ସମୀକ୍ଷା ବ୍ୟୁରୋ
ବାଣପୁର : ଆଜି ଅଖିଳ ଭାରତୀୟ ବିଦ୍ୟାର୍ଥୀ ପରିଷଦ(ଏବିଭିପି) ବାଣପୁର-ବାଲୁଗାଁ ନଗର ଶାଖା ତରଫରୁ ଏହା ଅଧୀନରେ ଥିବା ସମସ୍ତ ୭ ଗୋଟି ମହାବିଦ୍ୟାଳୟ ଯଥା ଗୋଦାବରୀଶ ମହାବିଦ୍ୟାଳୟ, ବାଣପୁର, ବାଲୁଗାଁ ମହାବିଦ୍ୟାଳୟ, ବାଲୁଗାଁ, ନାଚୁଣୀ ମହାବିଦ୍ୟାଳୟ, ନାଚୁଣୀ, ପର୍ଶୁରାମ ଉଚ୍ଚ ମାଧ୍ୟମିକ ବିଦ୍ୟାଳୟ, ଗମ୍ଭାରୀମୁଣ୍ଡା, କାଳିଜାଇ ମହାବିଦ୍ୟାଳୟ, ବାଲୁଗାଁ, ପଞ୍ଚୁପଲି ଭୀମ ବଳବନ୍ତରାୟ ଉଚ୍ଚ ମାଧ୍ୟମିକ ବିଦ୍ୟାଳୟ, ଆଙ୍କୁଲା ଓ ଗ୍ରାମୀଣ ମହିଳା ଉଚ୍ଚ ମାଧ୍ୟମିକ ବିଦ୍ୟାଳୟ, ବାଣପୁର ଓ କିଛି ବିଦ୍ୟାଳୟରେ ୭୧ ତମ ଗଣତନ୍ତ୍ର ଦିବସ ଉପଲକ୍ଷେ ‘ମୋହେ ରଙ୍ଗଦେ ତ୍ରିରଙ୍ଗା’ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି । ଏହି କାର୍ଯ୍ୟକ୍ରମ ଦ୍ୱାରା ସବୁ ମହାବିଦ୍ୟାଳୟ କ୍ୟାମ୍ପସରେ ପରିଷଦର କାର୍ଯ୍ୟକର୍ତ୍ତାମାନେ ଛାତ୍ର ଛାତ୍ରୀ, କଲେଜର ଅଧ୍ୟାପକ, ଅଧ୍ୟାପିକା ଓ କର୍ମଚାରୀଙ୍କ ଗାଲ ତଥା ହାତରେ ତୂଳି ଦ୍ୱାରା ଛୋଟ ଛୋଟ ତିରଙ୍ଗା ପତାକା ଚି଼ହ୍ନ ଅଙ୍କନ କରିଥିଲେ ଓ ପବିତ୍ର ଗଣତନ୍ତ୍ର ଦିବସର ଶୁଭେଚ୍ଛା ଜଣାଇଥିଲେ।
ଏହି କାର୍ଯ୍ୟକ୍ରମ ଜରିଆରେ ସମାଜରେ ବସବାସ କରୁଥିବା ପ୍ରତ୍ୟେକ ନାଗରିକ ତଥା ଛାତ୍ରଛାତ୍ରୀଙ୍କ ମନରେ ଦେଶଭକ୍ତି ଜାଗ୍ରତ କରିବାର ଲକ୍ଷ୍ୟ ରଖାଯାଇଛି ବୋଲି ରାଜ୍ୟ ଏସ୍ଏଫ୍ଡି ଯୁଗ୍ମ ସଂଯୋଜକ ସୀତରାମ ଅଗ୍ରଓ୍ବାଲ ପ୍ରକାଶ କରିଛନ୍ତି । ଏବିଭିପି ତରଫରୁ ଏପରି ଏକ ନିଆରା କାର୍ଯ୍ୟକ୍ରମକୁ ନଗରବାସୀ ଉଚ୍ଛ୍ବସିତ ପ୍ରଶଂସା କରିବା ସହିତ ରାଷ୍ଟ୍ରପ୍ରେମ ପାଇଁ ଏଭଳି କାର୍ଯ୍ୟକ୍ରମ ଜାରି ରହୁ ବୋଲି ମତ ପ୍ରକାଶ କରିଛନ୍ତି । ଏବିଭିପି ଦ୍ବାରା ଆୟୋଜିତ କରାଯାଇଥିବା ଏହି କାର୍ଯ୍ୟକ୍ରମକୁ ଜିଲ୍ଲା ଛାତ୍ରୀ ପ୍ରମୁଖ ସଂଗୀତା ସ୍ବାଇଁ, ବର୍ଷା, ଅନୀତା, ସୋନାଲି, ସିଦ୍ଧାର୍ଥ, ବିଶ୍ବଜିତ୍, ମହେଶ, ଅଜୟ, ରବି, ବିପ୍ଳବ, ଗୁରୁ, ହାପି, ସତ୍ୟବ୍ରତ, ପ୍ରିୟାଂଶୁ, ଆଦିତ୍ୟ, ପ୍ରିତମ୍ ପ୍ରମୁଖ ପରିଚାଳନା କରିଥିଲେ ।