ତିରୁବନନ୍ତପୁରମ୍: କେରଳରେ ବର୍ଷା ବିତ୍ପାତ ଜନଜୀବନକୁ ଅସ୍ତବ୍ୟସ୍ତ କରିପକାଇଛି। ପ୍ରବଳ ବର୍ଷା ଯୋଗୁଁ ବିଭିନ୍ନ ସ୍ଥାନରେ ଆକସ୍ମିକ ବନ୍ୟା ଓ ଭୂସ୍ଖଳନ ଘଟି ଗତ ୨୪ ଘଣ୍ଟା ମଧ୍ୟରେ ୯ ଜଣଙ୍କର ପ୍ରାଣହାନି ଘଟିଛି। ମଲପ୍ପୁରମ୍ ଜିଲ୍ଲାରେ ସର୍ବାଧିକ ୫ ଜଣଙ୍କ ମୃତ୍ୟୁ ହୋଇଥିବା ବେଳେ କୋଟ୍ଟୟମ ଓ ଇଡ୍ଡୁକି ଜିଲ୍ଲାରୁ ୨ ଜଣ ଲେଖାଏଁ ମୃତାହତ ହୋଇଛନ୍ତି। ଅଚାନକ ବନ୍ୟା ଆସିବାରୁ ଅମରାମବଲମ ଓ ନିଲାମବୁର ଅଞ୍ଚଳରୁ ୫ ଜଣ ଭାସିଯାଇଥିଲେ। ସେମାନଙ୍କୁ ଉଦ୍ଧାର କରିବା ପାଇଁ ଜାତୀୟ ବିପର୍ଯ୍ୟୟ ପ୍ରଶମନ ବଳ (ଏନଡିଆରଏଫ) ନିୟୋଜିତ ହୋଇଥିବା ବେଳେ ପୋଟ୍ଟିକ୍କଲମ ମୁଟ୍ଟିକୁଣ୍ଡୁ ଓ ଆଣ୍ଟୋନିକ୍କଡ ଆୟାନିକୁଣ୍ଡୁ ଅଞ୍ଚଳରୁ ଦୁଇ ଜଣଙ୍କ ମୃତଦେହ ଉଦ୍ଧାର କରାଯାଇଛି।
ବିପନ୍ନ ଅଞ୍ଚଳରେ ସ୍ଥିତି ସମୀକ୍ଷା କରି ତୁରନ୍ତ ଉଦ୍ଧାର କାର୍ଯ୍ୟ ତ୍ୱରାନ୍ୱିତ କରିବାକୁ ସରକାରୀ ଅଧିକାରୀଙ୍କୁ ନିର୍ଦ୍ଦେଶ ଦିଆଯାଇଛି। ଭାରତୀୟ ପାଣିପାଗ ବିଭାଗ (ଆଇଏମଡି) ପକ୍ଷରୁ ସୋମବାର କୋଟ୍ଟୟମ, ଇଡ୍ଡୁକି, ଏର୍ଣ୍ଣାକୁଲମ, ତ୍ରିଶୂର, ମଲପ୍ପୁରମ୍ ଓ ପଲକ୍କଡ ଭଳି ୬ଟି ଜିଲ୍ଲା ପାଇଁ ‘ଅରେଞ୍ଜ ୱାର୍ଣ୍ଣିଂ’ ଜାରି କରାଯାଇଛି। ଏହିସବୁ ଅଞ୍ଚଳରେ ପ୍ରବଳରୁ ଅତିପ୍ରବଳ ବର୍ଷା ସହ ଘଣ୍ଟା ପ୍ରତି ୪୦ କିଲୋମିଟର ବେଗରେ ପବନ ବହିବାର ସମ୍ଭାବନା ରହିଛି।