କଟକ: ଶାରଦୀୟ ନବରାତ୍ରିର ପ୍ରଥମ ଦିନରୁ ରାଜ୍ୟର ବିଭିନ୍ନ ଶକ୍ତିପୀଠ ଓ ମନ୍ଦିରଗୁଡ଼ିକରେ ଆଧ୍ୟାତ୍ମିକ ପରିବେଶ ସୃଷ୍ଟି ହୋଇଛି। ପ୍ରଥମ ଦିନରେ ମା’ ଶୈଳପୁତ୍ରୀଙ୍କ ଆରାଧନା ସହ ଘଟସ୍ଥାପନା ଓ ଷୋଡ଼ଶ ଉପଚାର ପୂଜାବିଧି ଆରମ୍ଭ ହୋଇଛି। ନଅ ଦିନ ଧରି ଚାଲିବାକୁ ଥିବା ଏହି ପବିତ୍ର ପର୍ବରେ ଭକ୍ତମାନେ ପରିବାରର ମଙ୍ଗଳ ଓ ସୁଖ-ଶାନ୍ତି କାମନା କରି ଦେବୀଙ୍କ ଆଶୀର୍ବାଦ ଭିକ୍ଷା କରୁଛନ୍ତି। ଦେଶବ୍ୟାପୀ ଏହି ଆଧ୍ୟାତ୍ମିକ ଉତ୍ସାହ ମଧ୍ୟରେ କଟକର ପ୍ରସିଦ୍ଧ ମା’ ଗଡ଼ଚଣ୍ଡୀଙ୍କ ପୀଠରେ ସ୍ୱତନ୍ତ୍ର ଉତ୍ସାହ ଦେଖିବାକୁ ମିଳିଛି। ପ୍ରଥମ ଦିନରେ ମା’ ରାଜରାଜେଶ୍ୱରୀ ବେଶରେ ଭକ୍ତଙ୍କୁ ଦର୍ଶନ ଦେଉଛନ୍ତି। ସକାଳର ମଙ୍ଗଳ ଆଳତି ପରେ ମନ୍ଦିରରେ ଶ୍ରଦ୍ଧାଳୁଙ୍କ ପ୍ରବଳ ସମାଗମ ହୋଇଥିଲା। ମା’ଙ୍କ ଏହି ଦୁର୍ଲଭ ବେଶ ଦର୍ଶନ ସହ ନବରାତ୍ରି ପୂଜାର ଶୁଭାରମ୍ଭକୁ ନେଇ ଭକ୍ତମାନେ ବେଶ୍ ଉତ୍ସାହିତ ଅଛନ୍ତି। ନବରାତ୍ରିର ଆଗାମୀ ଦିନଗୁଡ଼ିକରେ ମଧ୍ୟ ଦେବୀଙ୍କ ବିଭିନ୍ନ ବେଶ ଓ ପୂଜାବିଧିକୁ ନେଇ ମନ୍ଦିରଗୁଡ଼ିକରେ ଧାର୍ମିକ କାର୍ଯ୍ୟକ୍ରମ ଜାରି ରହିବ।
