ନୂଆଦିଲ୍ଲୀ: କେନ୍ଦ୍ରୀୟ ସଂରକ୍ଷିତ ପୁଲିସ ବାହିନୀ ବା ସିଆରପିଏଫ ଏକ ଐତିହାସିକ ଉପଲବ୍ଧି ହାସଲ କରିଛି। ଗତ ୪୭ ବର୍ଷ ମଧ୍ୟରେ ପ୍ରଥମ ଥର ପାଇଁ କ୍ରମାଗତ ୧୨ ମାସ ଧରି ସିଆରପିଏଫ ଶୂନ ମୃତାହତ ରେକର୍ଡ କରିଛି, ଅର୍ଥାତ ଗତ ଏକ ବର୍ଷ ମଧ୍ୟରେ କୌଣସି ଯବାନ ସହିଦ ହୋଇନାହାନ୍ତି।
ଏହି ଗୌରବମୟ ଉପଲବ୍ଧିକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଭୂରି ଭୂରି ପ୍ରଶଂସା କରିଛନ୍ତି। ପ୍ରଧାନମନ୍ତ୍ରୀ ମୋଦୀ ସୋସିଆଲ ମିଡିଆ ପ୍ଲାଟଫର୍ମ ‘ଏକ୍ସ’ରେ ଲେଖିଛନ୍ତି, “ଗୋଟିଏ ‘ଶୂନ’ ଯାହା ଅନେକ କିଛି କହିଯାଏ। ୪୭ ବର୍ଷ ମଧ୍ୟରେ ପ୍ରଥମ ଥର ପାଇଁ CRPF କ୍ରମାଗତ ୧୨ ମାସ ଶୂନ ମୃତାହତ ହାସଲ କରିଛି। ଏହା ଆମ ବୀର ଯବାନମାନଙ୍କର ସାହସ, ରଣନୀତି ଏବଂ ସୁରକ୍ଷା ବ୍ୟବସ୍ଥାରେ ଆସିଥିବା ଉନ୍ନତିର ପ୍ରମାଣ।”
ସୂଚନା ଅନୁସାରେ, ସିଆରପିଏଫ ମୁଖ୍ୟତଃ ନକ୍ସଲ ପ୍ରଭାବିତ ଅଞ୍ଚଳ, ଜମ୍ମୁ-କାଶ୍ମୀର ଓ ଉତ୍ତର-ପୂର୍ବ ରାଜ୍ୟରେ ନିୟୋଜିତ ହୋଇଥାଏ। ଏଭଳି ସମ୍ବେଦନଶୀଳ ଅଞ୍ଚଳରେ ଶୂନ ମୃତାହତ ରେକର୍ଡ କରିବା ଏକ ବଡ଼ ସଫଳତା ବୋଲି ବିବେଚନା କରାଯାଉଛି। ଏହା ପଛରେ କେନ୍ଦ୍ର ସରକାରଙ୍କ ନକ୍ସଲମୁକ୍ତ ଅଭିଯାନ, ଆଧୁନିକ ଅସ୍ତ୍ରଶସ୍ତ୍ର, ଉନ୍ନତ ତାଲିମ ଓ ଗୁଇନ୍ଦା ବ୍ୟବସ୍ଥାକୁ ମୁଖ୍ୟ କାରଣ ବୋଲି କୁହାଯାଉଛି।