ମହାରାଷ୍ଟ୍ର, 25/12:
ସମ୍ପ୍ରତି ଦେଶରେ ଧର୍ମକୁ ନେଇ ରାଜନୀତି ଚାଲିଥିବାବେଳେ ମହାରାଷ୍ଟ୍ରର ଏକ ଗ୍ରାମ ଅନନ୍ୟ ନିଷ୍ପତ୍ତି ନେଇଛନ୍ତି। ଗ୍ରାମବାସୀଙ୍କ ଉନ୍ନତ ବିଚାରାଧାରାର ପ୍ରତିଫଳନ ଦେଖିବାକୁ ମିଳିଛି ଏଠି । ମହାରାଷ୍ଟ୍ରରେ ରହିଥିବା ଏକ ଗ୍ରାମର ଗ୍ରାମବାସୀମାନେ ଧାର୍ମିକ କାର୍ଯ୍ୟକ୍ରମରେ ହେଉଥିବା ଖର୍ଚ୍ଚକୁ କମ୍ କରି ଏହି ଅର୍ଥରେ ପିଲାଙ୍କ ଶିକ୍ଷାରେ ବିନିଯୋଗ କରିବାର ଏକ ଉତ୍ତମ ନିଷ୍ପତ୍ତି ନେଇଛନ୍ତି।
ମହାରାଷ୍ଟ୍ରର ଏହି ପୋଖରୀ ନାମରେ ଏକ ଗ୍ରାମର ଗ୍ରାମବାସୀମାନେ ଶିଶୁଙ୍କ ଭବିଷ୍ୟତ ପାଇଁ ଏକ ଅନନ୍ୟ କାର୍ଯ୍ୟ କରୁଥିବାର ଉଦାହରଣ ଦେଖିବାକୁ ମିଳିଛି। ଏହି ଗ୍ରାମର ଜିଲ୍ଲା ପରିଷଦ ସଦସ୍ୟ କହିଛନ୍ତି ଯେ, ଗ୍ରାମବାସୀମାନେ ନିଷ୍ପତ୍ତି ନେଇଛନ୍ତି ଯେ, ପିଲାଙ୍କୁ ଶିକ୍ଷା ଦିଗରେ ଅଧିକ ପ୍ରୋତ୍ସାହିତ ତଥା ତାଙ୍କ ଶିକ୍ଷାର ଉନ୍ନତି ପାଇଁ ଏହି ପ୍ରୟାସ କରାଯାଉଛି । ଏଥିପାଇଁ ସମସ୍ତ ଗ୍ରାମବାସୀ ମାନେ ନିଜ ନିଜର ଯୋଗଦାନ ଦେଉଛନ୍ତି। ଜିଲ୍ଲା ପରିଷଦଙ୍କ ସୂତ ଅନୁସାରେ ଗ୍ରାମରେ ଥିବା ଅଙ୍ଗନଓ୍ବାଡି କେନ୍ଦ୍ରକୁ ଉନ୍ନତୀକରଣ କରିବା ସହିତ ବିଦ୍ୟାଳୟର କମ୍ପ୍ୟୁଟର ଲାବ୍ର ନିର୍ମାଣ ମଧ୍ୟ କରିଛନ୍ତି। ଏବେ ବିଦ୍ୟାଳୟର କ୍ୟାମ୍ପସ୍କୁ ବଢାଇବା ଯୋଜନା କରାଯାଇଛି। ବିଦ୍ୟାଳୟର କ୍ୟାମ୍ପସ୍କୁ ବଢାଇବା ପାଇଁ ଦୁଇ ଏକର ଜମି ଯୋଗାଇ ଦିଆଯିବ। ଗ୍ରାମରେ ଥିବା ବିଦ୍ୟାଳୟ ପାଖରେ ମାତ୍ର 0.45 ଏକର ଜମି ରହିଛି । ଏଥିନିମେନ୍ତ ସମ୍ପୃକ୍ତ ଗ୍ରାମବାସୀମାନେ ଧାର୍ମିକ କାର୍ଯ୍ୟରେ ହେଉଥିବା ଖର୍ଚ୍ଚକୁ କମ୍ କରି ଶିକ୍ଷା ତଥା ବିଦ୍ୟାଳୟରେ ବିନିଯୋଗ କରାଯିବ ନେଇ ନିଷ୍ପତ୍ତି ନେଇଛନ୍ତି। ସୂଚନାଯୋଗ୍ୟ ଯେ, ଗ୍ରାମରେ ପ୍ରତ୍ୟେକ ବର୍ଷ ଏକ ଧାର୍ମିକ କାର୍ଯ୍ୟକ୍ରମର ଆୟୋଜନ କରାଯାଇଥିଲା। ଏହା ଏକସପ୍ତାହ ପର୍ଯ୍ୟନ୍ତ ଚାଲିଥାଏ। ଏହା ବେଶ୍ ବ୍ୟୟ ବହୁଳ ହୋଇଥାଏ। ଏଥିରେ ଲୋକଙ୍କୁ ମିଠା ବଣ୍ଟାଯାଇଥାଏ। ଗ୍ରାମବାସୀମାନଙ୍କ ନିଷ୍ପତ୍ତି ଅନୁସାରେ ଏହି କାର୍ଯ୍ୟକ୍ରମରେ ମିଠା ବଦଳରେ ରୁଟି ଓ ଡାଲି ଦିଆଯିବ ।
ଗ୍ରାମବାସୀଙ୍କ ଦ୍ବାରା କରାଯାଇଥିବା ଅଙ୍ଗନଓ୍ବାଡିର ଉନ୍ନତୀକରଣରେ ପ୍ରାୟ 10ଲକ୍ଷରୁ ଉର୍ଦ୍ଧ୍ବ ଟଙ୍କାର ଖର୍ଚ୍ଚ କରାଯାଇଛି। ଅଙ୍ଗନଓ୍ବାଡିକୁ ଡିଜିଟାଲ କରିବା ପାଇଁ ପଞ୍ଚାୟତ ଓ ଅନ୍ୟାନ୍ୟ ସୂତ୍ରରୁ 50 ହଜାରଟଙ୍କାର ସହାୟତା ମିଳିଥିଲା। ଏଥିରେ ଗ୍ରାମବାସୀମାନେ ଅର୍ଥ ମିଶାଇଥିଲେ। ଗ୍ରାମରେ ପାଖାପାଖି 450 ଘର ରହିଥିବାବେଳେ ପ୍ରତ୍ୟେକ ଘରୁ 5-5 ହଜାର ଟଙ୍କାର ସହାୟତା ରାଶି ମିଳିଥିଲା।
ଗ୍ରାମବାସୀମାନେ ଧର୍ମ ବଦଳରେ ଶିକ୍ଷାକୁ ଅଗ୍ରାଧିକାର ଦେଇ ଏକ ଅନନ୍ୟ ପଦକ୍ଷେପ ସୃଷ୍ଟି କରିଛନ୍ତି। ଆଜିର ଶିଶୁ କାଲିର ଭବିଷ୍ୟତ । ଶିଶୁଙ୍କ ଭବିଷ୍ୟତକୁ ସୁନ୍ଦର ଓ ତଥା ରଚନାତ୍ମକ କରିବା ଦିଗରେ ଗ୍ରାମବାସୀଙ୍କ ନିଷ୍ପତ୍ତି ସତରେ ଅନନ୍ୟ। ଧାର୍ମିକ କାର୍ଯ୍ୟକ୍ରମରୁ ଖର୍ଚ୍ଚ କାଟ କରି ଶିକ୍ଷାରେ ବିନିଯୋଗ କରି ଦେଶ ତଥା ସମାଜକୁ ଏକ ସୁନ୍ଦର ବାର୍ତ୍ତା ପ୍ରେରଣ କରିଛନ୍ତି ଏହି ଗ୍ରାମବାସୀମାନେ ।