ଭୁବନେଶ୍ବର: ରାଜ୍ୟର ବିଶ୍ୱବିଦ୍ୟାଳୟ ଓ ମହାବିଦ୍ୟାଳୟଗୁଡ଼ିକରେ ଆଗାମୀ ଛାତ୍ର ସଂସଦ ନିର୍ବାଚନକୁ ସୁଚାରୁ ଓ ଶାନ୍ତିପୂର୍ଣ୍ଣ ଭାବେ ପରିଚାଳନା କରିବା ପାଇଁ ଓଡ଼ିଶା ପୋଲିସ ପକ୍ଷରୁ ବ୍ୟାପକ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି। ନିର୍ବାଚନ ସମୟରେ କ୍ୟାମ୍ପସରେ ଅଶାନ୍ତି, ହିଂସା କିମ୍ବା ବାହାର ଲୋକଙ୍କ ଗଣ୍ଡଗୋଳ ଏଡ଼ାଇବା ପାଇଁ ରାଜ୍ୟ ପୋଲିସ ମହାନିର୍ଦ୍ଦେଶକ (DGP) ବିନୟ ତୋଷ ସମସ୍ତ ଜିଲ୍ଲାର ଏସପିଙ୍କୁ କଡ଼ା ନିର୍ଦ୍ଦେଶ ଦେଇଛନ୍ତି।
କଲେଜ ଓ ୟୁନିଭରସିଟି କ୍ୟାମ୍ପସ ପରିସରରେ ଶାନ୍ତି ଭଙ୍ଗ କରୁଥିବା ଅଣଛାତ୍ରଙ୍କ ଉପରେ ତୀକ୍ଷ୍ଣ ନଜର ରଖିବା ସହ ସମ୍ବେଦନଶୀଳ ଅଞ୍ଚଳଗୁଡ଼ିକରେ ସୁରକ୍ଷା ବ୍ୟବସ୍ଥା କଡ଼ାକଡ଼ି କରିବାକୁ କୁହାଯାଇଛି। ଏହାସହ ନିର୍ବାଚନ ସମୟରେ ପାଠପଢ଼ା ପରିବେଶ ନଷ୍ଟ ନକରି ଶାନ୍ତିଶୃଙ୍ଖଳା ବଜାୟ ରଖିବାକୁ ଡିଜିପି ଛାତ୍ରଛାତ୍ରୀ ଓ ସଙ୍ଗଠନଗୁଡ଼ିକୁ ଆହ୍ୱାନ ଦେଇଛନ୍ତି।
ଘୋଷିତ ସୂଚୀ ଅନୁଯାୟୀ, ଆସନ୍ତାକାଲି କଲେଜଗୁଡ଼ିକ ପକ୍ଷରୁ ଆନୁଷ୍ଠାନିକ ବିଜ୍ଞପ୍ତି ପ୍ରକାଶ ପାଇବ। ଏହାପରେ ୯ ତାରିଖରେ ପ୍ରାର୍ଥୀପତ୍ର ଦାଖଲ (ନୋମିନେସନ) କରାଯିବ। ୧୫ ତାରିଖରେ ମତଦାନ ଅନୁଷ୍ଠିତ ହେବାକୁ ଥିବାବେଳେ ୧୬ ତାରିଖରେ ନବନିର୍ବାଚିତ ଛାତ୍ର ନେତା ଓ ନେତ୍ରୀମାନେ ଶପଥ ଗ୍ରହଣ କରିବେ।