ଭୁବନେଶ୍ୱର: ରାଜଧାନୀରେ ଦିନକୁ ଦିନ ଖୋଲାମେଲାରେ ଟ୍ୟାଙ୍କର ଜରିଆରେ କ୍ଷୀର ବିକ୍ରି କରାଯିବା ପ୍ରଥା ବୃଦ୍ଧି ପାଇବାରେ ଲାଗିଛି, ଯାହାକି ସାଧାରଣ ଖାଉଟିମାନଙ୍କ ପାଇଁ ଚିନ୍ତାର ବିଷୟ ପାଲଟିଛି। ସହରର ବିଭିନ୍ନ ଅଞ୍ଚଳରେ ପ୍ରତିଦିନ ସକାଳୁ ଏବଂ ସନ୍ଧ୍ୟାରେ ଟ୍ୟାଙ୍କର ମାଧ୍ୟମରେ ଅଣାଯାଉଥିବା କ୍ଷୀରକୁ କିଣିବା ପାଇଁ ଗ୍ରାହକମାନଙ୍କ ଭିଡ଼ ଜମୁଥିବା ଦେଖିବାକୁ ମିଳୁଛି। ଖାଣ୍ଟି ଗାଈ କ୍ଷୀର ପାଇବା ଆଶାରେ ସାଧାରଣ ଲୋକେ ଏହି ବ୍ୟବସାୟୀମାନଙ୍କ ଉପରେ ଭରସା କରୁଥିଲେ ହେଁ, ଏହାର ପ୍ରକୃତ ଗୁଣବତ୍ତା ଏବଂ ସୁରକ୍ଷାକୁ ନେଇ ଏବେ ବଡ଼ ପ୍ରଶ୍ନବାଚୀ ସୃଷ୍ଟି ହୋଇଛି। ପ୍ରଶାସନ ପକ୍ଷରୁ ସହରର ବିଭିନ୍ନ ସ୍ଥାନରେ ଛେନା, ପନିର ଏବଂ ବିଭିନ୍ନ ମିଠାର ମାନ ପରୀକ୍ଷା ପାଇଁ ଚଢ଼ଉ କରାଯାଉଥିଲେ ମଧ୍ୟ, ବଜାରରେ ଏଭଳି ପ୍ରଚୁର ପରିମାଣରେ ବିକ୍ରି ହେଉଥିବା ଖୋଲା ଟ୍ୟାଙ୍କର କ୍ଷୀର ଉପରେ କୌଣସି ପ୍ରକାରର ନିୟମିତ ଯାଞ୍ଚ କିମ୍ବା ଖୋଳତାଡ଼ କରାଯାଉନାହିଁ। ଏହି ସୁଯୋଗର ଫାଇଦା ନେଇ କିଛି ଅସାଧୁ ବ୍ୟବସାୟୀ ଲୋକଙ୍କ ସ୍ୱାସ୍ଥ୍ୟ ସହ ଖେଳି ଅପମିଶ୍ରିତ କ୍ଷୀର କାରବାର ଚଳାଇଥିବା ଅଭିଯୋଗ ହେଉଛି।
ତଦନ୍ତରୁ ଜଣାପଡିଛି ଯେ ସହରର ବିଭିନ୍ନ ପ୍ରାନ୍ତକୁ ଟ୍ୟାଙ୍କରରେ ଆସୁଥିବା ଏହି କ୍ଷୀରର ଉତ୍ସ କେଉଁଠି, ତାହା ବେଶ ସନ୍ଦେହାସ୍ପଦ ଅଟେ। ସାଧାରଣତଃ ଗ୍ରାମାଞ୍ଚଳରୁ ଦୁଗ୍ଧ ସଂଗ୍ରହ କରିବା ପାଇଁ ଓମଫେଡ୍ ସମେତ ରାଜ୍ୟର ଅନ୍ୟାନ୍ୟ ପ୍ରମୁଖ ଦୁଗ୍ଧ କମ୍ପାନୀଗୁଡ଼ିକ ସକ୍ରିୟ ଭାବେ କାର୍ଯ୍ୟ କରୁଛନ୍ତି ଏବଂ ଚାଷୀମାନଙ୍କୁ ଆକୃଷ୍ଟ କରିବା ପାଇଁ ବିଭିନ୍ନ ଯୋଜନା ମଧ୍ୟ କାର୍ଯ୍ୟକାରୀ କରୁଛନ୍ତି। ଏଭଳି ସ୍ଥଳେ ରାଜଧାନୀ ଆଖପାଖ ଅଞ୍ଚଳରୁ ଏତେ ବଡ଼ ପରିମାଣର କ୍ଷୀର କିଭଳି ଏବଂ କେଉଁଠାରୁ ଆସୁଛି, ତାହାର କୌଣସି ସଠିକ୍ ହିସାବ ବା ତଥ୍ୟ କାହା ପାଖରେ ନାହିଁ। ବିଶେଷଜ୍ଞ ଓ ସ୍ଥାନୀୟ ଲୋକଙ୍କ ଆଲୋଚନା ମୁତାବକ, ନିଆଳି ଛେନା ଭଳି ଏହି ଟ୍ୟାଙ୍କର କ୍ଷୀର ମଧ୍ୟ ସମ୍ପୂର୍ଣ୍ଣ ପ୍ରକୃତ ଗାଈ କ୍ଷୀର ନୁହେଁ, ବରଂ ଏଥିରେ ଦୁଗ୍ଧ ପାଉଡର ଏବଂ ବିଭିନ୍ନ ରାସାୟନିକ ପଦାର୍ଥ ମିଶାଯାଇ ଏହାକୁ ବହଳିଆ ଓ ସ୍ୱାଦିଷ୍ଟ କରାଯାଉଛି। କେତେକ ଅଞ୍ଚଳରେ କ୍ଷୀରକୁ ଅଧିକ ଦିନ ସଂରକ୍ଷଣ କରିବା ଏବଂ ଏହାର ଗଠନକୁ ଠିକ୍ ରଖିବା ପାଇଁ କ୍ଷତିକାରକ ଡିଟରଜେଣ୍ଟ କିମ୍ବା ଅନ୍ୟାନ୍ୟ ସାମଗ୍ରୀ ବ୍ୟବହାର କରାଯାଉଥିବା ନେଇ ମଧ୍ୟ ଗୁରୁତର ସନ୍ଦେହ କରାଯାଉଛି। ଏପରି କ୍ଷୀର ନିୟମିତ ପାନ କରିବା ଦ୍ୱାରା ଜନସାଧାରଣଙ୍କ ସ୍ୱାସ୍ଥ୍ୟ ପ୍ରତି ଏକ ବଡ଼ଧରଣର ବିପଦ ଘନେଇ ଆସୁଥିଲେ ମଧ୍ୟ ସ୍ଥାନୀୟ ଖାଦ୍ୟ ସୁରକ୍ଷା ଅଧିକାରୀ କିମ୍ବା ସମ୍ପୃକ୍ତ ପ୍ରଶାସନିକ ବିଭାଗ ଏଥିପ୍ରତି ସେତେଟା କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରୁଥିବା ପରିଲକ୍ଷିତ ହେଉନାହିଁ।
ରାଜ୍ୟରେ ବର୍ତ୍ତମାନ ଏକାଧିକ ସଂସ୍ଥା ଦୁଗ୍ଧ ଓ ଦୁଗ୍ଧଜାତ ସାମଗ୍ରୀର ବ୍ୟବସାୟ ସାମ୍ରାଜ୍ୟ ବିସ୍ତାର କରିଥିବା ବେଳେ ବେଆଇନ ଭାବେ ଖୋଲାମେଲାରେ ବିକ୍ରି ହେଉଥିବା ଏହି କ୍ଷୀର ବଜାରର ସନ୍ତୁଳନକୁ ମଧ୍ୟ ବିଗାଡ଼ୁଛି। ପ୍ୟାକେଟ୍ କ୍ଷୀରର ଗୁଣବତ୍ତା ନିୟନ୍ତ୍ରଣ ପାଇଁ ସରକାରୀ ସ୍ତରରେ ବିଭିନ୍ନ ବ୍ୟବସ୍ଥା ରହିଛି, ମାତ୍ର ରାଜଧାନୀର ବଜାର ଓ ଗଳିକନ୍ଦିରେ ପ୍ରତିଦିନ ଟନ୍ ଟନ୍ ଖୋଲା କ୍ଷୀର ବିକ୍ରି ହେଉଥିଲେ ମଧ୍ୟ ଏହାର କୌଣସି ପ୍ରକାର ଲାବୋରେଟୋରୀ ପରୀକ୍ଷା କରାଯାଉନାହିଁ। ଯେପରି ଭାବେ ଅନ୍ୟାନ୍ୟ ଦୁଗ୍ଧଜାତ ସାମଗ୍ରୀ ଉପରେ ଚଢ଼ଉ କରାଯାଇ ଅପମିଶ୍ରଣ ପଦାକୁ ଅଣାଯାଇଥିଲା, ଠିକ୍ ସେହିପରି ଖୋଲାମେଲାରେ ବିକ୍ରି ହେଉଥିବା ଏହି ଟ୍ୟାଙ୍କର କ୍ଷୀରର ନିୟମିତ ଯାଞ୍ଚ କରାଯିବା ଜରୁରୀ ହୋଇପଡ଼ିଛି। ସାଧାରଣ ଖାଉଟିମାନେ ସରକାର ଏବଂ ସ୍ଥାନୀୟ ପ୍ରଶାସନିକ ଅଧିକାରୀଙ୍କୁ ଦୃଢ଼ ଅନୁରୋଧ କରିଛନ୍ତି ଯେ ତୁରନ୍ତ ଏକ ସ୍ୱତନ୍ତ୍ର ଟିମ୍ ଗଠନ କରାଯାଇ ଏହି ଟ୍ୟାଙ୍କର କ୍ଷୀରର ଉତ୍ସ, ଗୁଣବତ୍ତା ଏବଂ ବିଶୁଦ୍ଧତା ଯାଞ୍ଚ କରାଯାଉ, ଯାହାଫଳରେ ଭବିଷ୍ୟତରେ କୌଣସି ବଡ଼ଧରଣର ସ୍ୱାସ୍ଥ୍ୟଗତ ବିପର୍ଯ୍ୟୟରୁ ସହରବାସୀ ରକ୍ଷା ପାଇପାରିବେ।