ନୂଆଦିଲ୍ଲୀ : ଦୀର୍ଘ ସାତ ବର୍ଷ ଓ ତିନି ମାସ ପରେ ନିର୍ଭୟାଙ୍କୁ ମିଳିଛି ନ୍ୟାୟ । ଡେରିରେ ହେଉ ପଛେ ନିର୍ଭୟାଙ୍କୁ ନ୍ୟାୟ ମିଳିଛି। ବହୁ ଚର୍ଚ୍ଚିତ ନିର୍ଭୟା ଗଣଦୁଷ୍କର୍ମ ଓ ହତ୍ୟା ମାମଲାରେ ଚାରି ଦୋଷୀଙ୍କୁ ଫାଶୀ ଖୁଣ୍ଟରେ ଝୁଲାଯାଇଛି । ସକାଳ 5.30 ମିନିଟ୍ରେ ଫାଶୀ ଖୁଣ୍ଟରେ ଝୁଲିଲେ ଚାରି ଦୁଷ୍କର୍ମକାରୀ- ମୁକେଶ ସିଂହ, ବିନୟ ଶର୍ମା, ପୱନ ଗୁପ୍ତା ଓ ଅକ୍ଷୟ ସିଂହ ଠାକୁର । ଗତକାଲି ଦିଲ୍ଲୀର ପଟିଆଲା ହାଇସକୋର୍ଟ ମୃତ୍ୟୁର ପରୱାନା ଉପରେ ରୋକ ଲଗାଇବାକୁ ମନା କରିବା ପରେ ଏହି ଚାରି ନରାହନ୍ତା ରାକ୍ଷସଙ୍କୁ ଆଜି ଫାଶୀଖୁଣ୍ଟରେ ଝୁଲାଇ ଦିଆଯାଇଛି ।
ନିର୍ଭୟା ଦୋଷୀଙ୍କୁ ଫାଶୀ ଦେବା ପାଇଁ ଦିଲ୍ଲୀ ପଟିଆଲା ହାଉସ୍ କୋର୍ଟ ତିନି ତିନି ଥର ଡେଥ୍ ୱାରେଣ୍ଟ ଜାରି କରାଯାଇଥିଲା । କିନ୍ତୁ ଆଇନର ଗଳା ବାଟ ଦେଇ ବର୍ତ୍ତି ଚାଲିଥିଲେ ଦୋଷୀ। କିନ୍ତୁ ତାଙ୍କର ସବୁ ଚାଲ୍ ଫେଲ୍ ମାରିଛି । ଦୋଷୀଙ୍କୁ ଦଣ୍ଡ ମିଳିଛି । କିନ୍ତୁ ଚତୁର୍ଥଥର ଡେଥ୍ ଓ୍ବାରଣ୍ଟେକୁ ଟାଳିବା ପାଇଁ ତାଙ୍କ ଓକିଲ ବେଶ୍ ପରିଶ୍ରମ କରିଥିଲେ । କିନ୍ତୁ ଏହା ଫେଲ୍ ମାରିଥିଲା। ମଝି ରାତିରେ ଏହା ବିରୋଧରେ ଦିଲ୍ଲୀ ହାଇକୋର୍ଟରେ ଅପିଲ କରିଥିଲେ ଦୋଷୀଙ୍କ ଓକିଲ। ଦିଲ୍ଲୀ ହାଇକୋର୍ଟର ଦୁଇ ଜଣ ବିଚାରପତି ସ୍ୱତନ୍ତ୍ର ଭାବେ ମଝି ରାତିରେ ଏହି ଆବେଦନର ଶୁଣାଣି କରିଥିଲେ । ପ୍ରାୟ ୯୦ ମିନିଟର ଶୁଣାଣି ପରେ ଫାଶୀ ରୋକିବାକୁ ଦୋଷୀଙ୍କ ଆବେଦନକୁ ଖାରଜ କରିଦେଇଥିଲେ । ତେବେ ଏହା ପରେ ଦୋଷୀଙ୍କ ଓକିଲ ସୁପ୍ରିମକୋର୍ଟରେ ପୁଣି ଫାଶୀ ରୋକିବାକୁ ଆବେଦନ କରିଥିଲେ । ଅଧ ରାତ୍ରିରେ ସୁପ୍ରିମକୋର୍ଟରେ ଏହି ମାମଲାର ଶୁଣାଣି ଆରମ୍ଭ ହୋଇଥିଲା । ଜଷ୍ଟିସ୍ ଭାନୁମତିଙ୍କ ଖଣ୍ଡପୀଠ ଶୁଣାଣି କରି ଦୋଷୀଙ୍କ ପକ୍ଷରୁ ହୋଇଥିବା ଆବେଦନକୁ ଖାରଜ କରିଥିଲେ ।
ସୂଚନାଯୋଗ୍ୟ, 2012 ଡିସେମ୍ବର 16 ତାରିଖରେ ଚଳନ୍ତା ବସ୍ରେ ମେଡ଼ିକାଲ୍ ଛାତ୍ରୀଙ୍କୁ ଗଣଦୁଷ୍କର୍ମ କରାଯାଇଥିଲା । ସାରା ଦେଶ ଏହି ଘଟଣାରେ ସ୍ତବ୍ଧ ହୋଇଯାଇଥିଲେ । ନିର୍ଭୟାଙ୍କ ମା’ ଆଶାଦେବୀ ପ୍ରାୟ ସାଢେ ସାତ ବର୍ଷ ଧରି ନ୍ୟାୟ ପାଇଁ ଲଢେଇ ଜାରି ରଖିଥିଲେ । ନିର୍ଭୟାଙ୍କ ଦୋଷୀଙ୍କୁ ସଜ୍ଜା ଦେବା ପାଇଁ ତାଙ୍କ ମା’ ଦିଲ୍ଲୀ ଅଦାଲତରୁ ସର୍ବୋଚ୍ଚ ଅଦାଲତ ପର୍ଯ୍ୟନ୍ତ ଯାଇଥିଲେ । ଅଦାଲତରେ ଏହି ମାମଲାର ଶୁଣାଣି ସମୟରେ ନିର୍ଭୟା କାଣ୍ଡର ଅନ୍ୟତମ ଦୋଷୀ ରାମ ସିଂହ ଜେଲ୍ରେ ଆତ୍ମହତ୍ୟା କରିଥିଲେ ।
ପରିଶେଷରେ ଶୁକ୍ରବାର ଦିନ ନିର୍ଭୟାଙ୍କୁ ନ୍ୟାୟ ମିଳିଛି । ଦୋଷୀଙ୍କୁ ଫାଶୀ ହେବା ପରେ ନିର୍ଭୟାଙ୍କ ମା’ ଆଶାଦେବୀ କେନ୍ଦ୍ର ସରକାର, ରାଷ୍ଟ୍ରପତି ଓ କୋର୍ଟକୁ ଧନ୍ୟବାଦ ଜଣାଇଛନ୍ତି ।