ଅଯୋଧ୍ୟା: ଅଯୋଧ୍ୟାରେ ଦୀପୋତ୍ସବ ଅବସରରେ ଏକ ଅଲୌକିକ ଓ ଭବ୍ୟ ଦୃଶ୍ୟ ଦେଖିବାକୁ ମିଳିଛି। ସରଯୂ ନଦୀର ବିଭିନ୍ନ ଘାଟରେ ଏକାସାଙ୍ଗରେ ୩୦ ଲକ୍ଷରୁ ଅଧିକ ମାଟି ଦୀପ ପ୍ରଜ୍ୱଳିତ କରାଯାଇ ଏକ ନୂତନ ବିଶ୍ୱ ରେକର୍ଡ ସୃଷ୍ଟି କରାଯାଇଛି, ଯାହାକୁ ଗିନିଜ୍ ୱାର୍ଲ୍ଡ ରେକର୍ଡ ଟିମ୍ ପକ୍ଷରୁ ସ୍ୱୀକୃତି ମିଳିଛି।
ଦୀପୋତ୍ସବ ଅବସରରେ ମର୍ଯ୍ୟାଦା ପୁରୁଷୋତ୍ତମ ପ୍ରଭୁ ଶ୍ରୀରାମଙ୍କ ପବିତ୍ର ନଗରୀ ଅଯୋଧ୍ୟା ଏକ ଅଲୌକିକ ଓ ଭବ୍ୟ ରୂପ ଧାରଣ କରିଛି। ସରଯୂ ନଦୀର ପ୍ରାୟ ୫୫ଟି ପୃଥକ୍ ପୃଥକ୍ ଘାଟରେ ଏକାସାଙ୍ଗରେ ପ୍ରାୟ ୩୦ ଲକ୍ଷ ମାଟି ଦୀପ ପ୍ରଜ୍ଜ୍ୱଳନ କରାଯାଇ ପୁଣି ଏକ ନୂଆ ବିଶ୍ୱ ରେକର୍ଡ ସୃଷ୍ଟି ହୋଇଛି। ଗିନିଜ୍ ୱାର୍ଲ୍ଡ ରେକର୍ଡ ଟିମ୍ ଡ୍ରୋନ୍ କ୍ୟାମେରା ଏବଂ ଗଣନା ପ୍ରଣାଳୀ ସାହାଯ୍ୟରେ ଏହି ବିଶାଳ ଆୟୋଜନର ତଦାରଖ କରି ଏହାକୁ ସ୍ୱୀକୃତି ପ୍ରଦାନ କରିଛନ୍ତି।
ଏହି ମହୋତ୍ସବରେ ରାମ କି ପୌଡ଼ି ସମେତ ସମଗ୍ର ସହର ଦୀପର ସୁନେଲି ଆଲୋକରେ ଝଲସି ଉଠିଥିଲା। ଏହା ସହିତ ଆକର୍ଷଣୀୟ ଲେଜର ଶୋ’, ରଙ୍ଗାରଙ୍ଗ ଆତସବାଜି ଏବଂ ଦେଶବିଦେଶର କଳାକାରମାନଙ୍କ ଦ୍ୱାରା ପରିବେଷିତ ରାମଲୀଳା ସମଗ୍ର ପରିବେଶକୁ ଭକ୍ତିମୟ କରି ଗଢ଼ିତୋଳିଥିଲା। ଏହି ଐତିହାସିକ କାର୍ଯ୍ୟକ୍ରମକୁ ସଫଳ କରିବା ପାଇଁ ରାମ ମନୋହର ଲୋହିଆ ଅବଧ ବିଶ୍ୱବିଦ୍ୟାଳୟ, ସ୍ଥାନୀୟ ମହାବିଦ୍ୟାଳୟ, ଏନ୍.ସି.ସି. ଏବଂ ବିଭିନ୍ନ ସାମାଜିକ ଅନୁଷ୍ଠାନର ପ୍ରାୟ ୩୫ ହଜାରରୁ ଅଧିକ ସ୍ୱେଚ୍ଛାସେବୀ ଦିନରାତି ପରିଶ୍ରମ କରିଥିଲେ। ସରଯୂ ନଦୀ କୂଳରେ ୧,୧୦୦ ରୁ ଅଧିକ ପୁରୋହିତ ଓ ବେଦଜ୍ଞ ବ୍ରାହ୍ମଣଙ୍କ ଦ୍ୱାରା ମହାଆରତି କରାଯାଇଥିଲା।
ଆକାଶରେ ଶହ ଶହ ଡ୍ରୋନ୍ ସାହାଯ୍ୟରେ ଭଗବାନ ଶ୍ରୀରାମ, ଲକ୍ଷ୍ମଣ, ସୀତା, ହନୁମାନ ଏବଂ ଭବ୍ୟ ରାମ ମନ୍ଦିରର ଆଲୋକମୟ ଚିତ୍ର ପ୍ରଦର୍ଶନ କରାଯାଇଥିଲା। ରାମାୟଣର ବିଭିନ୍ନ ପ୍ରସଙ୍ଗ ଉପରେ ଆଧାରିତ ଝାଙ୍କି (ପ୍ରଜ୍ଞାପନ ମେଢ଼) ଏବଂ ସାଂସ୍କୃତିକ ଶୋଭାଯାତ୍ରା ସହର ପରିକ୍ରମା କରିଥିଲା। ରାମ ଜନ୍ମଭୂମି ମନ୍ଦିର ପରିସରକୁ ମଧ୍ୟ ସ୍ୱତନ୍ତ୍ର ଫୁଲ ଏବଂ ଆଲୋକମାଳାରେ ସଜ୍ଜିତ କରାଯାଇଥିଲା। ଦେଶ ବିଦେଶରୁ ଲକ୍ଷ ଲକ୍ଷ ଶ୍ରଦ୍ଧାଳୁ ଏହି ଦିବ୍ୟ ଦୃଶ୍ୟର ସାକ୍ଷୀ ହେବା ପାଇଁ ଅଯୋଧ୍ୟାରେ ଏକତ୍ରିତ ହୋଇଥିଲେ। ସୁରକ୍ଷା ଦୃଷ୍ଟିରୁ ସମଗ୍ର ନଗରୀରେ କଡ଼ା ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି।