ସମୀକ୍ଷା ବ୍ୟୁରୋ
ବାରିପଦା: ବୁଧବାରଦିନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଦିନିକିଆ ବାରିପଦା ଗସ୍ତରେ ଯାଉଛନ୍ତି। ଏହି ଗସ୍ତର ମୁଖ୍ୟ ଉଦ୍ଦେଶ୍ୟ ହେଲା ସେ ମୟୁରଭଂଜ ଜିଲ୍ଲାର ଆଦିବାସୀ ମହା ସମ୍ମିଳନୀରେ ଯୋଗଦେବେ। ବିଜେଡି ତରଫରୁ ଆୟୋଜିତ ହୋଇଥିବା ଏହି ସମ୍ମିଳନୀରେ ବହୁ ସଂଖ୍ୟାରେ ଆଦିବାସୀ ଯୋଗଦେବା ପାଇଁ ଦଳ ତରଫରୁ ଦୀର୍ଘଦିନରୁ ପ୍ରସ୍ତୁତି କରାଯାଇଛି। ଏଥିସହିତ ସେଠାରେ ଆଦିନୀ ଗ୍ରୁପ ଓ ଭୁବନେଶ୍ବର କିସର ମିଳିତ ସହଯୋଗରେ ଏକ ଆଦିବାସୀ ସ୍କୁଲକୁ ନବୀନ ମଧ୍ୟ ଶୁଭାରମ୍ଭ କରିବେ। ଏହି ଗସ୍ତ ଅବସରରେ ନବୀନ ଆଦିବାସୀଙ୍କ କଲ୍ୟାଣ ପାଇଁ ବିଭିନ୍ନ ପ୍ରକଳ୍ପର ଶୁଭାରମ୍ଭ ମଧ୍ୟ କରିବେ। ତେବେ ବିଜେଡି ପ୍ରତି ଆଦିବାସୀଙ୍କ କିପରି ସମର୍ଥନ ରହିଛି ଏହା ହେଉଛି ତାହାର ଏକ ଶକ୍ତି ପରୀକ୍ଷା ବୋଲି କହିଲେ ଅତ୍ୟୁକ୍ତି ହେବ ନାହିଁ। କାରଣ ମୟୁରଭଂଜ ଜିଲ୍ଲାରେ ବିଜେଡିର ସ୍ଥିତି ଭଲ ନାହିଁ। ଏଥର ନିର୍ବାଚନରେ ମଧ୍ୟ ବିଜେଡି ମୟୁରଭଂଜରୁ ଯେପରି ଆଶା କରିଥିଲା ତାହା ମିଳିଲା ନାହିଁ। ମୁଖ୍ୟତଃ ଏହି ଜିଲ୍ଲାର ଦଳର ଯେଉଁ ତୁଙ୍ଗ ନେତାମାନଙ୍କ ମଧ୍ୟରେ ସମନ୍ବୟ ଅଭାବରୁ ବିଜେଡି ତାହାର ସ୍ଥିତି ମଜବୁତ କରିପାରୁ ନାହିଁ। ଫଳରେ ବିଜେଡି ସୁପ୍ରିମୋ ସେହି ଜିଲ୍ଲାର ପର୍ଯ୍ୟବେକ୍ଷକଙ୍କୁ ପରିବର୍ତ୍ତନ କରି ପ୍ରଣବ ପ୍ରକାଶ ଦାସଙ୍କ ହାତରେ ଅର୍ପଣ କରିଛନ୍ତି। ବର୍ତ୍ତମାନ ଏହି ଆଦିବାସୀ ସମ୍ମଳନୀ ବିଜେଡି ପାଇଁ ଯେତିକି ସମ୍ମାନର ପ୍ରଶ୍ନ ନୁହେଁ ତାଠାରୁ ଅଧିକ ସମ୍ମାନର ପ୍ରଶ୍ନ ହେଉଛି ପୂର୍ବତ୍ତନ ମନ୍ତ୍ରୀ ତଥା ବିଧାୟକ ପ୍ରଣବ ପ୍ରକାଶ ଦାସଙ୍କର। ସେଥିପାଇଁ ଏହି ସମ୍ମିଳନୀର ସଫଳତାକୁ ନେଇ ବିଜେଡିର କେତେକ ତୁଙ୍ଗ ନେତା ମଧ୍ୟ ଅନେଇ ବସିଛନ୍ତି।
