ASSOCHAM’s O-LEAD 2026: ଆସୋସିଏଟେଡ୍ ଚାମ୍ବର୍ସ ଅଫ୍ କମର୍ସ ଆଣ୍ଡ୍ ଇଣ୍ଡଷ୍ଟ୍ରି ଅଫ୍ ଇଣ୍ଡିଆ (ଆସୋଚାମ) ପକ୍ଷରୁ ଆୟୋଜିତ ଦୁଇଦିନିଆ ‘ଓ-ଲିଡ୍ ୨୦୨୬ – ଓଡ଼ିଶା: ଦ ଗ୍ଲୋବାଲ୍ ଗ୍ରୋଥ୍ ହବ୍’ ସମ୍ମିଳନୀ ଶନିବାର ଭୁବନେଶ୍ୱରରେ ଉଦ୍ଯାପିତ ହୋଇଯାଇଛି । ଓଡ଼ିଶାର ଅର୍ଥନୈତିକ ଅଭିବୃଦ୍ଧିକୁ ତ୍ୱରାନ୍ୱିତ କରିବା ପାଇଁ ଶିଳ୍ପ-ନେତୃତ୍ୱାଧୀନ ଦକ୍ଷତା ବିକାଶ, ଦାୟିତ୍ୱପୂର୍ଣ୍ଣ କୃତ୍ରିମ ବୁଦ୍ଧିମତ୍ତା, ମିଳିତ ଗବେଷଣା ତଥା ନବସୃଜନର ବ୍ୟାବସାୟିକରଣ ଉପରେ ଏଥିରେ ଗୁରୁତ୍ୱପୂର୍ଣ୍ଣ ଆହ୍ୱାନ ଦିଆଯାଇଛି ।
ହୋଟେଲ ସ୍ୱସ୍ତି ପ୍ରିମିୟମଠାରେ ଅନୁଷ୍ଠିତ ଉଦ୍ଯାପନୀ ଅଧିବେଶନରେ ନୀତି ନିର୍ଦ୍ଧାରକ, ଶିଳ୍ପପତି, ପ୍ରଯୁକ୍ତିବିଦ୍ୟା ବିଶେଷଜ୍ଞ ଏବଂ ଶିକ୍ଷାବିତମାନେ ଏକାଠି ହୋଇ ଶିକ୍ଷାକ୍ଷେତ୍ରରେ ଏଆଇର ଭୂମିକା, ନିଯୁକ୍ତିର ଭବିଷ୍ୟତ, ଆନ୍ତର୍ଜାତୀୟ ସହଯୋଗ ଏବଂ ଶିଳ୍ପ, ଷ୍ଟାର୍ଟଅପ୍ ଓ ଶିକ୍ଷାନୁଷ୍ଠାନକୁ ଯୋଡ଼ୁଥିବା ଏକ ସୁଦୃଢ଼ ନବସୃଜନ ବ୍ୟବସ୍ଥା ଗଠନ ଉପରେ ଆଲୋଚନା କରିଥିଲେ ।
ଓଡ଼ିଶା ସରକାରଙ୍କ ଦକ୍ଷତା ବିକାଶ ଏବଂ ବୈଷୟିକ ଶିକ୍ଷା ବିଭାଗର କମିଶନର ତଥା ଶାସନ ସଚିବ, ଆଇଏଏସ, ଶ୍ରୀ ଭୂପେନ୍ଦ୍ର ସିଂହ ପୁନିଆ, କହିଛନ୍ତି ଯେ, ଆଗାମୀ ପିଢିର ନିଯୁକ୍ତି ସୁଯୋଗ ପାଇଁ ଯୁବପିଢ଼ିଙ୍କୁ ପ୍ରସ୍ତୁତ କରିବାକୁ ପ୍ରାରମ୍ଭିକ ପର୍ଯ୍ୟାୟରୁ ଦକ୍ଷତା ବିକାଶ ଓ ଶିକ୍ଷା ନିତ୍ୟାନ୍ତ ଜରୁରୀ । କମ୍ ଦରମାଯୁକ୍ତ କାମ ପାଇଁ ଯୁବକଯୁବତୀମାନେ ଯେପରି ମହାନଗରଗୁଡ଼ିକୁ ଯିବାକୁ ବାଧ୍ୟ ନ ହୁଅନ୍ତି, ସେଥିପାଇଁ ଛାତ୍ରଛାତ୍ରୀମାନେ ପ୍ରାରମ୍ଭିକ ସ୍ତରରୁ ଉପଯୁକ୍ତ କୌଶଳ ଶିଖି ଭଲ ନିଯୁକ୍ତି ପାଇବା ଉଚିତ ବୋଲି ସେ ଆହ୍ୱାନ ଦେଇଥିଲେ ।
ସେମିକଣ୍ଡକ୍ଟର କ୍ଷେତ୍ରରେ କିପରି ଗବେଷଣା ଓ ଶିଳ୍ପ ପ୍ରୟୋଗ ଏକାଠି କାମ କରିପାରିବ ତାହାର ଉଦାହରଣ ଦେଇ ପୁନିଆ କହିଥିଲେ, “ଶିଳ୍ପସଂସ୍ଥାଗୁଡ଼ିକ ଦକ୍ଷତା ବିକାଶ ଏବଂ ଅନୁଷ୍ଠାନ ପରିଚାଳନାରେ ନେତୃତ୍ୱ ନେବା ଉଚିତ । ଗବେଷଣା ଓ ବିକାଶ କେବଳ ଶିକ୍ଷାନୁଷ୍ଠାନର ଲାବୋରେଟୋରୀ ଭିତରେ ସୀମିତ ନ ରହି ବାହାରକୁ ଆସିବା ଉଚିତ, ଯେଉଁଥିରେ ନବସୃଜନ ଓ ତାର ବ୍ୟବସାୟିକରଣ ଦିଗରେ ଶିଳ୍ପ ମୁଖ୍ୟ ଭୂମିକା ଗ୍ରହଣ କରିପାରିବ ।” ସେ କେବଳ ସୀମିତ ସହଭାଗିତା ମଧ୍ୟରେ ନ ରହି ଏପରି ଏକ ବ୍ୟବସ୍ଥା ଆପଣାଇବା ଉପରେ ଗୁରୁତ୍ୱ ଦେଇଥିଲେ, ଯେଉଁଠାରେ ଶିଳ୍ପସଂସ୍ଥା ନିଜେ କାର୍ଯ୍ୟକାରିତାର ଦାୟିତ୍ୱ ନେବ ଏବଂ ଅର୍ଥନୈତିକ ବିକାଶରେ ସିଧାସଳଖ ଯୋଗଦାନ ଦେଇପାରିବ।
ପୂର୍ବ ଏବଂ ଉତ୍ତର-ପୂର୍ବ ଭାରତ ପାଇଁ ବ୍ରିଟିଶ ଡେପୁଟି ହାଇକମିଶନର ଡକ୍ଟର ଆଣ୍ଡ୍ର୍ୟୁ ଫ୍ଲେମିଂ ‘ଭାରତ-ବ୍ରିଟେନ ମିଳିତ ଭିଜନ ୨୦୩୫’ର ଗୁରୁତ୍ୱ, ବିଶେଷ କରି ଶିକ୍ଷା, ଦକ୍ଷତା ଏବଂ କୃତ୍ରିମ ବୁଦ୍ଧିମତ୍ତା ଉପରେ ଏହାର ଗୁରୁତ୍ୱ ବିଷୟରେ ଉଲ୍ଲେଖ କରିଥିଲେ । ତାଙ୍କର ୨୦ତମ ଭୁବନେଶ୍ୱର ଗସ୍ତ ଅବସରରେ ସେ ଦର୍ଶାଇଥିଲେ ଯେ, କିପରି ଭାରତର ବିଶାଳ ପ୍ରତିଭା ଓ ପରିସର, ବ୍ରିଟେନର ବିଶ୍ୱସ୍ତରୀୟ ବିଶ୍ୱବିଦ୍ୟାଳୟ, ଗବେଷଣା କ୍ଷମତା ଏବଂ ଏଆଇ ବ୍ୟବସ୍ଥା ସହିତ ପରସ୍ପରର ପରିପୂରକ ହୋଇପାରିବ ।
ସେ କହିଥିଲେ ଯେ କୌଣସିବି ଗୋଟିଏ ଦେଶ ପାଖରେ ଏଆଇ ସୃଷ୍ଟି କରୁଥିବା ସମସ୍ତ ଆହ୍ୱାନ ଓ ସୁଯୋଗର ସମାଧାନ ନାହିଁ, ତେଣୁ ଆନ୍ତର୍ଜାତୀୟ ସହଭାଗିତା ଏକାନ୍ତ ଆବଶ୍ୟକ । କେବଳ ଜ୍ଞାନର ଆଦାନପ୍ରଦାନ ନୁହେଁ ବରଂ ମିଳିତ ସୃଜନଶୀଳତା ଉପରେ ଧ୍ୟାନ ଦେବା ଉଚିତ, ଯେଉଁଥିରେ ମିଳିତ ଏଆଇ ଗବେଷଣା, ପାଠ୍ୟକ୍ରମ ପ୍ରସ୍ତୁତି, ଶିକ୍ଷକ ପ୍ରଶିକ୍ଷଣ ଏବଂ ସହଯୋଗୀ ପରିଚାଳନାର ସୁଯୋଗ ରହିଛି । ଏହିପରି ସହଭାଗିତା ଓଡ଼ିଶାର ଅନୁଷ୍ଠାନ ଏବଂ ଶିକ୍ଷାର୍ଥୀମାନଙ୍କୁ ବିଶ୍ୱସ୍ତରୀୟ ଜ୍ଞାନ ନେଟୱାର୍କ ସହିତ ଯୋଡ଼ିବାରେ ସାହାଯ୍ୟ କରିବ ଏବଂ ପ୍ରଯୁକ୍ତିବିଦ୍ୟାର ନବସୃଜନ ସ୍ଥାନୀୟ ସମାଜର ଆବଶ୍ୟକତାକୁ ପୂରଣ କରିପାରିବ ।
ରାଜ୍ୟସଭା ସାଂସଦ ଶ୍ରୀ ସୁଜିତ୍ କୁମାର, ଶିକ୍ଷା ବ୍ୟାପକତା ଏବଂ ପାଠପଢ଼ାର ଫଳାଫଳକୁ ଉନ୍ନତ କରିବାରେ ଏଆଇ ବ୍ୟବହାର କରିବାର ଭାରତର ସାମର୍ଥ୍ୟ ଉପରେ ଆଲୋକପାତ କରିଥିଲେ । ସେ ଦେଶର ଶିକ୍ଷା ମଡେଲ, ଷ୍ଟାର୍ଟଅପ୍ ପରିବେଶ ଏବଂ ଏଆଇର ବ୍ୟବହାରିକ ପ୍ରୟୋଗଗୁଡ଼ିକ ବିଷୟରେ କହିଥିଲେ, ଯାହାକି ଅଧିକରୁ ଅଧିକ ଲୋକଙ୍କ ନିକଟରେ ଶିକ୍ଷା ପହଞ୍ଚାଇବାରେ ସାହାଯ୍ୟ କରୁଛି ।
‘ଇଣ୍ଡିଆ ଏଆଇ ଇମ୍ପାକ୍ଟ ସମିଟ୍’ ଏବଂ ‘ନୂଆଦିଲ୍ଲୀ ଘୋଷଣାନାମା’ର ଉଦାହରଣ ଦେଇ ସେ ଦାୟିତ୍ୱପୂର୍ଣ୍ଣ ଏଆଇ, ଦକ୍ଷତା ବୃଦ୍ଧି ଏବଂ ବିଶ୍ୱାସ ଆଧାରିତ ଶାସନ ବ୍ୟବସ୍ଥା ଉପରେ ଗୁରୁତ୍ୱାରୋପ କରିଥିଲେ । ଭାରତର ଜନସଂଖ୍ୟାର ଏକ ବଡ଼ ଅଂଶ ଯୁବପିଢ଼ି ହୋଇଥିବାରୁ, ପିଲା ଏବଂ ଯୁବକମାନଙ୍କୁ ଶିକ୍ଷିତ କରିବାରେ ଏଆଇ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିପାରିବ ବୋଲି ସେ କହିଥିଲେ। ଏଥିସହ ଶିକ୍ଷା, ସ୍ୱାସ୍ଥ୍ୟସେବା, କୃଷି ଏବଂ ବିପର୍ଯ୍ୟୟ ପରିଚାଳନା ସମେତ ବିଭିନ୍ନ କ୍ଷେତ୍ରରେ ନବସୃଜନକୁ ଉତ୍ସାହିତ କରିବା ପାଇଁ ସରକାରୀ ନୀତିଗତ ସହାୟତା, ଭିତ୍ତିଭୂମି ଏବଂ ‘ଇଣ୍ଡିଆ ଏଆଇ ମିଶନ’ର ଗୁରୁତ୍ୱ ବିଷୟରେ ମଧ୍ୟ ସେ ଉଲ୍ଲେଖ କରିଥିଲେ ।
ମାନ୍ୟବର ଲୋକସଭା ସାଂସଦ ଡକ୍ଟର ରବିନାରାୟଣ ବେହେରା ନିଯୁକ୍ତି ଉପରେ ଏଆଇର ପ୍ରଭାବ ଏବଂ ଏଆଇ ପ୍ରଯୁକ୍ତିର ପ୍ରୟୋଗ ଦ୍ବାରା ଲିଭିଯାଉଥିବା ଭାଷାଗତ ବିବିଧତା ଉପରେ ମତ ରଖିଥିଲେ । ବରିଷ୍ଠ ନାଗରିକ, ମହିଳା, ଶିଶୁ ଏବଂ ଭିନ୍ନକ୍ଷମମାନଙ୍କୁ ସହାୟତା କରିବାରେ ଏଆଇର ସାମର୍ଥ୍ୟ ଉପରେ ଆଲୋକପାତ କରି ସେ କହିଥିଲେ ଯେ ପ୍ରଯୁକ୍ତିବିଦ୍ୟା ସମାଜର ସମସ୍ତ ବର୍ଗଙ୍କ ପାଇଁ ସମାବେଶୀ ଓ ସୁଗମ ହେବା ଉଚିତ। ଦ୍ରୁତ ଗତିରେ ବଦଳୁଥିବା ବୈଷୟିକ ପରିବେଶ ପାଇଁ ପ୍ରସ୍ତୁତ କରିବା ନିମନ୍ତେ ଛାତ୍ରଛାତ୍ରୀଙ୍କ ପାଠ୍ୟକ୍ରମରେ ଏଆଇକୁ ସାମିଲ କରିବା ପାଇଁ ମଧ୍ୟ ସେ ଆହ୍ୱାନ ଦେଇଥିଲେ।
ଧନ୍ୟବାଦ ଅର୍ପଣ ଅବସରରେ ଆସୋଚାମର ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳ ବିଭାଗର ବରିଷ୍ଠ ନିର୍ଦ୍ଦେଶିକା ତଥା ମୁଖ୍ୟ ଶ୍ରୀମତୀ ପରମିନ୍ଦର ଜିତ୍ କୌର ଏହି ଆଲୋଚନାର ମୂଲ୍ୟ ଏବଂ ଚିନ୍ତାଧାରାକୁ ବ୍ୟବହାରିକ ଫଳାଫଳରେ ପରିଣତ କରିବାର ଆବଶ୍ୟକତା ଉପରେ କହିଥିଲେ। ସେ ଉତ୍ପାଦ ନବସୃଜନ, ଶିଳ୍ପର ଅଧିକ ଦାୟିତ୍ୱବୋଧ ଏବଂ ଶିଳ୍ପ, ଶିକ୍ଷାନୁଷ୍ଠାନ ତଥା ଷ୍ଟାର୍ଟଅପ୍ ମଧ୍ୟରେ ଅଧିକ ସହଯୋଗ ଉପରେ ଗୁରୁତ୍ୱ ଦେଇଥିଲେ।
ସେ ଏକ ସଂଯୁକ୍ତ ଓ ସୁଦୃଢ଼ ନବସୃଜନ ବ୍ୟବସ୍ଥା ଗଠନ ଉପରେ ମଧ୍ୟ ଜୋର ଦେଇଥିଲେ, ଯେଉଁଠାରେ ଶିଳ୍ପସଂସ୍ଥା ପ୍ରକୃତ ସମସ୍ୟାଗୁଡ଼ିକୁ ଚିହ୍ନଟ କରିବ ଏବଂ “ରିଭର୍ସ ପିଚିଂ” ପ୍ରକ୍ରିୟା ମାଧ୍ୟମରେ ସମାଧାନ ବାହାର କରିବା ପାଇଁ ଶିକ୍ଷାନୁଷ୍ଠାନ ଓ ଷ୍ଟାର୍ଟଅପ୍ଗୁଡ଼ିକୁ ଆମନ୍ତ୍ରଣ କରିବ। ଏଭଳି ପଦକ୍ଷେପ ଷ୍ଟାର୍ଟଅପ୍ଗୁଡ଼ିକୁ କେବଳ ସାମଗ୍ରୀ ଯୋଗାଣକାରୀ ଭାବେ ନୁହେଁ ବରଂ ନବସୃଜନ ସହଭାଗୀ ଭାବେ ପ୍ରତିଷ୍ଠିତ କରିବ, ଦକ୍ଷତା ଅଭାବକୁ ଦୂର କରିବ ଏବଂ ସମାଜ ତଥା ବ୍ୟବସାୟର ଆବଶ୍ୟକତା ଅନୁଯାୟୀ ସମାଧାନ ପ୍ରଦାନ କରିବ ବୋଲି ସେ ମତ ଦେଇଥିଲେ ।
ଏହି ଆଲୋଚନାଗୁଡ଼ିକ ‘ଓ-ଲିଡ୍ ୨୦୨୬’ର ମୁଖ୍ୟ ବାର୍ତ୍ତାକୁ ଆହୁରି ଦୃଢ଼ କରିଥିଲା: ଓଡ଼ିଶାକୁ ଏକ ବିଶ୍ୱସ୍ତରୀୟ ଅଭିବୃଦ୍ଧିର କେନ୍ଦ୍ର ଭାବରେ ଗଢ଼ିତୋଳିବାର ଲକ୍ଷ୍ୟ ଭବିଷ୍ୟତ-ଉପଯୋଗୀ ଦକ୍ଷତା ବିକାଶ, ଶିଳ୍ପ-ଶିକ୍ଷାନୁଷ୍ଠାନ ସହଭାଗିତାକୁ ମଜଭୁତ କରିବା, ଗବେଷଣାର ବ୍ୟାବସାୟିକରଣକୁ ତ୍ୱରାନ୍ୱିତ କରିବା ଏବଂ ବ୍ୟାପକ ଆର୍ଥିକ ତଥା ସାମାଜିକ ସୁଯୋଗ ସୃଷ୍ଟି କରିବା ପାଇଁ ନୂତନ ପ୍ରଯୁକ୍ତିବିଦ୍ୟାର ଦାୟିତ୍ୱପୂର୍ଣ୍ଣ ବ୍ୟବହାର ଉପରେ ନିର୍ଭର କରିବ ।
ଏହି ଦୁଇଦିନିଆ ସମ୍ମିଳନୀରେ ଶିଳ୍ପ ଓ ଷ୍ଟାର୍ଟଅପ୍ର ସମ୍ପ୍ରସାରଣ, ଶିଳ୍ପ ଏବଂ ଶିକ୍ଷାନୁଷ୍ଠାନ ମଧ୍ୟରେ ସମନ୍ୱୟ ରକ୍ଷା, ‘ଇଣ୍ଡଷ୍ଟ୍ରି ୪.୦’ ସହିତ ଶିକ୍ଷାକୁ ସାମିଲ କରିବା, ଭବିଷ୍ୟତ ପାଇଁ ପ୍ରତିଭା ବିକାଶ ଏବଂ ଏଆଇ ଆଧାରିତ ନବସୃଜନକୁ ପ୍ରୋତ୍ସାହିତ କରିବା ଉପରେ ଧ୍ୟାନ ଦିଆଯାଇଥିଲା । ଓଡ଼ିଶାର ନବସୃଜନ ଏବଂ ଉଦ୍ୟୋଗୀ ବ୍ୟବସ୍ଥାକୁ ସୁଦୃଢ଼ କରିବା ପାଇଁ ବ୍ୟବହାରିକ ଉପାୟ ଖୋଜିବା ନିମନ୍ତେ ଏହା ସରକାର, ଶିଳ୍ପ, ଷ୍ଟାର୍ଟଅପ୍, ବିଶ୍ୱବିଦ୍ୟାଳୟ ଏବଂ ଗବେଷଣା ପ୍ରତିଷ୍ଠାନର ପ୍ରତିନିଧିମାନଙ୍କୁ ଏକାଠି କରିଥିଲା।
ଉପସ୍ଥିତ ଅନ୍ୟାନ୍ୟ ବିଶିଷ୍ଟ ବ୍ୟକ୍ତିମାନଙ୍କ ମଧ୍ୟରେ ଥିଲେ ଶ୍ରୀ ପଙ୍କଜ ଲୋଚନ ମହାନ୍ତି, ଅଧ୍ୟକ୍ଷ, ଓଡ଼ିଶା ରାଜ୍ୟ ବିକାଶ ପରିଷଦ, ଆସୋଚାମ ତଥା ସିଏମ୍ଡି, ଏମ୍ଜିଏମ୍ ଗ୍ରୁପ୍; ଡକ୍ଟର ଆଲେକ୍ଜାଣ୍ଡାର ଦାସ, ଅଧ୍ୟକ୍ଷ, ଓଡ଼ିଶା ରାଜ୍ୟ ଶିକ୍ଷା ପରିଷଦ, ଆସୋଚାମ ତଥା ଅଧ୍ୟକ୍ଷ, କଳିଙ୍ଗ ଗ୍ରୁପ୍ ଅଫ୍ ଇନଷ୍ଟିଚ୍ୟୁସନ୍ସ; ଡକ୍ଟର ପ୍ରବୋଧ ମହାନ୍ତି, ସହ-ଅଧ୍ୟକ୍ଷ, ଓଡ଼ିଶା ରାଜ୍ୟ ବିକାଶ ପରିଷଦ, ଆସୋଚାମ ତଥା ଏମ୍ଡି, ଏସ୍ଏନ୍ଏମ୍ ଗ୍ରୁପ୍; ଶ୍ରୀ ଅସିତ ତ୍ରିପାଠୀ, ଅବସରପ୍ରାପ୍ତ ଭାରତୀୟ ପ୍ରଶାସନିକ ସେବା ଅଧିକାରୀ, ପରାମର୍ଶଦାତା, ଆସୋଚାମ ଓଡ଼ିଶା ରାଜ୍ୟ ବିକାଶ ପରିଷଦ ତଥା ଓଡ଼ିଶା ସରକାରଙ୍କ ପୂର୍ବତନ ମୁଖ୍ୟ ଶାସନ ସଚିବ ଏବଂ ଶ୍ରୀ ଅବନୀଶ ନାୟକ, ଅଧ୍ୟକ୍ଷ, ଓଡ଼ିଶା ରାଜ୍ୟ ଷ୍ଟାର୍ଟଅପ୍ ପରିଷଦ, ଆସୋଚାମ ତଥା ପ୍ରତିଷ୍ଠାତା, ଜେଡ୍ଟପ୍ ଆଇଓଟି ସଲ୍ୟୁସନ୍ସ ।