁଦର୍ଶନ ଜମ୍ବେଶ୍ୱର ମନ୍ଦିରରୁ ନିଶାର୍ଦ୍ଧରେ ଶ୍ରୀମନ୍ଦିରକୁ ପ୍ରତ୍ୟାବର୍ତ୍ତନ କରିବେ।
ଶ୍ରୀକ୍ଷେତ୍ରରେ ରାଧାଷ୍ଟମୀର ଅନ୍ୟ ଏକ ଆଧ୍ୟାତ୍ମିକ ମାହାତ୍ମ୍ୟ ରହିଛି। ଆଜିଠାରୁ ଶ୍ରୀମନ୍ଦିରରେ କାର୍ତ୍ତିକ ମାସର ପୂର୍ବପ୍ରସ୍ତୁତି ସ୍ୱରୂପ ବିଶେଷ ନୀତିକାନ୍ତି ଆରମ୍ଭ ହୁଏ। ଏହି ଦିନଠାରୁ ମହାପ୍ରଭୁଙ୍କ ନିକଟରେ ରାଧାଦାମୋଦର ବେଶ ଓ ବିଶେଷ ପୂଜାର୍ଚ୍ଚନା ପାଇଁ କ୍ଷେତ୍ର ପ୍ରସ୍ତୁତ ହୋଇଥାଏ, ଯାହା ଭକ୍ତମାନଙ୍କ ପାଇଁ ଅତ୍ୟନ୍ତ ଦିବ୍ୟ ଅନୁଭୂତି ଆଣିଦେଇଥାଏ।