ନୂଆଦିଲ୍ଲୀ: ଆଇପିଏଲ୍ ଫ୍ରାଞ୍ଚାଇଜି ଦିଲ୍ଲୀ କ୍ୟାପିଟାଲ୍ସ (ଡିସି) ନିଜର କୋଚିଂ ଟିମକୁ ଅଧିକ ମଜଭୁତ କରିଛି। ପୂର୍ବତନ ଭାରତୀୟ ଖ୍ୟାତନାମା ଲେଗ୍ ସ୍ପିନର୍ ଅମିତ ମିଶ୍ରାଙ୍କୁ ଦଳର ନୂତନ ‘ସ୍ପିନ୍ ବୋଲିଂ କୋଚ୍’ ଭାବେ ନିଯୁକ୍ତି ଦିଆଯାଇଛି। ଦିଲ୍ଲୀ ଫ୍ରାଞ୍ଚାଇଜି ସହ ମିଶ୍ରାଙ୍କ ପୁରୁଣା ସମ୍ପର୍କ ରହିଥିବାବେଳେ ଏହି ନିଯୁକ୍ତିକୁ ନେଇ କ୍ରିକେଟ୍ ମହଲରେ ଚର୍ଚ୍ଚା ଜୋର୍ ଧରିଛି।
ସୂଚନାଯୋଗ୍ୟ, ଦିଲ୍ଲୀ କ୍ୟାପିଟାଲ୍ସ ଏହାପୂର୍ବରୁ ସୌରଭ ଗାଙ୍ଗୁଲିଙ୍କୁ ମୁଖ୍ୟ କୋଚ୍, ଯୁବରାଜ ସିଂହଙ୍କୁ ଆସିଷ୍ଟାଣ୍ଟ୍ କୋଚ୍ ଏବଂ ଶ୍ରୀଲଙ୍କାର ପୂର୍ବତନ ଦ୍ରୁତ ବୋଲର୍ ଚାମିଣ୍ଡା ଭାସ୍ଙ୍କୁ ଫାଷ୍ଟ୍ ବୋଲିଂ କୋଚ୍ ଭାବେ ଦାୟିତ୍ୱ ଦେଇସାରିଛି। ଅମିତ ମିଶ୍ରା ନିଜର ଆଇପିଏଲ୍ କ୍ୟାରିୟର୍ର ଶୁଭାରମ୍ଭ ଦିଲ୍ଲୀ ଫ୍ରାଞ୍ଚାଇଜିରୁ କରିଥିଲେ ଏବଂ ଏହି ଦଳ ପକ୍ଷରୁ ସେ ୧୦ଟି ସିଜନ୍ ଖେଳିଛନ୍ତି। ଆଇପିଏଲ୍ ଇତିହାସରେ ୩ଟି ହ୍ୟାଟ୍ରିକ୍ ନେବାର ବିରଳ ସଫଳତା ହାସଲ କରିଥିବା ଅମିତ ମିଶ୍ରା ଏକମାତ୍ର ବୋଲର୍ ଅଟନ୍ତି। ସେ ୨୦୦୮ରେ ଦିଲ୍ଲୀ ପକ୍ଷରୁ ପ୍ରଥମ ହ୍ୟାଟ୍ରିକ୍ ଅର୍ଜନ କରିଥିଲେ।
ଅନ୍ତର୍ଜାତୀୟ କ୍ରିକେଟ୍ କ୍ୟାରିୟରରେ ଅମିତ ମିଶ୍ରା ଭାରତ ପକ୍ଷରୁ ୨୨ଟି ଟେଷ୍ଟ୍ ମ୍ୟାଚ୍ରୁ ୭୬ଟି ୱିକେଟ୍, ୩୬ଟି ଦିନିକିଆରୁ ୬୪ଟି ୱିକେଟ୍ ଏବଂ ୧୦ଟି ଟି-୨୦ ଅନ୍ତର୍ଜାତୀୟ ମ୍ୟାଚ୍ରୁ ୧୬ଟି ୱିକେଟ୍ ନିଜ ନାମରେ କରିଛନ୍ତି। ସେ ୨୦୨୪ରେ ଲକ୍ଷ୍ନୌ ସୁପର୍ ଜାଏଣ୍ଟ୍ସ ପକ୍ଷରୁ ରାଜସ୍ଥାନ ରୟାଲ୍ସ ବିପକ୍ଷରେ ନିଜର ଶେଷ ଆଇପିଏଲ୍ ମ୍ୟାଚ୍ ଖେଳିଥିଲେ। ବର୍ତ୍ତମାନ କୋଚିଂ ଭୂମିକାରେ ଅବତୀର୍ଣ୍ଣ ହୋଇ ସେ ଯୁବ ସ୍ପିନର୍ମାନଙ୍କୁ ତାଙ୍କର ମୂଲ୍ୟବାନ ଅଭିଜ୍ଞତା ପ୍ରଦାନ କରିବେ।