ଜ୍ୟୋତି ନନ୍ଦ
ପ୍ରଥମମରୁ କହିଦେବା ଉଚିତ ହେବ ଯେ ଏହି ଆଇଡିଆଟି ଆଦୌ ମୌଳିକ ନୁହଁ।
ଆମର ଲୋକପ୍ରିୟ ତଥା ପୋଷାକପ୍ରିୟ ପ୍ରଧାନସେବକ ଙ୍କର ପ୍ରିୟତମ “ପକୁଡି ପ୍ରସ୍ତୁତି” ଭଳି ଉଚ୍ଚ ପ୍ରଯୁକ୍ତି ସଂପନ୍ନ କର୍ମନିଯୁକ୍ତିର ଉଚ୍ଚ ବିଚାର ସହ ନିମ୍ନସ୍ଥ ଆଇଡିଆ ଟି ସମକକ୍ଷ ହୋଇପାରିବ ବୋଲି ବିଶ୍ୱାସ ରଖୁଛି।
ଅବଶ୍ୟ ଆମେ ଅନାଗତ ସଂତାନର ନାଆଁ ଗୋପାଳ ରଖିବା ଭଳି ଅନାଗତ କର୍ମନିଯୁକ୍ତି ରେ ଶତକଡା ଦଶ ଆରକ୍ଷଣ ରଖିପାରିବାର ବ୍ୟବସ୍ଥା କରିପାରୁ ।ଆଉ ଏହି ଅନାଗତଟି କେମିତି ସମସ୍ତ ଆଗତ(ଗତ ସତୁରୀ ବର୍ଷର ଯେତେବେଳେ ଆଗତ ଅଛି) ଠାରୁ ଶ୍ରେଷ୍ଠ ସେହିକଥା ଭାରତବର୍ଷରେ କେବଳ ଜଣେ କହିପାରନ୍ତି।ଆମର ପ୍ରଧାନ ସେବକ ପୋଷାକପ୍ରିୟ ହେଲେ ସେହେଉଛନ୍ତି ଏକମାତ୍ର ତର୍କପ୍ରିୟ ଭାରତୀୟ।ସେ ଅର୍ଥାତ୍ ଆମର ମାନନୀୟ ଅର୍ଥମନ୍ତ୍ରୀ।ସେ ଯେକୌଣସି ଅନର୍ଥକୁ ଅର୍ଥଯୁକ୍ତ କରିପାରନ୍ତି।
କହିବା କଥା ହେଉଛି ଉଣେଇଶର ନିର୍ବାଚନ ଯାଏଁ ଆପଣମାନେ ଯଥାକ୍ରମେ ଏହି ପୋଷାକ ଆଉ ତର୍କ ପ୍ରିୟ ଦୁଇଜଣଙ୍କର ମୁଖ ନିଃସୃତ ଅନାଗତ ମାନଙ୍କ ଆଗତ ର ଅନେକ ଉଚ୍ଚକୋଟିର ଉପସ୍ଥାପନା ଶୁଣିପାରିବେ।
ତାହାପୂର୍ବରୁ ଏହି ଆଗତଟି ଆପଣମାନଙ୍କ ପାଇଁ।
ଏହି ନିମ୍ନସ୍ଥ ନିଶ୍ଚିତ କର୍ମନିଯୁକ୍ତି ର ସଫଳତା କାମନା ସହ ଏହି ଆଇଡିଆ ର ସୃଷ୍ଟିକର୍ତ୍ତା,ପ୍ରସାରକର୍ତ୍ତାଙ୍
ଆଉ ଅଧିକ ଭୂମିକା ପ୍ରଦାନ ନକରି ସିଧା ସଳଖ ଏହି ନିଶ୍ଚିତ କର୍ମ ନିଯୁକ୍ତି ର ଖସଡା ଭିତରକୁ ଯିବା।ଆପଣମାନେ ଏହି ଖସଡାଟିକୁ ଗୋଟିଏ ହାଣ୍ଡବିଲ୍ ରୁ ସହଜରେ ବୁଝିଯିବେ।ଆପଣମାନେ ଚାହିଁଲେ ଏହି ହାଣ୍ଡବିଲ୍ କୁ ବ୍ୟବହାର କରିପାରନ୍ତି।
ହାଣ୍ଡବିଲ୍ ର ହେଡିଙ୍ଗ୍ କୁ ଆପଣମାନେ ୨୦ ଫଣ୍ଟ୍ ରେ ଲେଖିପାରନ୍ତି।ତାହା ହେଉଛି:
ଯଦି ଆପଣ କୌଣସି ନେତା,ମନ୍ତ୍ରୀ ବା ସରକାରଙ୍କ କୁଶପୁତ୍ତଳିକା ଦାହ କରିବାକୁ ଚାହୁଁଛନ୍ତି ତେବେ ଆମ୍ଭର ସେବା ଗ୍ରହଣ କରିବାକୁ ବିନମ୍ର ଅନୁରୋଧ।
ତାହାପରେ ପାଠ ୧୮ଫଣ୍ଟ୍ ରେ ହେଲେ ଚଳିବ।ହାଣ୍ଡବିଲ୍ ର ପୂରା ପାଠ ଏହିଭଳି:
ଆମ୍ଭର ଏଠାରେ ଅଭାବୀଚାଷୀ ଯିଏ ଆତ୍ମହତ୍ୟା କରିଛି ତାହାର କ୍ଷେତର ନଡା ତଥା ରୁଗ୍ଣ ତନ୍ତୁବାୟ ସମିତିର ବିକ୍ରୀ ହୋଇପାରୁନଥିବା ଖଦଡରେ ପ୍ରସ୍ତୁତ ବିଶୁଦ୍ଧ କୁଶପୁତ୍ତଳିକା ପୂର୍ଣ୍ଣ ନିର୍ମାଣ ଅବସ୍ଥାରେ ଉପଲବ୍ଧ।ଅବ୍ୟବହୃତ ଜୋତା ତଥା ଚପଲ ଏବଂ ସତେଜ ପଦ୍ମଫୁଲର ମାଳା ସଂପୃକ୍ତ କୁଶପୁତ୍ତଳିକା ସହିତ ସଂପୂର୍ଣ୍ଣ ଫ୍ରି।ଏହା ସହିତ ଆମ୍ଭର ସଂସ୍ଥାରୁ କୁଶପୁତ୍ତଳିକା ସହିତ ଭିନ୍ନ ଭିନ୍ନ ରଂଗର ଟୋପି ଆପଣମାନେ ଆପଣଙ୍କ ଇଚ୍ଛାନୁସାରେ ପାଇ ପାରିବେ।ସେଥିପାଇଁ ଆପଣଙ୍କୁ ଅତିରିକ୍ତ ଦେୟ ଦେବାକୁ ପଡିବ।ଯେହେତୁ ଆମର ଷ୍ଟକ୍ ରେ ଯଥେଷ୍ଟ ଗେରୁଆ ରଂଗର ଟୋପି ମହଜୁଦ ଅଛି ତେଣୁ କ୍ଲିଅରାନ୍ସ ସେଲ୍ ହିସାବରେ ସେଥିରେ ଶତକଡା ପଚାଶ ରିହାତି ଦିଆଯିବ।ଆମ୍ଭର ସଂସ୍ଥା ଆପଣମାନେ ନେଇଥିବା କୁଶପୁତ୍ତଳିକାଟି ଯେପରି ବିନାବାଧାରେ ଆଉ ଅତି ସହଜରେ ଦାହ କରାଯାଇପାରେ ସେଥିପାଇଁ ଆବଶ୍ୟକ କିରୋସିନି ତେଲକୁ ଆମ୍ଭେ କଂଟ୍ରୋଲ୍ ମୂଲ୍ୟରେ ଯୋଗାଇଦେଇ ପାରିବୁ।ଏହା ସହିତ ଆପଣମାନଙ୍କର ସୁବିଧାକୁ ଆଖିଆଗରେ ରଖି ଆମ୍ଭେ ଆମ୍ଭର ସଂସ୍ଥା ତରଫରୁ ସ୍ୱଖର୍ଚ୍ଚରେ ଆପଣଙ୍କ ପସନ୍ଦର କୁଶପୁତ୍ତଳିକାକୁ ଆପଣ ଯେଉଁ ସ୍ଥାନରେ ଉକ୍ତ କୁଶପୁତ୍ତଳିକାକୁ ଦହନ କରିବାକୁ ଚାହୁଁଛନ୍ତି ସେହି ସ୍ଥାନକୁ ସରବରାହ କରିବୁ।ମାତ୍ର କୁଶପୁତ୍ତଳିକା ରେ ଯେଉଁ ନାଆଁ ଲେଖାଯିବ ତଥା ଆବଶ୍ୟକ ପୋଷ୍ଟର ଆଦି ବ୍ୟବହାର କରାଯିବ ସେଥି ପାଇଁ ଆମର ସଂସ୍ଥାର ଆର୍ଟିଷ୍ଟ ଙ୍କ ସେବା ଗ୍ରହଣ କରିବା ବାଧ୍ୟତାମୂଳକ।ସେଥିପାଇଁ ଅତିରିକ୍ତ ଦେୟ ଦେବାକୁ ପଡିବ ଯାହା ଆମର ପ୍ରଚଳିତ ବଜାରମୂଲ୍ୟ ଠାରୁ ଯଥେଷ୍ଟ ସୁଲଭ।
ଏ ସଂକ୍ରାନ୍ତରେ ସମସ୍ତ ଦେୟ ପେଟିଏମ୍ ମାଧ୍ୟମରେ ଦେବାକୁ ଅନୁରୋଧ।
ଏହା ସହିତ ଆମ୍ଭର ସଂସ୍ଥା ଅନ୍ୟ କେତୋଟି ଅତିରିକ୍ତ ବ୍ୟବସ୍ଥା ର ପ୍ରବଂଧନ କରିଅଛି ଯାହା ପାଇଁ ସମସ୍ତ ଦେୟ ଅତିରିକ୍ତ।
୧•କୁଶପୁତ୍ତଳିକା ଦାହ ସମୟରେ ଭୀଡ ପାଇଁ ଲୋକ ଯୋଗାଣ
୨•ଆତ୍ମାହୁତିରୁ ସୁରକ୍ଷିତ ହୋଇ ଖସି ଆସିବା ନିମନ୍ତେ ସ୍ଵତନ୍ତ୍ର ପ୍ରଶିକ୍ଷିତ ଷ୍ଟଣ୍ଟମ୍ୟାନ ଙ୍କ ଦ୍ଵାରା ପ୍ରଶିକ୍ଷଣ।
ଏହାପରେ ହାଣ୍ଡବିଲ୍ ଶେଷରେ ଆପଣ କୌଣସି ରାଜନେତା ବା ଅଭିନେତାଙ୍କ ନାଆଁରେ ଅମୁକ ସର୍ଭିସ୍ ସେଣ୍ଟର ବୋଲି ଲେଖିପାରନ୍ତି।ଦୟାକରି କୌଣସି ପରମାର୍ଥିକ ନାଆଁ ଦେବେନାହିଁ।
ଶେଷରେ ଆମ ଗବେଷଣାରୁ ଜଣାଯାଇଛି ଯେ ପ୍ରାୟତଃ ନିର୍ବାଚନ ଯେତିକି ପାଖହୋଇ ଆସୁଥାଏ କୁଶପୁତ୍ତଳିକା ଦାହ କାର୍ଯ୍ୟକ୍ରମ ସେତେ ଅଧିକ ହୋଇଥାଏ।ତେଣୁ ଆପଣଙ୍କ ବେପାର ମାନ୍ଦା ହେବାର ସଂଭାବନା ନାହିଁ କହିଲେ ଚଳିବ।
