ସମୀକ୍ଷା ବ୍ୟୁରୋ
ବିବାହ ଏକ ପବିତ୍ର ସମ୍ପର୍କ। ସ୍ବାମୀ ସ୍ତ୍ରୀ ଦୁହେଁ ଏହି ବନ୍ଧନକୁ ସ୍ନେହ ଓ ପ୍ରେମ ଦ୍ବାରା ବାନ୍ଧି ରଖିଥାନ୍ତି। କିନ୍ତୁ ବଦଳୁଥିବା ସମୟରେ ଏହି ବନ୍ଧନ ଆଉ ସେପରି ଶକ୍ତ ହୋଇ ରହୁନାହିଁ। ଏଥିରେ ଦେଖାଯାଉଛି ଅନେକ ବ୍ୟତିକ୍ରମ। ସ୍ତ୍ରୀ ଅନ୍ୟ ପୁରୁଷ ସହ ରୋମାନ୍ସ କରୁଥିବାବେଳେ ସ୍ବାମୀ ଏହାକୁ ଦେଖି ସହ୍ୟ କରିପାରିନଥିଲେ।ତା’ପରେ ଘଟାଇଥିଲେ ନିର୍ମମ କାଣ୍ଡ। ଗ୍ରେଟର ନୋଏଡାର ସୁରଜପୁରଠାରେ ଏକ ମାମଲା ସାମ୍ନାକୁ ଆସିଛି। ଜଣେ ସ୍ବାମୀ ତାଙ୍କ ସ୍ତ୍ରୀଙ୍କୁ ଅତି ନିର୍ମମ ଭାବେ ହତ୍ୟା କରିଛନ୍ତି। ସ୍ବାମୀଙ୍କୁ ତାଙ୍କ ସ୍ତ୍ରୀ ଅନ୍ୟ କାହା ସହିତ ସମ୍ପର୍କ ରଖିଛନ୍ତି ବୋଲି ସନ୍ଦେହ କରୁଥିଲେ। ମିଳିଥିବା ସୂଚନା ଅନୁସାରେ ୟୁପିର ଶାହଜାହାନପୁର ନିବାସୀ ସମ୍ପୃକ୍ତ ଅଭିଯୁକ୍ତ ସ୍ବାମୀ ଜଣକ ତାଙ୍କ ସ୍ତ୍ରୀଙ୍କୁ ଅନ୍ୟ ପୁରୁଷଙ୍କ ସହ ଆପତ୍ତିଜନକ ଅବସ୍ଥାରେ ଦେଖିଥିଲେ। ଏହାପରଠାରୁ ଦୁହିଙ୍କ ମଧ୍ୟରେ ବିବାଦ ଚାଲିଥିଲା। ଏହି ଘଟଣାକୁ ନେଇ ଦୁହିଁଙ୍କ ଝଗଡା ଏତେ ବଢିଗଲା ଯେ ସ୍ବାମୀ ଜଣକ ରାଗରେ ପତ୍ନୀଙ୍କ ଶରୀରରେ ଛୁରୀ ମାରିଚାଲିଲେ। ଏପରି ଭାବରେ ୧୫ଥର ଛୁରୀ ମାରିଥିଲେ। ଏହାପରେ ସେ ତାଙ୍କ ସ୍ତ୍ରୀଙ୍କୁ ଲହୁଲୁହାଣ ଅବସ୍ଥାରେ ଛାଡିକୁ ପଳାୟନ କରିଥିଲେ। ଗୁରୁତର ଅବସ୍ଥାରେ ତାଙ୍କ ସ୍ତ୍ରୀଙ୍କୁ ପଡୋଶୀ ମେଡ଼ିକାଲରେ ଭର୍ତ୍ତି କରିଥିବାବେଳେ, ଡାକ୍ତର ତାଙ୍କୁ ସେଠାରେ ମୃତ ଘୋଷଣା କରିଥିଲେ। ପଡ଼ୋଶୀଙ୍କ କହିବାନୁସାରେ ଦୁହିଁଙ୍କ ମଧ୍ୟରେ ପ୍ରାୟତଃ କଳହ ହୋଇଥାଏ। ମହିଳାଙ୍କ ସ୍ବାମୀ ଜଣକଙ୍କର ଏକ ବାସନକୁସନ ଦୋକାନ ରହିଛି। ପୋଲିସ୍ ମହିଳାଙ୍କ ଶବକୁ ପୋଷ୍ଟମର୍ଟମ କରିବାକୁ ପଠଟାଇଥିବାବେଳେ ଏହି ଘଟଣାର ତଦନ୍ତ ଜାରି ରଖି ଫେରାର୍ ଅଭିଯୁକ୍ତଙ୍କୁ ତଲାସ କରୁଛି।