କେଦାର ମିଶ୍ର
ପ୍ରତି ଭାରତୀୟଙ୍କ ଏକାଉଣ୍ଟରେ ପନ୍ଦର ଲକ୍ଷ ଟଙ୍କା, ସେ ପ୍ରତିଶୃତି ଥିଲା ନା ଜୁମଲା?
ବର୍ଷକୁ ଦୁଇ କୋଟି ଯୁବକଙ୍କୁ ରୋଜଗାର, ସେ ପ୍ରତିଶୃତି ଥିଲା ନା କେବଳ ଧୂଆଁବାଣ?
କଳାଧନ ଉପରେ ସର୍ଜିକାଲ ଷ୍ଟ୍ରାଇକ, ସେଟା ସତ୍ୟ ନା ମହାମିଥ୍ୟା?
୧୦୦ ସ୍ମାର୍ଟ ସିଟିର ନିର୍ମାଣ, ସାଗରମାଳା ପ୍ରକଳ୍ପ, ଦରଦାମ ନିୟନ୍ତ୍ରଣ ଲାଗି ସ୍ଵତନ୍ତ୍ର ପାଣ୍ଠି ଗଠନ, ଲୋକପାଳ….. ତାଲିକା ଅସରନ୍ତି, ସେସବୁ କେବଳ ପାଣିର ଗାର ହୋଇ ରହିଯାଇଛି। ଅଥଚ ୨୦୧୪ ନିର୍ବାଚନ ପୂର୍ବରୁ କୁହାଯାଉଥିଲା, “ଆପଣମାନେ କଂଗ୍ରେସକୁ ଷାଠିଏ ବର୍ଷର ସମୟ ଦେଇଛନ୍ତି, ମୋତେ ମାତ୍ର ଷାଠିଏ ମାସର ସମୟ ଦିଅନ୍ତୁ। ଷାଠିଏ ମାସର ସମୟରେ ମୁଁ ନୂଆ ଭାରତ ଗଢିଦେବି। “ ଷାଠିଏ ମାସରୁ ୫୭ ମାସ ଯାଇସାରିଲାଣି। ଯାହା କୁହାଯାଇଥିଲା ସେଥିରୁ କିଛି ବି ହୋଇନି। ଯାହା ହୋଇଛି ବୋଲି କୁହା ଯାଉଛି ସେଗୁଡିକ କେବଳ ନିର୍ମଳ ପ୍ରଚାର। ବର୍ଷକ ତଳର ଏକ ସୂଚନାରୁ ଜଣା ପଡିଥିଲା ଯେ ମୋଦୀ ସରକାର ଏପ୍ରିଲ ୨୦୧୪ ରୁ ଜୁଲାଇ ୨୦୧୮ ପର୍ୟନ୍ତ ୪୮୮୦ କୋଟି ଟଙ୍କା କେବଳ ବିଜ୍ଞାପନ ବାବଡକୁ ଖର୍ଚ୍ଚ କରିଥିଲେ। ସେତେବେଳେ ଗୋଟେ ଡିଜିଟାଲ ସଂସ୍ଥା ଏହାର ଆକଳନ କରି କହିଥିଲେ ଏତିକି ଟଙ୍କାରେ ଅତିକମରେ ସାଢେ ଚାରି କୋଟି ପିଲାଙ୍କୁ ବର୍ଷେ ପାଇଁ ଖାଇବାକୁ ଦିଆ ଯାଇପାରିଥାନ୍ତା କିମ୍ବା ୨୦ କୋଟି ଶ୍ରମିକଙ୍କୁ ମନରେଗା ରେ ପାରିଶ୍ରମିକ ଦିଆ ଯାଇପାରିଥାନ୍ତା। ଏତିକି ଟଙ୍କା ଖର୍ଚ୍ଚ ହୋଇଥିଲେ ଦଶଟି ମଙ୍ଗଳ ଅଭିଯାନ ସଫଳ ହୋଇପାରିଥାନ୍ତା।
ଛାଡନ୍ତୁ, ସେସବୁ ନକରି କେବଳ ୫୨ ମାସରେ ପ୍ରଚାର ଲାଗି ୪୮୮୦ କୋଟି ଟଙ୍କା ପାଣି ପରି ଖର୍ଚ୍ଚ କରାଗଲା। ଜୁଲାଇ ୨୦୧୮ ରୁ ଆଜି ପର୍ଯନ୍ତ ଏ ଖର୍ଚ୍ଚ ଆହୁରି ବଢିଥିବ। ନିର୍ବାଚନ ବର୍ଷରେ ଅତିକମରେ ୨୦୦ କୋଟି ଟଙ୍କା ବିଜ୍ଞାପନ ବାବଦକୁ ଖର୍ଚ୍ଚ ହୋଇଥାଇପାରେ। ଏସବୁ ବାଦ ମୋଦୀ ସରକାରର ଅସଲ ଅବଦାନ କଣ? ପ୍ରତି କଥାରେ କୁହାଯାଉଛି, ଆମେ ଭ୍ରଷ୍ଟାଚାର ମୁକ୍ତ ସରକାର ଦେଇଛୁ। ହେଲେ ସ୍ଵାଧୀନ ଭାରତର ଇଏ ବୋଧହୁଏ ପ୍ରଥମ ସରକାର ଯିଏ କୌଣସି ପ୍ରକାର ଭ୍ରଷ୍ଟାଚାର ଅଭିଯୋଗର ତଦନ୍ତ କରିବାକୁ ଦେଇ ନାହାନ୍ତି। ବ୍ୟାପମ ଠୁ ଆରମ୍ଭ କରି ରାଫାଲେ ପର୍ଯନ୍ତ ସବୁକଥାରେ ଏ ସରକାର ନିଜେ ନିଜକୁ ପ୍ରମାଣପତ୍ର ଦେଇ ଚାଲିଛି।
ଉଚ୍ଚ ଅଦାଲତର ବିଚାରପତି ନିଯୁକ୍ତି ସମ୍ପର୍କିତ ଗୋଟିଏ ବି ଫାଇଲକୁ ଏ ସରକାର ସହଜରେ ମଞ୍ଜୁରୀ ଦେଇନାହିଁ। ସିବିଆଇ ନିର୍ଦ୍ଦେଶକ ଭଳି ପଦବୀକୁ ଖେଳନା ପରି ଖେଳା ଯାଇଛି। ଲୋକପାଳ ନିଯୁକ୍ତି ଯେମିତି ହୋଇନପାରେ ସେଥିଲାଗି ସୁପ୍ରିମ କୋର୍ଟରେ ବାରମ୍ବାର ବାହାନା କରାଯାଇଛି। କୌଣସି ବି ତଥ୍ୟ ଏ ସରକାର ଦେଇ ନାହାନ୍ତି ଯାହାକୁ ଆଖି ବୁଜି ବିଶ୍ଵାସ କରିହେବ। ତଥ୍ୟ ଓ ପରିସଙ୍ଖ୍ୟାନ ବଦଳାଇବାରେ ମୋଦୀ ସରକାର ସବୁ ରେକର୍ଡ ଭାଙ୍ଗିଛି। ପରିବର୍ତ୍ତିତ ଡାଟା ଓ ମିଛ ପରିସଙ୍ଖ୍ୟାନରେ ବି ଭାରତ ର ସ୍ଥିତି ଅର୍ଥନୈତିକ କିମ୍ବା ସାମାଜିକ ଦୃଷ୍ଟିରୁ ସେତେ ଉନ୍ନତ ଦେଖା ଯାଉନାହିଁ। କେବଳ ପାଞ୍ଚ ବର୍ଷ ସମୟ ଭାଷଣ ଓ ପ୍ରବଚନ ରେ ସରିଗଲା। ଏବେ ପାଞ୍ଚ ବର୍ଷ ପରେ ନୂଆ ନିର୍ବାଚନକୁ ଯିବା ପୂର୍ବରୁ ପୁଣି ପ୍ରତିଶୃତି ସମାବେଶର ଆୟୋଜନ ଚାଲିଛି।
ଗତ କାଲିଠୁ ପୁଣି ନୂଆ ପ୍ରତିଶୃତି ସମାବେଶ ଆରମ୍ଭ ହୋଇଛି। ଏଥର କୁଆଡେ ଲୋକଙ୍କୁ ଲିଖିତ ପ୍ରତିଶୃତି ଦିଆଯିବ।। ଚୁଲି ଚାଉଳ ସବୁ ମାଗଣା। ଓଡିଶାର ଜଣେ କେନ୍ଦ୍ରମନ୍ତ୍ରୀ ଭାଷଣ ଦେଇ କହୁଥିଲେ ତାଙ୍କ ସରକାର ଆସିଲେ ସବୁ ମିଳିବ । ଅର୍ଥାତ ସରକାର ପୂରା ଘର ଚଳାଇବେ। ଦେଶ ଚଳାଇବା ଅପେକ୍ଷା ଏବେ ଲୋକଙ୍କ ଘର ଚଳାଇବା ସରକାରଙ୍କ ମୁଖ୍ୟ କାମ ହେଲାଣି। ଖାଲି ଯେ ସରକାରୀ ଦଳ ସେକଥା କରୁଛନ୍ତି, ତା ନୁହେଁ, ଆପାତତଃ ସବୁ ରାଜନୈତିକ ଦଳ ଏବେ ଲୋକଙ୍କୁ ସାମାଜିକ ସୁରକ୍ଷା ଦେବା ବଦଳରେ ଛୋଟମୋଟ ଦାନ ଦେବାକୁ ଅଧିକ ଗ୍ରହଣୀୟ ବୋଲି ଭାବୁଛନ୍ତି।
ନିର୍ବାଚନ ଆଗରୁ ଏ ପ୍ରତିଶୃତିର ନାଟକକୁ ଭୋଟର ଯେ ବୁଝୁନାହାନ୍ତି ତା ନୁହେଁ, ସେମାନେ ଏ ନାଟକକୁ ବେଶ ଭଲ ଭାବରେ ବୁଝନ୍ତି ଓ ଉପଯୁକ୍ତ ସମୟରେ ନାଟକର ଯବନିକା ପତନ କରିବାର କଳା ମଧ୍ୟ ଲୋକଙ୍କୁ ବେଶ ଜଣା!!